Što vydaść «Biełaruskaja encyklapedyja» sioleta

Vydaviectvu «Biełaruskaja encykłapiedyja» sioleta 40. Z čym pryjšło vydaviectva ŭ novy budynak i novy hod? Raskazvaje hałoŭny redaktar Hienadź Paškoŭ:

— Hod vydaŭsia napružany, ja navat skazaŭ by anamalny. Pavinny byli rychtavać adkaznyja, składanyja knihi, takija, jak dva tamy encykłapiedyi «Respublika Biełaruś», druhi tom encykłapiedyi «Vialikaje kniastva Litoŭskaje», druhi zaklučny tom hruntoŭnaj encykłapiedyi «Biełaruski falkłor», adaptavanaje vydańnie knihi Karskaha «Biełarusy», byli i cikavyja pieravydanni, naprykład, «Starynnyja siadziby Bieraściejščyny» . Takich hruntoŭnych prac było 27, a tut jašče i pierajezd. Možacie sabie ŭjavić — pieraviezci ŭsio ź piacipaviarchovaha budynka, z usimi składami, vialikaj biblijatekaj, meblaj. Novaje miesca treba było telefanizavać, śviatło praviesci. Davodziłasia prykładvać čysta fizičnyja namahanni, tamu peŭnym čynam pierajezd prypyniaŭ tvorčy praces, a na stvareńnie encykłapiedyčnych vydańniaŭ patrabujecca bahata času. Tak što na novym miescy raskačvacca nie vypadaje — treba nahaniać upuščanaje.

Hienadź Piatrovič vielmi ŭdziačny kiraŭnictvu Uzbrojenych sił Biełarusi, Dziaržaŭnaha kamiteta pahranvojskaŭ, Ministerstva ŭnutranych spraŭ, jakija dapamahli padčas pierajezdu i transpartam, i ludźmi.

Na maju prośbu nazvać samy cikavy sioletni prajekt vydaviectva Hienadź Piatrovič adkazaŭ tak: «U siam'i ŭsie dzieci adnolkava lubimyja, takoje ž i ŭ mianie staŭleńnie da encykłapiedyj: pracuješ nad kožnaj — i zžyvaješsia z imi». Tamu raskažam pra kožnaje dziecišča.

Adzin z samych cikavych prajektaŭ, jaki chutka pabačyć śviet (litaralna ŭ nastupnym miesiacy) — «Błakitny skarb Biełarusi» — encykłapiedyja pra aziory, kanały, reki i inšyja vadajomy našaj radzimy. Tut nam sapraŭdy jość čym pachvalicca, niezdarma Biełaruś nazyvajuć siniavokaj. Encykłapiedyja pryjdziecca daspadoby ŭsim tym, chto lubić padarožničać, zachaplajecca pryrodaj. Vydańnie bahata ilustravanaje, tut možna znajsci cikavyja źviestki pra hłybiniu vadajomaŭ i toje, jakaja ryba tam vodzicca.

Rychtujecca jašče adno vydańnie dla amataraŭ padarožžaŭ — «Turystyčnaja encykłapiedyja Biełarusi». U pieršuju čarhu jano budzie karysna tym, chto pracuje na nivie turyzmu, a zaadno i tym, chto tolki zbirajecca naviedać Biełaruś, ci mała pra jaje viedaje.

Sioleta vyjduć jašče dva tamy encykłapiedyi «Respublika Biełaruś» (samaha hruntoŭnaha i maštabnaha prajekta hoda): čaćviorty i piaty tamy vyjduć u pieršaj i druhoj pałovie hoda adpaviedna. Čarhovy, treci, tom sieryi «Pomniki histaryčnaj dumki Biełarusi» — «Biełarusy» taksama ŭbačyć śviet sioleta. Praciahniecca praca i nad sieryjaj «Harady i vioski Biełarusi», miarkujecca, jana budzie 15‑tomnaj. Minuły hod byŭ pryśviečany encykłapiedyi pra Bresckuju vobłaść. U svoj čas padobnaja sieryja vyjšła va Ukrainie, jana akazałasia vielmi zapatrabavanaj, była nadzvyčaj vysoka aceniena. «Spadziajomsia, što i naša, biełaruskaja, encykłapiedyja pra harady i vioski atrymajecca nie mienš, a moža navat bolš hruntoŭnaj».

Nie zastaniecca biez uvahi encykłapiedystaŭ i relihijnaja śfiera: čakajecca vypusk pierapracavanaha vydańnia «Pravasłaŭnyja chramy na Biełarusi» i anałahičnaha vydańnia, pryśviečanaha katalickim chramam.

U płanach jość i «Biełaruski encykłapiedyčny słoŭnik».

— Vielmi abjomnaje i adnačasova karotkaje ŭ padačy vydańnie, — tak acharaktaryzavaŭ jaho hałoŭny redaktar vydaviectva «Biełaruskaja encykłapiedyja».

Jašče adzin cikavy prajekt budzie padrychtavany ŭ supracoŭnictvie z Minskim abłvykankamam — rehijanalnaja encykłapiedyja «Minskaja vobłaść» u dvuch tamach.

— Ideja naležyć nam, abłvykankam jaje padtrymaŭ i heta vydatna, — kaža Hienadź Piatrovič. — Užo składzieny hienieralny i halinovyja słoŭniki, zaraz idzie praca nad tekstavym materyjałam, prystupili da mastackaha afarmleńnia.

Hałoŭny redaktar vydaviectva «Biełaruskaja encykłapiedyja» ŭ dadatak da niastomnaj pracy nad encykłapiedyčnymi vydańniami paśpiavaje jašče i tvaryć. Jaho tvorčaja skarbonka papoŭniłasia letaś paetyčnym zbornikam «Tvaim śviatłom błasłaviony», akramia taho nizki jaho vieršaŭ byli nadrukavany na staronkach časopisaŭ «Połymia», «Maładość», «Nioman» i haziety «Litaratura i mastactva». Pavodle pryznańnia samoha Hienadzia Piatroviča pracuje jon nad tym, što laža na dušu. Słavutaje «ni dnia biez radka» — vidać, dla prazaikaŭ, a nie dla paetaŭ. Miarkuje, što tvory, jakija pišucca marudna, z dnia ŭ dzień, i čytajucca taksama nialohka. Paezija, ličyć Hienadź Paškoŭ, pavinna stvaracca na adnym dychanni.

Pažadajem ža Hienadziu Piatroviču prafiesijnych pośpiechaŭ i tvorčych «uźlotaŭ» dla śvietłaj, dušeŭnaj paezii!

• 0
• 0
• 0
• 0
• 0
• 0
• 0
• 0