Тамара Стасевіч 12 гадоў ачольвала падатковую інспекцыю Ваўкавыска.
Калі не паглыбляцца ў дзейнасць Тамары Стасевіч, ейнае павышэнне — намесніца абласной інспекцыі падаткаў і збораў — не выклікае пытанняў. Апошнім часам Ваўкавыскі раён займаў першыя пазіцыі ў агульнай суме падаткаў, што паступалі ў вобласць.
Але разам з тым, на яе была заведзеная крымінальная справа, праводзіліся праверкі з нагоды падазрэння ў перавышэнні службовых паўнамоцтваў, і пэўны час яна наагул была адхіленая ад працы.
Былы адвакат Міколы Аўтуховіча Павел Сапелка адзначае, што Тамара Стасевіч была галоўнаю фігураю ў першай крымінальнай справе супраць бізнесоўца ў 2003 г.
«Менавіта яна была ініцыятарам завядзення крымінальнай справы. Аўтуховіч, у сваю чаргу, сабраў на яе ды іншых ваўкавыскіх чыноўнікаў кампрамат, які перадаў у Камітэт барацьбы з арганізаванай злачыннасцю Гарадзенскай вобласці.Таму Аўтуховіч вельмі разлічваў убачыць яе на лаве падсудных», — зяртае ўвагу адвакат.
На загад тагачаснага міністра падаткаў і збораў Канстанціна Сумара (цяпер — губернатар Берасцейскай вобласці), пачалі ўнутраведамаснае расследаванне паводле факту злоўжывання службовымі паўнамоцтвамі Тамары Стасевіч і ейных калегаў. Праводзіць расследаванне даручылі былому працаўніку органаў унутраных справаў, а на той момант — старэйшаму падатковаму інспектару аддзелу інспектарскай працы МПЗ Гарадзенскай вобласці Мікалаю Басалыгу вось тут трэба выправіць — (пазней пайшоў на павышэнне і стаў намеснікам старшыні падатковай інспекцыі Кастрычніцкага раёну Горадні).
Ён падрыхтаваў справаздачу пра тое, што
Тамара Стасевіч фіктыўна ўладкавала на працу сваю старэйшую дачку Наталлю ў «Ваўкавыскміжрайгаз» на пасаду кантралёра.
Наталля Стасевіч у 2000 г. паступала ў Гарадзенскі дзяржаўны аграрны ўніверсітэт, аднак не здолела здаць іспыту па матэматыцы. Яе прынялі на платнае аддзяленне, аднак вучобу аплачвала не сама яна і нават не ейныя бацькі, а дзяржаўнае прадпрыемства «Ваўкавыскміжрайгаз». За гэтую «паслугу» Стасевіч адмяніла штрафныя санкцыі супраць арганізацыі, якія налічылі пасля падатковых праверак. Праўда,
калі высветліліся абставіны гэтай справы, спадарыню Стасевіч прымусілі кампенсаваць выдаткі на вучобу дачкі. Ніякай іншай адказнасці за перавышэнне службовых паўнамоцтваў яна не панесла.
Уладзімір Асіпенка калісьці працаваў у падатковай інспекцыі пад кіраўніцтвам Тамары Стасевіч. Аднак у супрацьдзеянні Аўтуховічу заняў пазіцыю бізнесоўцы. Як вынік, быў асуджаны разам з ваўкавыскім прадпрымальнікам у 2010 г. і адбываў пакаранне ў Івацэвіцкай калоніі. У інтэрв’ю парталу region4.by ён адзначае: «Мы пацвердзілі ў сваіх паказаннях і на вочных стаўках з начальніцаю падатковай інспекцыі Тамараю Стасевіч і ейнаю намесніцаю Ганнаю Місько шматлікія факты парушэнняў.
Урэшце ўсіх, хто даў паказанні супраць іх, абвінавацілі ва ўсіх смяротных грахах і звольнілі з інспекцыі».
Такім чынам, шматлікія факты, што сведчылі пра карумпаванасць мясцовых чыноўнікаў і Тамары Стасевіч, паводле афіцыйных звестак «не знайшлі пацверджання». А таму спадарыня Стасевіч — адна з асноўных фігурантак у справе Аўтуховіча — працягвае працаваць у падатковых органах. У Ваўкавыску яна адпрацавала больш за 12 гадоў, дагэтуль узначальвала падатковую інспекцыю Зэльвенскага раёну.
Цяпер чытаюць
Што азначае з’яўленне выхадцаў з Беларусі ў расійскім спецпадраздзяленні для асабліва важных аперацый і тайных забойстваў?21
Каментары