Z 11 lutaha pačali dziejničać papraŭki da Zakonu ab dziaržaŭnaj słužbie. Čynoŭnikam zabaroniena karystacca «lhotami i pieravahami» ad zamiežnych krain.
Z 11 lutaha pačali dziejničać papraŭki da Zakonu ab dziaržaŭnaj słužbie. Čynoŭnikam zabaroniena karystacca «lhotami i pieravahami» ad zamiežnych krain.
Nahodaj, kab pryniać papraŭki, stała «karta palaka», jakuju biełaruskija hramadzianie atrymlivajuć ad polskich uładaŭ. Zaraz supracoŭniki dziaržaŭnych ustanovaŭ, jakija majuć «kartu palaka», pavinny buduć zdać jaje ŭ adździeł kadraŭ, inakš im pahražaje zvalnieńnie. Pieradaje naš haradzienski karespandent.
Kartu palaka ŭ polskich dyplamatyčnych ustanovach pačali vydavać u 2008 hodzie. Staršynia Hałoŭnaj rady niezarehistravanaha Sajuzu palakaŭ Andrej Pačobut padkreślivaje:
«Toje, što jany ciapier zrabili źmienu ŭ zakanadaŭstvie, jano praktyčna isnavała ad samaha pačatku. Pa sutnaści, ad momantu, kali pačała dziejničać „karta palaka“, była niefarmalnaja zabarona atrymlivać hetuju kartu dla ludziej, jakija pracujuć u dziaržaŭnych ustanovach.
Ad samaha pačatku vydačy „karty palaka“ vielmi ščylny manitorynh pravodzili biełaruskija specsłužby: chto pajšoŭ u konsulstva, chto telefanavaŭ tudy i hetak dalej.Zacikaŭlenaść dastatkova vialikaja ŭ „karcie palaka“, niahledziačy na kampaniju, jakuju ŭłady pravodziać».
Haradzienski paet, žurnalist Jury Humianiuk taksama vyrašyŭ aformić «kartu palaka»:
«Majo staŭleńnie stanoŭčaje, pakolki ja supracoŭničaju z polskimi mas-medyja, i hetaja karta daść mnie mahčymaść mieć ilhoty, naprykład, pry karystańni transpartam u Polščy. I dobra było b taksama naviedvać muzejnyja ŭstanovy sa źnižkaj».
Što da čynoŭnikaŭ z «kartaj palaka», Jury Humianiuk miarkuje: «Dziaržava abmiažoŭvaje ichnija mahčymaści, a z druhoha boku, jak kažuć: kamu słužyš, tamu j kłaniajeśsia. Ja nia baču supiarečnaści.
Kali vy słuhujecie hetamu režymu, hetaj uładzie, to čaho ž vy chočacie? Na dvuch kresłach vielmi niazručna siadzieć.Treba, mnie zdajecca, vybirać albo adno, albo druhoje».
Hramadzianam Biełarusi vydadziena bolš za dvaccać tysiač «kartaŭ palaka». Vydajecca jana na dziesiać hadoŭ, uładalnik moža raźličvać na biaspłatnuju šmatrazovuju polskuju nacyjanalnuju vizu. Na terytoryi Polščy jon maje prava, jak hramadzianie Polščy, pracavać biez specyjalnaha dazvołu, biaspłatna vučycca i atrymlivać medyčnuju dapamohu.
Kab atrymać kartu, treba ličyć polskuju movu rodnaj i vałodać joju choć na bazavym uzroŭni, viedać i padtrymlivać polskija tradycyi i zvyčai, mieć baćkoŭ abo dziadoŭ polskaj nacyjanalnaści albo z polskim hramadzianstvam.Možna taksama padać daviedku z arhanizacyi polskaj nacmienšaści pra svoj aktyŭny ŭdzieł u joj ciaham minimum troch apošnich hadoŭ.
Kamientary