Dzie jašče pakłaści plitku ŭ Horadni

Hramadzkija dziejačy Horadni z sumnievam stavicca da inicyjatyvaŭ uładaŭ rekanstrujavać horad. Źjaŭlajucca prapanovy dziejničać bolš radykalna.

Ministerstva architektury i budaŭnictva dasłała adkaz na zvaroty hramadzianaŭ, zakłapočanych chadoj rekanstrukcyi histaryčnaha centru Horadni. List padpisany namieśnikam ministra Ł. Sakałoŭskim. Pavodle piśma, praviadzieńnie pracaŭ adbyvajecca etapna, što nie praduhledžvaje ŭ bližejšaj perspektyvie abmiežavańnia transpartnaj nahruzki ŭ centry Horadni, i tamu vyklikaje «peŭnuju zakłapočanaść». Adznačajecca taksama, što vykanańnie budaŭničych rabotaŭ u centry horadu nie supiarečyć zakanadaŭstvu ab achovie historyka‑kulturanaj spadčyny.

U vyniku Ministerstva rekamendavała Haradzienskamu abłvykankamu arhanizavać hramadzkaje abmierkavańnie detalovaha planu rekanstrukcyi horadu.

Adkaz ź ministerstva vyklikaŭ nehatyŭnuju reakcyju siarod tych haradziencaŭ, što ad samaha pačatku rekanstrukcyi horadu baroniać jaho ad razbureńniaŭ. Na haradzienskich sajtach paviedamleńnie pra ministerskija rekamendacyi kamentujuć, jak adpisku i sprobu pierakłaści adkaznaść na hramadzkaść. Haradziency sumna žartujuć, što pa‑prostu haradzkija ŭłady ŭžo nia viedajuć, dzie jašče pakłaści plitku, tamu i chočuć paraicca z narodam. A dla hetaha vykarystajuć aficyjnyja haradzkija ŚMI i mierkavańnie «kanstruktyŭnych» hramadzianaŭ.

Tym časam aŭtar adnaho z haradzienskich sajtaŭ zaklikaje da bolš radykalnych dziejańniaŭ u spravie vyratavańnia horadu. Jon ličyć biessensoŭnymi ŭsialakija formy apelacyi da aficyjnych uładaŭ i prapanuje kankretnyja dziejańni: vyviešvańnie na doškach abjavaŭ partretaŭ adkaznych za razbureńni čynoŭnikaŭ, uskładańnie kvietak, zapalvańnie śviečak i raźmiaščeńnie fotazdymkaŭ na miescy razburanaha ŭ minułuju vosień budynku ŭ styli kanstruktyvizmu, a taksama raspaŭsiud infarmacyi pra parušeńnie zakanadaŭstva ab achovie kulturna‑histaryčnaj spadčyny.

Historyk Andrej Vaškievič padzialaje ahulnaje mierkavańnie pra list ź ministerstva. «Heta chutčej adpiska, a jašče sproba apelacyi da hramadztva, kab samym zastacca ŭ baku» – kaža historyk. Pa jaho słovach, nieadnarazovyja sproby naładzić šyrokaje abmierkavańnie ŭvieś čas sutykajucca ź ihnaravańniem z boku ŭładaŭ. Najbolš jaskravy prykład – razbureńnie budynku na vuł. Horkaha. Tady byli sabranyja nieabchodnyja dakumenty i bolš za 600 podpisaŭ za nadańnie budynku statusu pomnika. Haradzienski historyk admoŭna stavicca da radykalnych metadaŭ uździejańnia na ŭładu: «Tak možna naškodzić tolki samomu sabie». Na jaho dumku, adzinaje, što možna rabić u hetaj sytuacyi – aktyŭna infarmavać nasielnictva. U chutkim časie hrupa haradzienskich historykaŭ, krajaznaŭcaŭ i horadabudaŭnikoŭ pradstaviać prajekt abjaznoha maršrutu, što maje źmienšyć transpartnuju nahruzku na centar horadu.

Apošnija padziei vakoł rekanstrukcyi Horadni padrabiazna apisvajucca ŭ artykule, raźmieščanym u hazecie «Trud‑7». U im archieolah, staršynia TBM Aleh Trusaŭ zakranaje balučuju temu hramadzkaj śviadomaści. Na jaho dumku, u časy «Pachodni» Michasia Tkačova dy Alaksandra Milinkieviča na pasadzie vice‑mera, takoha nie adbyvałasia. Pakul nia budzie novaj «Pachodni», niefarmalnaha lidera, pakul intelihiencyja nie pačnie pracavać z narodam – ničoha nia budzie, ličyć sp. Trusaŭ.

• 0
• 0
• 0
• 0
• 0
• 0
• 0
• 0