Kiroŭca «BiełAZu» na pradpryjemstvie «Hranit» u Mikaševičach Leanid Hładzievič abviaściŭ haładoŭku pratestu suprać cisku na siabraŭ niezaležnaha prafsajuzu.
Fota Radyjo Svaboda
Jon kaža, što ŭžo druhi dzień haładaje. Adnak paviedamić pra heta zdoleŭ tolki ciapier, bo znachodziŭsia ŭ milicyi. Leanid Hładzievič pravioŭ tam sutki:
«Administracyja „Hranitu“ pačała cisnuć na baćkoŭ majoj žonki, kab jana, u svaju čarhu, paŭpłyvała na mianie, prymusiŭšy mianie admovicca ad udziełu ŭ niezaležnym prafsajuzie. U vyniku baćki navat pačali kanfliktavać z žonkaj. Z-za hetaha žonka pačała kanfliktavać i sa mnoj.
Učora ranicaj ja pryjšoŭ z pracy dadomu i paprasiŭ žonku pryhatavać mnie paśniedać. Ale žonka admoviłasia, my pačali svarycca, i tut užo milicyja staić, kab mianie zabirać. Ja dumaju, što heta padrychtavana było administracyjaj „Hranitu“.U vyniku ja apynuŭsia ŭ milicyi, siońnia vo tolki mianie vypuścili, i ja druhi dzień ničoha nia jeŭ,» — kaža Leanid Hładzievič.
Spadar Hładzievič kaža, što planuje trymać haładoŭku da taho času, pakul niezaležny prafsajuz na «Hranicie» nie dabjecca rehistracyi:
«Patrabavańni majoj haładoŭki zaklučajucca ŭ tym, kab pryjechaŭ staršynia abłvykankamu Kanstancin Sumar sa mnoj na hutarku.Ja paviedamlu zaraz u lakarniu pra toje, što ja haładaju, kab medyki byli ŭ kursie hetaha, sačyli za maim zdaroŭjem. Ja budu dabivacca, kab niezaležny prafsajuz na „Hranicie“ zarehistravali i pierastali cisnuć na rabočych. Patrabuju, kab Sumar daŭ mahčymaść atrymać našamu prafsajuzu pamiaškańnie dla rehistracyi».
Leanid Hładzievič źjaŭlajecca adnym z najbolš aktyŭnych siabraŭ niezaležnaha prafsajuzu na «Hranicie», raspavioŭ kiraŭnik supołki hetaha prafsajuzu Aleh Stachajevič.
Spadar Hładzievič adnym ź pieršych napisaŭ zajavu ab vychadzie z aficyjnaha prafsajuzu, adnym ź pieršych pastaviŭ podpis pad arhanizacyjaj supołki niezaležnaha prafsajuzu na pradpryjemstvie.Leanid Hładzievič aktyŭna vystupaŭ i na schodzie pracoŭnych z udziełam Kanstancina Sumara.
Aktyvist pierakanany, što niezaležnyja prafsajuzy pavinny suisnavać paralelna z aficyjnymi na kožnym pradpryjemstvie ŭ Biełarusi:
«Tak, musić, praściej budzie raźvivać ekanomiku Biełarusi, kali niezaležny prafsajuz budzie baranić intaresy pracoŭnych, a aficyjny prafsajuz budzie abaraniać intaresy načalstva».
