Pra heta žoncy aktyvista paviedamili ŭ viciebskim SIZA.
Alena Kavalenka chacieła pieradać mužu sok — na toj vypadak, kali jon usio ž vyrašyć vychodzić z haładoŭki, jakaja praciahvajecca ŭžo 30-ty dzień. Ale sok u jaje nie pryniali. Pradstaŭnik miedčastki, ź jakim pahavaryła žonka aktyvista, skazaŭ, što jaho pačali karmić prymusova.
«Ja zapytałasia, čym jaho kormiać i jak heta adbyvajecca. Mnie patłumačyli, što kormiać miasnym bulonam praz zond. Ja zapiarečyła: maŭlaŭ, čytała ŭ internecie, što paśla praciahłaj haładoŭki treba ŭžyvać tolki lohkuju ježu — navat kali soki, to spačatku tolki razbaŭlenyja. Ale supracoŭnik miedčastki zaŭvažyŭ, što Siarhieja kormiać tak, „iak napisana ŭ padručniku pa chirurhii“. I paraiŭ mnie pačytać taki padručnik», — apaviała Alena Kavalenka.
Jana zapytałasia, jak prachodzić hetaja pracedura: ci nie hvałtam kormiać Siarhieja, prykutaha kajdankami da łožka. Ale padrabiaznaściaŭ joj nie paviedamili.
Taksama Alena Kavalenka siońnia atrymała ŭžo treciuju admovu na spatkańnie z mužam. Admovu dasłali i maci aktyvista, Lidzii Kavalenka. U adkazie śledčaha Siarhieja Vołkava napisana, što spatkańnie źniavolenaha aktyvista z rodnymi jon ličyć niemetazhodnym.
* * *
Siarhiej Kavalenka źmieščany ŭ viciebski SIZA 22 śniežnia 2011 hoda. Suprać jaho raspačali kryminalnuju spravu za parušeńnie režymu adbyćcia ŭmoŭnaha pakarańnia — «chatniaj chimii», prysudžanaj siabru KCHP BNF za vyviešvańnie bieł-čyrvona-biełaha ściaha na navahodniaj jołcy ŭ Viciebsku 7 studzienia 2010 hoda.