25 studzienia
Adliha
Kryminalnaja sprava ŭ dačynieńni da aktyvista niezarehistravanaj moładzievaj arhanizacyi «Małady Front» Sieržuka Huminskaha začynienaja praz adsutnaść dokazaŭ. Pra heta jamu paviedamili ŭ aršanskaj milicyi.
12 studzienia jamu pradjavili aficyjnaje abvinavačańnie pavodle art. 314 «Psavańnie dziaržaŭnaj majomaści» nibyta za vykanańnie hrafici ŭ horadzie. Pierad miascovymi vybarami małady čałaviek byŭ źbity supracoŭnikami milicyi i adsiadzieŭ troje sutak aryštu.
Svaboda druku
U Niaśvižy miascovaje adździaleńnie «Mienabłsajuzdruku» admoviłasia pradavać u svaich kijoskach niedziaržaŭnuju hazetu «Niaśvižski čas».
U hetym hodzie vydańnie ŭžo admovilisia realizoŭvać handlovaje pradpryjemstva «Niaśvižski harcharčpramhandal» i krama «Novaje miesca». Z hetaj pryčyny nakład hazety źniziŭsia z 2100 asobnikaŭ da 1700. Praz šapiki «Sajuzdruku» realizoŭvałasia 250 asobnikaŭ hazety.
Źniali ź ciahnika
Staršyniu Rady moładzi BNF Alesia Kalitu źniali ź ciahniku, na jakim jon nakiroŭvaŭsia ŭ Vilniu. Na pamiežnaj stancyi Hudahaj pamiežniki kanfiskavali ŭ jaho partatyŭny kamputar i fłeš‑kartu.
Svaje dziejańni pamiežniki patłumačyli ŭkazańniami praviarać hramadzianaŭ pamiežnymi vojskami z metaju vyjaŭleńnia materyjalnych nośbitaŭ sa škodnaj dla biełaruskaha hramadztva infarmacyjaj.
Ciahnuć z rehistracyjaj
Ministerstva justycyi Biełarusi patrabuje dadatkovyja dakumenty pa ŭstanoŭčaj kanferencyi Sajuzu levych partyjaŭ (SŁP), što adbyłasia ŭ Čarnihavie 17 studzienia. Adpaviedny list za podpisam kiraŭnika ŭpraŭleńnia hramadzkich abjadnańniaŭ i palityčnych partyjaŭ Ministerstva justycyi Aleha Śližeŭskaha pryjšoŭ u ofis Partyi kamunistaŭ Biełaruskaj (PKB). Miniust zaprasiŭ rehistracyjnyja pratakoły delehataŭ kanferencyi, pratakoły kirujučych orhanaŭ partyjaŭ, što ŭvachodziać u SŁP, ab pryniaćci rašeńniaŭ pa stvareńni Sajuza, pratakoł ab stvareńni arhkamitetk i «inšyja techničnyja dakumenty».
26 studzienia
Statkievič adviedaŭ baćku
Lideru sacyjał‑demakrataŭ Mikałaju Statkieviču, jaki adbyvaje «chimiju» ŭ Puchavickim rajonie Mienskaj vobłaści, upieršyniu za paŭhodu dazvolili naviedać chvoraha baćku ŭ Baranavičach. Palityka nie vypuskali ź internatu na navahodnija śviaty. 26 studzienia pozna ŭviečary Statkieviču dazvolili pajści ŭ adpačynak da paniadziełka.
Nie puścili
Kšyštaf Putra mieŭsia naviedać Horadniu i sustrecca z aktyvistami apalnaha Sajuzu palakaŭ. Adnak na miažy, biez tłumačeńnia pryčynaŭ, jaho paviarnuli nazad.
Zastupilisia
Upraŭleńnie spravami prezidenta paviedamiła RHA «Biełaruski Chielsinski Kamitet» (BCHK), pra skasavańnie biesterminovaj damovy arendy ofisu Kamitetu i zapatrabavała vyzvalić pamiaškańnie. Strata jurydyčnaha adrasu niedziaržaŭnaj arhanizacyjaj moža pryvieści da jaje likvidacyi, jak jurydyčnaj asoby. BCHK nia maje zapazyčanaści pa apłacie arendnaj płaty i ŭ adpaviednaści z zakonam maje pieravažnaje prava na padaŭžeńnie abo pierazaklučeńnie damovy arendy taho samaha pamiaškańnia. U admysłovaj zajavie Mižnarodnaja Chielsinskaja Federacyja nazvała niežadańnie arendadaŭcy padoŭžyć damovu «palityčna matyvavanym» i zaklikała ŭłady padoŭžyć arendu.
Nia varta havaryć pa‑biełarusku
Baćka palitviaźnia Viačasłaŭ Daškievič paviedamiŭ, što supracoŭniki kalonii papiaredžvali Źmitra, kab jon nie razmaŭlaŭ u časie spatkańnia pa‑biełarusku. U advarotnym vypadku jany pahražali pierapynić spatkańnie. Na spatkańni vyśvietliłasia, što palitviazień atrymlivaje daloka nia ŭsie listy, jakija jamu dasyłajuć. Jahonyja baćki taksama z 9 listoŭ Źmitra atrymali tolki dva.
27 studzienia
Kazulin ź siamjoj
Heta było pieršaje doŭhaterminovaje spatkańnie palitźniavolenaha ź siamjoj z momantu zvalnieńnia. A. Kazulina naviedali žonka Iryna z dočkami Volhaj i Julaj. Spatkańnie doŭžyłasia 3 dni.
29 studzienia
Milinkieviča pałochajuć
Lider demakratyčnych siłaŭ Biełarusi Alaksandar Milinkievič abaviazany da 10 lutaha vypłacić 4 miljony 650 tysiač rubloŭ štrafu, prysudžanaha jamu sudom Kastryčnickaha rajonu Miensku nibyta za «naŭmysnaje niezakonnaje pierasiačeńnie miažy». Razam z kopijaj sudovaj pastanovy, Alaksandar Milinkievič atrymaŭ papiaredžańnie ab abaviazkovaj vypłacie da 10 lutaha sumy štrafa. U advarotnym vypadku, jamu pahražaje zabarona na vyjezd ź Biełarusi. Sud adbyvaŭsia ŭ adsutnaść Milinkieviča, jaki daviedaŭsia pra praces, znachodziačysia ź vizytam u Litvie, dzie sustrakaŭsia ź ministram zamiežnych spravaŭ hetaj krainy.
KCHP‑BNF admovili
Viarchoŭny sud admoviŭ Sojmu Kanservatyŭna‑chryścijanskaj partyi – BNF va ŭzbudžeńni kryminalnaj spravy pa fakcie falsyfikacyi prezydenckich vybaraŭ 19 sakavika 2006 h.
Padstavaj dla zvarotu ŭ Viarchoŭny sud stali słovy Alaksandra Łukašenki na pres‑kanferencyi z ukrainskimi žurnalistami 23 listapada 2006 hoda pra falsyfikacyju vybaraŭ. U adkazie Viarchoŭnaha sudu skazana, što razhlad zajavy nie znachodzicca ŭ kampetencyi Viarchoŭnaha sudu Biełarusi, paviedamiŭ Ju.Bieleńki. Pavodle jaho słovaŭ, KCHP‑BNF nie maje namieru spyniacca na takim adkazie: na čarzie zapyt u Viarchoŭny sud z prośbaj rastłumačyć, jakija orhany majuć prava ŭzbudžać kryminalnuju spravu pa fakcie falsyfikacyi vybaraŭ.
30 studzienia
Nia stoj pad partretam
Žycharoŭ Śvietłahorsku Natallu Bordak i 17‑hadovaha Arsienia Jahorčanku zatrymali pa padazreńni ŭ vyviešvańni partretu palitviaźnia Kazulina. Zatrymańnie pravodzili milicyjanty Jaŭhien Kiślakoŭ i Jaŭhien Fiej. Nahodaj dla zatrymańnia było toje, što Natalla i Arsień stajali pobač sa ścianoju, na jakoj visieŭ zdymak Kazulina. Pa słovach zatrymanych milicyjanty praviali ŭ adsutnaść paniatych nadhlad asabistych rečaŭ, a Jahorčanku siaržant Kiślakoŭ nibyta jašče j dobra patoŭk. U pastarunku zatrymanyja praviali dźvie hadziny, ich pytalisia, što jany rabili kala partreta Kazulina. Paciarpiełyja źviarnulisia ŭ rajonnuju prakuraturu z prośbaj pravieryć pravamiernaść dziejańniaŭ milicyjantaŭ.
«Homielskaja praŭda» prynosić prabačeńni
Abłasnaja hazeta «Homielskaja praŭda» pahadziłasia biez pracedury sudovaha raźbiralnictva apublikavać abviaržeńnie abraźlivych źviestak u dačynieńni da staršyni Homielskaj haradzkoj arhanizacyi Ab`iadnanaj hramadzianskaj partyi Andreja Tołčyna. Hetyja źviestki byli nadrukavanyja naprykancy minułaha hodu ŭ artykule «A vy, druźja, kak ni saditieś…» za aŭtarstvam niejkaha Piatra Kuźmina. Andrej Tołčyn źviarnuŭsia ŭ sud Čyhunačnaha rajonu z pazovam da «Homielskaj praŭdy». Sudździa Krupadzioraŭ prapanavaŭ bakam ŭrehulavać sprečku mirnym čynam. Jak vyśvietliłasia, aŭtaram taho artykułu apynułasia pradstaŭnica hazety Alena Alenčanka. Redakcyja hazety pahadziłasia apublikavać abviaržeńnie dy prynieści prabačeńnie partyjnamu aktyvistu. Ad spahnańnia z «Homielskaj praŭdy» dy aŭtara hrašovaj kampensacyi za maralnuju škodu aktyvist AHP admoviŭsia.
