Miljanier atrymaŭ lhoty na budaŭnictva «La Trajeckaha», adnak svaje abaviazki nie vykanaŭ.
Situacyju, jakaja skłałasia vakoł čarhovaha budaŭnictva «Trajpła» ŭ Minsku, inačaj čym jurydyčnaj zahadkaj nie nazavieš. Atrymaŭšy ŭkazam kiraŭnika dziaržavy peŭnyja lhoty, miljanier Juryj Čyž tym nie mienš nie śpiašajecca vykonvać svaje abaviazki, praduhledžanyja tym samym ukazam.
Ale pra ŭsio pa paradku. U 2009 hodzie ŭ samym centry Minska pačałosia budaŭnictva hihanckaha kompleksa «La Trajeckaha». Zabudoŭščykam vystupiła kampanija «Trajpł». Prablem ź finansavańniem kampanija nie mieła —
choć kvadratny mietr elitnaha doma kaštavaŭ kala $2500, bolšaść kvateraŭ byli pradadzienyja adrazu.
Adnak uładalnik «Trajpła» Juryj Čyž atrymaŭ nie tolki darahi kavałak ziamli ŭ centry horada. U vieraśni 2009 hoda dziaržava vyrašyła dapamahčy jamu dadatkova. Łukašenka svaim ukazam № 460 parekamiendavaŭ minskim uładam adsialić žycharoŭ damoŭ, jakija musili iści pad znos, za svoj košt. Uzamien na «Trajpł» nakładalisia i peŭnyja dadatkovyja abaviazacielstvy. Hałoŭnaje ź ich —
budaŭnictva krytaha katka ŭ składzie studenckaj vioski na praśpiekcie Dziaržynskaha ŭ Minsku i pieradača jaho na bałans Minharvykankama.U skład spartyŭnaha kompleksa musili ŭvachodzić dźvie ladovyja placoŭki, arena z trybunami dla hledačoŭ, zał fitnesa, trenažorny zał i inšyja pamiaškańni. U dakumiencie ŭkazana, što
abjekt pavinien być uviedzieny ŭ ekspłuatacyju da kanca 2011 hoda.
Ukaz ustupiŭ u siłu, nie asprečvaŭsia ŭ sudzie, tamu abaviazkovy dla vykanańnia. Budoŭla «La Trajeckaha» idzie poŭnym chodam, niahledziačy na kryzis, a voś «studenckaje» budaŭnictva zaciahvajecca. Zrešty, jano faktyčna i nie pačynałasia, choć termin zdačy skančvajecca praz paru dzion. Ščyra kažučy, marudzić nie tolki Čyž — adkłałasia realizacyja ŭsiaho prajektu moładzievaj vioski.
Voś tolki jak być z ukazam kiraŭnika dziaržavy?
Jon nie admienieny, u jaho nie ŭnosilisia źmieny, značycca, ladovaja arena nibyta musić być zdadzienaja da kanca hetaha hoda.
U adździele architektury i horadabudaŭnictva Maskoŭskaha rajona kažuć, što terminy nasamreč byli pieraniesienyja. Aficyjnaja farmuloŭka — «pierahlad prajektnych rašeńniaŭ z metaj aptymizacyi i patanieńnia koštu abjekta».
Ci pryviadzie parušeńnie ŭkaza kiraŭnika dziaržavy da niejkaha pakarańnia «Trajpła»? Tamu što pakul situacyja vyhladaje nastupnym čynam —
Čyž uziaŭ łasaje miescy ŭ centry Minska i dadatkovyja lhoty, a ŭzamien nie daŭ ničoha.
«Asobnaj adkaznaści za nievykanańnie prezidenckich ukazaŭ ŭ zakanadaŭstvie niama, — kaža juryst Siarhiej Zikracki. — Kali va ŭkazie dadatkova nie ŭkazanaja adkaznaść, to na jaho raspaŭsiudžvajucca normy kryminalnaha i administratyŭnaha kodeksa.
Z adnaho boku,
ukaz vyznačaje kankretnuju datu i, kali padychodzić da jaho farmalna, dla taho, kab jaje źmianić, patrebna pryniać novy ŭkaz.Ź inšaha boku, kali była zaklučanaja inviestycyjnaja damova, Minharvykankam, jaki dziejničaŭ u takoj situacyi ad imia Respubliki Biełaruś, maje prava ŭnosić źmieny ŭ jaje. I tady rašeńnie mahło b być zakonnym. Bolš za toje, treba hladzieć na padstavy, pavodle jakich było byli pieraniesienyja terminy. Moža, jany nie byli vytrymanyja pa vinie Minharvykankama, jaki, naprykład, svoječasova nie pradastaviŭ terytoryju».
Kamientary