Pikantny tenis

U staličnym futbolnym manežy, što na praspekcie Pieramožcaŭ, siońnia pačynajecca matč 1/8 finału tenisnaha Kubku Devisa pamiž zbornymi Biełarusi i Švecyi. Kamanda našaj krainy čaćviorty raz startuje ŭ elicie suśvietnaha tenisu. Najlepšym byŭ vynik 2004 h., kali biełarusy sensacyjna pieramahli ŭ rodnych ścienach bolš daśviedčanych rasiejcaŭ i arhientyncaŭ i vyjšli ŭ paŭfinał, ale tam nie zmahli dać rady mocnaj zbornaj ZŠA.

Švedy źjaŭlajucca siamirazovymi ŭładalnikami «srebranaj sałatnicy». Ich najlepšyja vyniki švedzkaha tenisu datavanyja 1980‑mi. Tady švedaŭ za saboj viali zornyja Stefan Edberh i Mats Viłander, druhi ciapier źjaŭlajecca kapitanam švedzkaj kamandy. Apošni raz Kubak Devisa naščadki vialikaha siabra biełaruskaha naroda Karda CHII zavajoŭvali ŭ 1998 h. Siarod pieramožcaŭ taho finału — Junas Bjorkman, jaki sioleta pryjechaŭ u Miensk.

Zbornuju Biełarusi ŭžo druhi dziasiatak hadoŭ za saboj viaduć dva jaje niaźmiennyja lidery – Maks Mirny i Ŭładzimier Vaŭčkoŭ. Mirny zaraz znachodzicca ŭ cudoŭnaj formie, što dakazaŭ niadaŭni rozyhryš «Aŭstralijan Oŭpen», dzie biełarus dajšoŭ da finałaŭ u parnym i mikstavym razradach. Niabłaha pakazaŭ siabie Mirny i ŭ adzinočnym razradzie. Siońnia biełarus zajmaje ŭ rejtynhu ATP 55‑y radok. Što da Vaŭčkova, to apošnija hady jon navat nia ŭdzielničaje ŭ turnirach seryi ATP, što adlustravałasia na jahonym rejtynhu - Vaŭčkoŭ zajmaje tolki 730‑ie miesca.

Z Rasiei ŭ zbornuju byŭ rekrutavany 24‑hadovy Pavał Ivanoŭ, jaki ŭ suśvietnych rejtynhach zajmaje miesca značna vyšejšaje za Vaŭčkova, adnak pra zamienu druhoha numaru pakul havorka nie viadziecca.

Asablivaju pikantnaść matču nadaje toj fakt, što suprać zbornaj Biełarusi syhraje pastajanny partner Mirnaha ŭ parnym razradzie Junas Bjorkman. Para Mirny – Bjorkman u rejtynhu ATP zajmaje druhoje miesca.

Pierad sustrečaj u maeježy było źmienienaje pakryćcio, bo stary «Terafleks» užo nie adpaviadaŭ normam. Chutkaje pakryćcio – heta adzin z hałoŭnych kozyraŭ našaj kamandy. Praŭda, švedy taksama nadta lubiać chutkija korty.

Jak paviedamlaje sajt «Komsomolskoj pravdy v Biełoruśsii», adrazu paśla losavańnia Maksim Mirny zaprasiŭ švedzkich haściej va ŭłasny restaran. Vaŭčkoŭ i inšyja pradstaŭniki biełaruskaj kamandy abiedali ŭ inšym miescy.

Pierad pačatkam matču šancy kamand razhladajucca jak roŭnyja. Na karyść švedaŭ bolš vysoki rejtynh, a za biełarusaŭ – rodnyja ścieny, u jakich jany prajhravali tolki adzin raz. Švedzkaja presa strakacić zahałoŭkami kštałtu: «Aściarožna! Biełaruś u Kubku Devisa», tamu pra niedaacenku našaj kamandy havorki być nia moža.

U kasach zastalisia tolki kvitki za 80 i 100 tys. rubloŭ. Bolš tannyja razyšlisia miž rabočymi zavodaŭ — pradpryjemstvy, jak i na Kaladnym chakiejnym turniry na pryzy prezydenta, prymušajuć vykupić kvitki. Tranślavać Kubak Devisu budzie telekanał ANT.

RASKŁAD HULNIAŬ

9 lutaha (pačatak a 15:00)

Uładzimier Vaŭčkoŭ – Robin Sioderlinh, Maks Mirny - Tomas Juchansan.

10 lutaha (pačatak a 15:00)

Mirny/Vaŭčkoŭ – Junas Bjorkman/Siman Aspelin.

11 lutaha (pačatak a 13:00)

Mirny – Sioderlinh, Vaŭčkoŭ – Juchansan.

• 0
• 0
• 0
• 0
• 0
• 0
• 0
• 0