Ad Biełarusi pajechała 21-hadovaja hamialčanka Naścia Charłanava.
Lepšuju dziaŭčynu śvietu vybieruć u Łondanie, mienavita tam sioleta prachodzić konkurs. U konkursie prymajuć udzieł 122 krainy, u tym liku i Biełaruś.
Biełaruś, jakaja ŭ sioletnim konkursie ŭdzielničać nie płanavała, usio ž pieradumała i delehavała ŭ Łondan Anastasiju Charłanavu, druhuju vice-misBiełaruś-2010.
Naści 21 hod, jana studentka piataha kursa mašynabudaŭničaha fakulteta Homielskaha dziaržaŭnaha techničnaha ŭniviersiteta imia P. Suchoha.
Dziaŭčyna dobra vałodaje anhlijskaj movaj, u volny čas zajmajecca valejbołam, śpievami i ihroj na fartepijana.
U svajoj ankiecie na aficyjnym sajcie konkursu Anastasija raspaviała, što
choča stvaryć dabračynny fond dapamohi dzieciam, chvorym na lejkiemiju.
— Spadziajusia, tytuł «Mis śvietu» zmoža dać mnie impuls na realizacyju hetaha prajekta, — pryznajecca dziaŭčyna.
Siarod pramiežkavych spabornictvaŭ (konkurs talentaŭ, spartyŭny konkurs i h.d.) biełaruska ŭvajšła ŭ Top-32 lepšych na konkursie «mis plaž», adnak prabicca ŭ Top-20, jakija vychodziać u paŭfinał, našaj ziamlačcy nie ŭdałosia. U spartyŭnym konkursie, dzie ŭsie dziaŭčaty byli raździeleny na hrupy i kožnaja hrupa atrymała svoj koler, pieramahła błakitnaja hrupa — taja, u jakoj była i pradstaŭnica Biełarusi.
Zhodna z praviłami, u paŭfinał konkursu vyjduć pieramožcy 15-ci pramiežkavych mini-konkursaŭ. Imiony jašče piaci paŭfinalistak žury nazavie dadatkova.
— Volnaha času niama zusim: kožnuju chvilinu treba kudyści biehčy, štości repieciravać, — piša ŭ svaim internet-dziońniku biełaruskaja pryhažunia. — Naprykład, u piatnicu prachodziŭ adbor na lepšy nacyjanalny taniec u narodnym kaściumie. Numar prydumała napiaredadni viečaram litaralna za try hadziny — i, na majo vialikaje ździŭleńnie, apynułasia ŭ dvaccatcy lepšych. Nie čakała! Ale ŭ vyniku tancavać na samim šou buduć tolki šeść dziaŭčat: jany sapraŭdy cudoŭna ruchalisia. Chtości ź ich — chareohraf, chtości — prafiesijnaja tancoŭščyca. Tak što na finalnym šou budzie vielmi cikava.
