U aŭtorak u Miensk zavitali kiraŭniki kamunistyčnych partyjaŭ Rasiei i Vuhorščyny Hienadź Ziuhanaŭ i Djuła Ciurmer. Abodva kamunistyčnyja lidery praviali sustrečy z Alaksandram Łukašenkam.
Na sustrečy ź Ciurmeram prezydent krainy adznačyŭ, što chacieŭ, kab biełaruska‑vuhorskija dačynieńni raźvivalisia bolš intensiŭna. Łukašenka padkreśliŭ, što ŭ Biełarusi isnuje vialikaja zacikaŭlenaść u Vuhorščynie, asabliva ŭ handlova‑ekanamičnym supracoŭnictvie. Treba adznačyć, što tamtejšaja kamunistyčna‑rabočaja partyja nia maje vialikaj vahi ŭ siabie na Radzimie, ale Djuła Ciurmer paviedamiŭ, što chutka ŭ Miensku adčynicca pasolstva Vuhorščyny.
Meta vizytu staršyni KPRF Hienadzia Ziuhanava zastajecca nie da kanca jasnaj. Na pytańnie žurnalistaŭ pra mety pajezdki Ziuhanaŭ adkazaŭ, što «zachacieŭ ubačycca z kiraŭnikom vašaj krainy, z vami, sa svaimi biełaruskimi siabrami». Lider kampartyi Rasiei mieŭ dvuchhadzinnuju sustreču z Łukašenkam, jaki zrabiŭ padčas sustrečy niekalki hučnych zajavaŭ.
Hienadź Ziuhanaŭ nieadnarazova vybačaŭsia pierad biełaruskim narodam za palityku, jakuju pravodzić rasiejskija ŭłady, beściŭ rasiejskich aliharchaŭ, jakija pravodziać antynarodnuju palityku, raskazvaŭ pra ich anekdoty, a taksama zaklikaŭ da dalejšaha abjadnańnia biełaruskaha i rasiejskaha narodaŭ.
Na lahičnaje pytańnie žurnalistaŭ, dyk z kim abjadnoŭvacca, kali ŭ Rasiei antynarodnaja ŭłada, jon adkazaŭ, što «siońnia nielha havaryć pra adnu Rasieju, ich niekalki, heta aliharchičnaja Rasieja i narodna‑patryjatyčnaja, a b raiŭ vieści abjadnańnie akurat z druhoj».
Časami zdavałasia, što Ziuhanaŭ nibyta pierachapiŭ rytoryku Łukašenki i biełaruskich dziaržaŭnych ŚMI: «Raniejšaja ceny na haz i naftu była całkam narmalnymi, kali ŭličyć, što praź Biełaruś prachodziać tysiačy kilametraŭ rasiejskich trubapravodaŭ, na terytoryi Biełarusi znachodziacca dźvie vajskovyja rasiejskija bazy, ale naša susiedka nia padymała košty na ich utrymańnie, a rasiejskija ŭłady pajšli na amaralny krok».
«Biez sajuzu Biełarusi, Ukrainy i Rasiei nia moža być histaryčnaj budučyni ŭ našych narodaŭ, ‑‑ kazaŭ Ziuhanaŭ. – Abjadnaŭšysia, my budziem mieć pałovu suśvietnych zapasaŭ presnaj vady, chvajovych lasoŭ i čarnaziomu, mienavita hetyja faktary buduć źjaŭlacca vyrašalnymi ŭ bližejšaj budučyni».
Lider KPRF skieptyčna vykazaŭsia, što da pastupovaha zbližeńnia Biełarusi z Eŭropaj. «Zachad nikoli nie lubiŭ i nie palubić Rasieju i padobnyja joj krainy. Flirt z Małdovaj, Ukrainaj, ciapier – Biełaruśsiu jany vykarystoŭvajuć z adzinaj metaj, kab pasłabić pazycyi Rasiei ŭ śviecie. Kali vy, urešcie, kupiciesia na abiacańni Zachadu, to vas mohuć čakać vielmi vialikija prablemy. Na vašym miescy ja b pieraściarohsia».
Ziuhanaŭ nazyvaŭ siabie apazycyjaneram da dziejsnaj u Rasiei ŭładzie, raskazvaŭ jak uciskajuć i nie dajuć KPRF rehistracyi ŭ mnohich rehijonach Rasiei. Pry hetym jon nie padtrymaŭ PKB, jakoj ciapier pahražaje zakryćcio. «Kalakin niekali admoviŭsia ŭdzielničać u źjeździe levych partyjaŭ, dzie my pastanavili adnavić SSSR, jon nia vykazaŭsia ŭ padtrymku Krasnaj płoščy ŭ Maskvie, jakuju chočuć razburyć. Paśla ja ŭbačyŭ Kalakina ŭ Strasburhu, kudy jon pryjechaŭ abaraniać intaresy BNF, u hetaha čałavieka niama ničoha supolnaha z kamunistyčnym i levym rucham».
Taksama rasiejski hość vykazaŭsia adnosna taho, što Rasieja hublaje pazycyi na prastory byłoha Savieckaha Sajuzu. «Heta ŭsio ad niapravilnaj palityki, jakuju pravodzić Kreml. Im nie padabajecca pamarančavaja prakaza va Ŭkrainie, mnie taksama, nie padabajecca palityka Saakašvili, ja taksama liču jaho chvorym čałaviekam, nie padabajecca pazycyja Estonii. Adnak u Rasiei zaŭsiody byli ryčahi, u tym liku i ekanamičnyja, jakimi jon moh paŭpłyvać na hetyja krainy, ale aficyjny Kreml čamuści nia robić hetaha».
Ziuhanaŭ upeŭnieny, što ŭ Rasiei absalutnaja bolšaść, aproč «žyrynoŭcaŭ» i im padobnych», vystupajuć za sajuz ź Biełaruśsiu, pry hetym jon adznačyŭ, što Biełaruś nia musić zhubić svoj dziaržaŭny suverenitet.
Akramia ŭsiaho inšaha Hienadź Ziuhanaŭ paviedamiŭ, što KPRF maje namier źniać dakumentalny film pra Piatra Mašerava, a taksama, što jon amal skončyŭ pracu nad zbornikam anekdotaŭ «Ziuhanaŭ pra miadźviedziej».
Fota Julii Daraškievič
