Viaźnia 5-j Ivacevickaj kalonii Mikałaja Aŭtuchoviča 17 studzienia čakaje hetki ž sud, jaki ŭčora pakaraŭ tryma hadami turemnych umovaŭ Mikałaja Statkieviča. Ciapier były pradprymalnik Aŭtuchovič — u medyčnaj častcy kalonii, pryčym ź jakoj pryčyny jon tudy trapiŭ, svajaki i advakaty nia viedajuć. Były advakat Pavał Sapiełka kaža:
«Pra heta stała viadoma dosyć vypadkova — niechta z kalonii pazvaniŭ jahonym svajakam. Paćvierdziłasia infarmacyja, što 17 studzienia budzie razhladacca sprava Aŭtuchoviča adnosna źmieny režymu ŭtrymańnia.Stavicca pytańnie pra źmienu režymu ŭtrymańnia z kalonii na turmu. Aŭtuchoviča budzie abaraniać advakat, ja pasprabuju trapić na hety praces, ale kali praces budzie ŭ samoj kalonii, to, chutčej za ŭsio, jaho zrobiać zakrytym i mianie nie dapuściać».
Pavał Sapiełka nia viedaje, čym zachvareŭ Mikałaj Aŭtuchovič, jakoha źmiaścili ŭ medyčnuju častku.
Były advakat Aŭtuchoviča kaža, što taho izalavali nia tolki fizyčna, ale i infarmacyjna: «Listavańnie pamiž nami faktyčna spyniłasia. Doŭhi ŭžo čas jahonyja listy nie dachodziać da mianie, a maje — da jaho. Mahčymaści telefanavać u jaho taksama bolš niama.Takim čynam, karystajemsia tolki tym, što niechta pieradaje ŭ troch słovach infarmacyju ad mianie — jamu, ad jaho — mnie».
Karespandent: «Jakim budzie turemny režym dla Aŭtuchoviča, kali takoje rašeńnie budzie pryniata?»
«Jaho amal pazbaviać prahułak na śviežym pavietry, jon amal uvieś čas budzie znachodzicca ŭ kamery. Doŭhaterminovych spatkańniaŭ u jaho taksama nia budzie, tolki karotkaterminovyja sa svajakami. Abmiažujuć kolkaść pieradač i pasyłak i abmiažujuć mahčymaść nabyvać charčy ŭ turemnaj kramie za bieznajaŭny raźlik».
Pavodle Paŭła Sapiełki, u Biełarusi try hetak zvanyja «krytyja» turmy — u Harodni, Mahilovie i Žodzinie. Były advakat Aŭtuchoviča miarkuje, što taho adpraviać, chutčej za ŭsio, u Haradzienskuju turmu, jakaja bližej da Ivacevickaj kalonii.
Čamu palitviaźniaŭ usio bolš nastojliva namahajucca izalavać? Były kandydat na prezydenta Andrej Sańnikaŭ znachodzicca ŭ Viciebskaj 3-j kalonii, jaho trymajuć u adzinočnaj kamery. Žonka palitviaźnia Iryna Chalip kaža, što ničoha nia viedała pra ŭmovy, u jakich siadzić jaje muž, i nie daviedałasia pra heta z apošniaha lista, jaki atrymała dniami. «Andrej padrabiazna napisaŭ pra toje, jak treba palivać kvietki ŭ našaj kvatery, a pra siabie ničoha. Razumieju tak, što jamu zabaranili pisać choć niešta pra siabie i jon adpraviŭ hety list z adnoj metaj — kab zaśviedčyć, što žyvy», — kaža Iryna Chalip. Jana miarkuje, što hramadztva śviadoma izalujuć ad infarmacyi pra jaje muža, kab ścišyć chvalu pratestaŭ i mižnarodnaj padtrymki palitviaźniaŭ.
U Hłybockaj kalonii ŭ PKT da krasavika budzie znachodzicca i lider «Maładoha frontu» Źmicier Daškievič. Jahonaja niaviesta Nasta Pałažanka, jakaja sama šmat času adbyła ŭ biełaruskich turmach, tłumačyć, što Źmitru nie prysudžajuć «krytuju» turmu tolki tamu, što jamu zastałosia siadzieć mieniej za hod. Na dumku Nasty Pałažanki, meta paharšeńnia režymu ŭtrymańnia dla palitviaźniaŭ — pomsta i dalejšy cisk:
«Mahčyma, heta novaja forma takoha psychalahičnaha cisku. Vielmi ciažka takoje pieražyvać, kali ŭmovy ŭsio horšyja i horšyja. Heta i pomsta za raniejšaje, i praciah ataki, udar na budučyniu».
