Litoŭski pasoł atrymaŭ pryvileju telefanavać Łukašenku ŭ luby čas
Aficyjnyja medyi tryjumfujuć: Litva hatovaja stać advakatkaj Biełarusi ŭ Bruseli! Kamentuje ŭ svaim błohu Alaksandar Kłaskoŭski.
Aficyjnyja medyi tryjumfujuć: Letuva hatovaja stać advakatkaj Biełarusi ŭ Bruseli! Tak, maŭlaŭ, skazaŭ siońnia na presavaj kanferencyi ichni novy ambasadar Bahdonis.
Praŭda, pavodle versii radyjo "Svaboda", pasaž hučaŭ tak: "Jak siabar Eŭraźviazu my padtrymlivajem jahonuju palityku i ciapier čakajem kankretnych prapanovaŭ ad Biełarusi. I kali takija prapanovy źjaviacca, my chočam pačuć ich pieršymi i być u Eŭropie vašymi pieršymi advakatami".
Zhadziciesia, jość roźnica. Brusel čakaje ad biełaruskaha kiraŭnictva palityčnych sastupak (džentlmenski nabor viadomy, paŭtarać nia budziem). Prapahanda ž padaje spravu tak, nibyta Eŭropa schamianułasia i, asensavaŭšy tranzytnuju vahu Biełarusi, jaje vyklučnuju rolu ŭ bieśpierabojnym zabieśpiačeńni Staroha Śvietu enerhanośbitami, sama stała rabić pierad Mienskam reveransy.
Bolej cikavaja zajava Bahdonasa pra toje, što jahonaja kraina razhladaje mahčymaść transpartavać praz svaju terytoryju naftu dla Biełarusi (pamiatajecie, pra pošuk alternatyvaŭ takoha kštałtu išła havorka na vialikaj naradzie ŭ Navapołacku. Tady zhadvaŭsia najpierš łatyski Ventśpiłs.).
Pra mahčymaść paspryjać Biełarusi ŭ halinie enerhabiaśpieki zajaviŭ i letuviski prezydent Adamkus padčas vizytu ŭ Vašynhton.
Pakul što schiema abmiarkoŭvajecca, treba razumieć, u samych ahulnych rysach. Va ŭsiakim razie, nichto nie pryvodzić ekanamičnych raźlikaŭ. Ci nie atrymajecca toje alternatyŭnaje čornaje zołata sapraŭdy na vahu zołata?
Ale strachu na Maskvu nahnać možna. U sietkavych miedyjach zajava Adamkusa (jaki zhadaŭ jašče i Kijeŭ) padajecca pad emacyjnymi šapkami kštałtu "Biełaruś pačała siabravać suprać Rasiei ź Letuvoj i Ŭkrainaj".
Da siabroŭstva peŭna ž jašče daloka, ale fakt toje, što z ukraincami sapraŭdy pačali pracavać davoli ščylna. Biaz šumu i pyłu parafiravany ŭžo prajekt enerhietyčnaha memarandumu ź Kijevam. U pryvatnaści, Biełaruś hatovaja pradastavić svaju hazatranspartnuju systemu dziela pierapampoŭki ichniaha błakitnaha paliva. Peŭna ž u Miensku chočuć, kab chutki vizyt Łukašenki ŭ Kijeŭ uviančaŭsia efektnymi damoŭlenaściami ŭ piku Maskvie.
Adno što varta było ŭsio heta rabić značna raniej. I nia ŭ piku niekamu, a prosta pavodle pastulataŭ enerhietyčnaje biaśpieki. Ci nie hałoŭny ź ich — nikoli, ni ŭ jakim razie, ni pad jakoj markaj (uklučna z "bratniaj intehracyjaj") nie pryviazvacca da adnaho dastaŭnika!
I voś žyćcio prymusiła ajčynnych načalnikaŭ zasvoić hetuju azbuku. Zaraz ułada lichamankava robić toje, pra što daŭno dziaŭbli jaje apanenty (abzyvanyja zdradnikami dy piataj kalonaj).
Zrešty, lepiej pozna, čym nikoli.
Naturalna, Letuva jak susiedka maje padvyšany intares da Biełarusi. U jaje palitykaŭ — miarkuju i pa asabistych kantaktach — dastatkova ambicyjaŭ, kab Vilnia pretendavała na asablivuju rolu ŭ rehijonie. Plus (a moža i najpierš) mierkavańni biznesu.
Adnak spadziavacca, što Brusel dazvolić Vilni vialikija impravizacyi ŭ padychodach da biełaruskaha pytańnia, nie vypadaje.
Miž tym, sa słoŭ sp.Bahdonasa, Łukašenka prapanavaŭ jamu: "Telefanujcie mnie ŭ luby čas".
"Adnak ja nia zmoh paprasić u jaho numar mabilnaha telefona", — nie biaz humaru reziumavaŭ ambasadar.
Kryŭdna budzie, kali praz takuju drobiaź zabuksuje čakany dyjaloh :)
Kamientary