Kali nie pahłyblacca ŭ dziejnaść Tamary Stasievič, jejnaje pavyšeńnie — namieśnica abłasnoj inśpiekcyi padatkaŭ i zboraŭ — nie vyklikaje pytańniaŭ. Apošnim časam Vaŭkavyski rajon zajmaŭ pieršyja pazicyi ŭ ahulnaj sumie padatkaŭ, što pastupali ŭ vobłaść.
Ale razam z tym, na jaje była zaviedzienaja kryminalnaja sprava, pravodzilisia pravierki z nahody padazreńnia ŭ pieravyšeńni słužbovych paŭnamoctvaŭ, i peŭny čas jana naahuł była adchilenaja ad pracy.
Były advakat Mikoły Aŭtuchoviča Pavieł Sapiełka adznačaje, što Tamara Stasievič była hałoŭnaju fihuraju ŭ pieršaj kryminalnaj spravie suprać biźniesoŭca ŭ 2003 h.
«Mienavita jana była inicyjataram zaviadzieńnia kryminalnaj spravy. Aŭtuchovič, u svaju čarhu, sabraŭ na jaje dy inšych vaŭkavyskich čynoŭnikaŭ kampramat, jaki pieradaŭ u Kamitet baraćby z arhanizavanaj złačynnaściu Haradzienskaj vobłaści.Tamu Aŭtuchovič vielmi raźličvaŭ ubačyć jaje na łavie padsudnych», — ziartaje ŭvahu advakat.
Na zahad tahačasnaha ministra padatkaŭ i zboraŭ Kanstancina Sumara (ciapier — hubiernatar Bieraściejskaj vobłaści), pačali ŭnutraviedamasnaje rasśledavańnie pavodle faktu złoŭžyvańnia słužbovymi paŭnamoctvami Tamary Stasievič i jejnych kalehaŭ. Pravodzić rasśledavańnie daručyli byłomu pracaŭniku orhanaŭ unutranych spravaŭ, a na toj momant — starejšamu padatkovamu inśpiektaru adździełu inśpiektarskaj pracy MPZ Haradzienskaj vobłaści Mikałaju Basałyhu voś tut treba vypravić — (paźniej pajšoŭ na pavyšeńnie i staŭ namieśnikam staršyni padatkovaj inśpiekcyi Kastryčnickaha rajonu Horadni).
Jon padrychtavaŭ spravazdaču pra toje, što
Tamara Stasievič fiktyŭna ŭładkavała na pracu svaju starejšuju dačku Natallu ŭ «Vaŭkavyskmižrajhaz» na pasadu kantralora.
Natalla Stasievič u 2000 h. pastupała ŭ Haradzienski dziaržaŭny ahrarny ŭniviersitet, adnak nie zdoleła zdać ispytu pa matematycy. Jaje pryniali na płatnaje adździaleńnie, adnak vučobu apłačvała nie sama jana i navat nie jejnyja baćki, a dziaržaŭnaje pradpryjemstva «Vaŭkavyskmižrajhaz». Za hetuju «pasłuhu» Stasievič admianiła štrafnyja sankcyi suprać arhanizacyi, jakija naličyli paśla padatkovych pravierak. Praŭda,
kali vyśvietlilisia abstaviny hetaj spravy, spadaryniu Stasievič prymusili kampiensavać vydatki na vučobu dački. Nijakaj inšaj adkaznaści za pieravyšeńnie słužbovych paŭnamoctvaŭ jana nie paniesła.
Uładzimir Asipienka kaliści pracavaŭ u padatkovaj inśpiekcyi pad kiraŭnictvam Tamary Stasievič. Adnak u supraćdziejańni Aŭtuchoviču zaniaŭ pazicyju biźniesoŭcy. Jak vynik, byŭ asudžany razam z vaŭkavyskim pradprymalnikam u 2010 h. i adbyvaŭ pakarańnie ŭ Ivacevickaj kałonii. U intervju partału region4.by jon adznačaje: «My paćvierdzili ŭ svaich pakazańniach i na vočnych staŭkach z načalnicaju padatkovaj inśpiekcyi Tamaraju Stasievič i jejnaju namieśnicaju Hannaju Miśko šmatlikija fakty parušeńniaŭ.
Urešcie ŭsich, chto daŭ pakazańni suprać ich, abvinavacili va ŭsich śmiarotnych hrachach i zvolnili ź inśpiekcyi».
Takim čynam, šmatlikija fakty, što śviedčyli pra karumpavanaść miascovych čynoŭnikaŭ i Tamary Stasievič, pavodle aficyjnych źviestak «nie znajšli paćvierdžańnia». A tamu spadarynia Stasievič — adna z asnoŭnych fihurantak u spravie Aŭtuchoviča — praciahvaje pracavać u padatkovych orhanach. U Vaŭkavysku jana adpracavała bolš za 12 hadoŭ, dahetul uznačalvała padatkovuju inśpiekcyju Zelvienskaha rajonu.
