Umovy ŭtrymańnia ŭ kałonijach — fota 9

Sajt belarus.avtonom.org raskazaŭ, u jakich umovach utrymlivajucca ŭ kałonijach źniavolenyja. U pryvatnaści, palitviaźni-anarchisty Ihar Alinievič, Mikałaj Dziadok, Pavieł Syramałotaŭ, Arciom Prakapienka, Alaksandr Franckievič, Jaŭhien Vaśkovič.

Interjer Vaładarki

Kubryk

Aryštavanyja na špacyry

Šviejnaja vytvorčaść

Płakat u kałonii

Turma i kałonija

Takim čynam, pačniem z paniaćciaŭ «turma» i «kałonija». Heta nie adno i toje ž. Turma — zakrytaja papraŭčaja ŭstanova z kamiernaj sistemaj utrymańnia; niešta padobnaje da SIZA, ale z bolš strohim režymam. Źniavolenym zabaroniena pakidać kamiery, za vyklučeńniem štodzionnych karotkich špacyraŭ.

U turmach nie pracujuć, siadziać pa 4–10 čałaviek u kamiery, amal va ŭsich kamierach jość televizar, časta DVD.

Pavodle pastanovy načalnika turmy i sa zhody prakurora źniavolenych mohuć pieravodzić u adzinočnyja kamiery. U turmu zvyčajna traplajuć tyja, chto ŭčyniŭ asabliva ciažkija złačynstvy, recydyvisty i tyja, chto parušaŭ režym utrymańnia ŭ kałonii.

Kałonija — heta bolš adkrytaja vypraŭlenčaja ŭstanova, dzie źniavolenyja rasfarmavanyja pa atradach i siektarach, kudy ŭvachodzić niekalki sumiežnych atradaŭ, jak u vajskovaj sistemie. Niepasrednaje «miesca žycharstva» ŭ kałonii nazyvajecca kubryk — heta taksama svajho rodu kamiera, ale

pamiaškańnie bolš padobnaje da balničnaj pałaty — ścieny abklejenyja špalerami, na voknach niama hłuchich krataŭ, visiać štory.

Za kožnym atradam zamacavany dvoryk na adkrytym pavietry — «łakałcy», dzie možna hulać, razmaŭlać, kuryć. Možna chadzić u hości da źniavolenych ź inšych atradaŭ pa zajaŭnaj sistemie. Źniavolenyja pryciahvajucca da pracy i kožny dzień naviedvajuć «promku» — vytvorčy adsiek kałonii. U kałonii jość DK, spartyŭnyja placoŭki.

Režym

Jašče adno važnaje adroźnieńnie — režym utrymańnia: ahulny, uzmocnieny, strohi i śpiecyjalny — u kałonijach, ahulny i strohi — u turmach. Źniavolenyja z ahulnym i ŭzmocnienym režymam mohuć utrymlivacca razam, źniavolenyja sa strohim režymam zvyčajna adbyvajuć pakarańnie ŭ śpiecyjalnych kałonijach strohaha režymu.

Ahulny i ŭzmocnieny režym adroźnivajecca tolki kolkaściu spatkańniaŭ, pieradač, sumaj, dazvolenaj dla zakupki pradmietaŭ pieršaj nieabchodnaści, a taksama terminami pradstaŭleńnia mahčymaści zamieny pakarańnia na bolš miakkim abo na ŭmoŭna-daterminovaje vyzvaleńnia (UDV).

Mikałaj Dziadok siadzić na ahulnym režymie i maje prava na 4 pieradačy abo pasyłki, 2 banderoli, 3 praciahłych (da 3 sutak) i 3 karotkaterminovych (da 4 hadzin) spatkańni sa svajakami, 1 rečavuju banderol, 2 knižnyja banderoli i nieabmiežavanuju kolkaść miedycynskich banderolaŭ ŭ hod. Taksama dla ahulnaha režymu dazvolena vydatkoŭvać nie bolš jak 210 000 rubloŭ u miesiac, ale za parušeńni režymu Mikałaj ciapier maje prava atavarvacca tolki na 35 000 u miesiac.

Astatnija chłopcy (Ihar Alinievič, Alaksandr Franckievič, Arciom Prakapienka, Pavieł Syramałotaŭ) adbyvajuć pakarańnie va ŭmovach uzmocnienaha režymu i majuć prava na 3 pieradačy i pasyłki, 2 praciahłych, 3 karotkaterminovych spatkańni, 1 rečavuju pieradaču, 2 knižnyja i nieabmiežavanaja kolkaść miedycynskich banderolaŭ u hod.

Suma atavarki — da 175 000 rubloŭ u miesiac, adnak dla Ihara Alinieviča jana ŭstalavanaja ŭ pamiery 70 000, bo jon pavinien pakryć škodu kala 100 młn rubloŭ za spalenuju pasolskuju mašynu. Takim čynam administracyja kałonii sprabuje matyvavać svajakoŭ asudžanych vypłačvać pazoŭ uzamien na adnaŭleńnie zakonnych pravoŭ źniavolenych.

Jaŭhien Vaśkovič, jaki byŭ pieraviedzieny ŭ turmu № 4 h. Mahilova za šmatlikija parušeńni režymu na 3 hady, utrymlivajecca na ahulnym režymie i maje prava na 2 karotkaterminovych spatkańni, 1 pasyłku abo pieradaču i 2 banderoli, štodzionnuju prahułku da 1,5 hadzin i moža vydatkoŭvać na atavarku da 70 000 rubloŭ.

Praca, navučańnie

Jak užo zhadvałasia vyšej, źniavolenyja pryciahvajucca da pracy. U kałonijach naładžanaja vytvorčaść roznaj skiravanaści — ad pašyvu śpiecadzieńnia da vytvorčaści jakasnaj mebli.

№ 10 h. Navapołack (Ihar Alinievič) — drevaapracoŭka, myła haspadarčaje, polietylen, ćviki.

№ 15 pas. Viejna Mahiloŭskaj vobł. (Mikałaj Dziadok) — mietałaapracoŭka i trochi drevaapracoŭka.

№ 17 pas. Maładziožny Škłoŭskaha r-na (Pavieł Syramałotaŭ) — šviejnaja i abutkovaja vytvorčaść, drevaapracoŭka (zruby).

№ 19 Mahiloŭskaja vobł. (Arciom Prakapienka) — drevaapracoŭka, ćviki, łancuhi.

№ 22 p. Vaŭčynyja Nory Ivacevickaha r-na (Alaksandr Franckievič) — drevaapracoŭka.

Turma № 4 Mahiloŭ (Jaŭhien Vaśkovič) — niekalki kamier šyjuć šapki, astatnija nie pracujuć.

Atrymlivajuć źniavolenyja zvyčajna pa 7–15 tysiač u miesiac paśla vyliku vydatkaŭ na ŭtrymańnie. Adpracavany čas zaličvajecca ŭ pracoŭny staž.

Źniavolenym taksama moža być dadzienaje prava atrymać rabočuju śpiecyjalnaść u VK, h.zn. skončyć PTV na bazie kałonii. Mikałaj Dziadok i Ihar Alinievič padavali dakumienty na navučańnie, adnak z roznych pryčynaŭ im było admoŭlena.

Zamiena pakarańnia, UDV

Pa zakonie lubomu viaźniu dajecca mahčymaść vyzvalicca daterminova ci pajści na zamienu nieadbytaj častki pakarańnia bolš miakkim. Zamiena pakarańnia — heta faktyčna pieravod źniavolenaha na inšyja ŭmovy adbyvańnia pakarańnia albo ŭ ramkach adnoj kałonii abo turmy (sa strohaha na ŭzmocnieny, z ŭzmocnienaha na ahulny), albo pazbaŭleńnie voli zamianiajecca abmiežavańniem voli z nakiravańniem u papraŭčyja ŭstanovy («chimija») i biez nakiravańnia («chatniaja chimija»), papraŭčymi rabotami i h.d.

Padstavaj dla zamieny pakarańnia źjaŭlajecca toje, što asudžany ćviorda staŭ na darohu vypraŭleńnia, a umovaj zamieny — toje, što im faktyčna adbytaja peŭnaja častka pakarańnia. U kałonii ahulnaha režymu dla pradstaŭleńnia na zamienu nieabchodna adbyć tracinu pakarańnia, u kałonii ŭzmocnienaha režymu — pałovu. Naprykład,

u Mikałaja Dziadka i Alaksandra Franckieviča termin zamieny padychodzić ŭžo 3 sakavika 2012, u Syramałotava, Vaśkoviča i Prakapienki — 17 lipienia 2014 h., u Ihara Alinieviča — 29 listapada 2014.

Adnak kab być acharaktaryzavanam jak toj, chto «ćviorda ŭstaŭ na darohu vypraŭleńnia», treba dać abaviazańnie ab pravapasłuchmianych pavodzinach, dobrasumlenna stavicca da pracy, navučańnia, vykonvać raboty pa samaabsłuhoŭvańni, nie mieć spahnańniaŭ ciaham 6 miesiacaŭ, udzielničać u pracy samadziejnych arhanizacyj i inš. Na dadzieny momant niama źviestak ab tym, što chto-niebudź z palitźniavolenych byŭ acharaktaryzavany takim čynam.

Dla ŭmoŭna-daterminovaha vyzvaleńnia treba mieć usie vyšejpieraličanyja ŭłaścivaści, plus adbyć pałovu terminu na ahulnym režymie i 2/3 terminu na ŭzmocnienym režymie. Pry UDV źniavolenaha vyzvalajuć, ale jon znachodzicca pad nahladam miascovaha orhana ŭnutranych spravaŭ da kanca terminu.

Termin UDV Franckieviča — 3 vieraśnia 2012, Dziadka — 3 śniežnia 2012, Syramałotava, Vaśkoviča, Prakapienki — 17 vieraśnia 2015, Alinieviča — 29 sakavika 2016.

Administracyja kałonii i kamisija, prymajučy pad uvahu pavodziny asudžanaha, vyrašaje, ci možna jamu rabicca paŭnapraŭnym členam hramadstva. Chočacca adznačyć, što vielmi mała źniavolenych vyzvalajucca pa UDV, asabliva ŭ VK-15 i VK-10; bolš za toje, kamisija adnaznačna budzie dziejničać pa zahadzie źvierchu.

Amnistyja

Raz na niekalki hadoŭ vychodzić zakon ab amnistyi.

Pa im mnohija źniavolenyja traplajuć pad pamianšeńnie terminu źniavoleńnia na 1 hod.

Adnak amnistyja nikoli nie zakranaje asudžanych pa art. 218.3 (Alinievič, Syramałotaŭ, Vaśkovič, Prakapienka). Apošniaja amnistyja była ŭ 2010 hodzie.

abc-belarus.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH