Biełaruskija i rasijskija sudy razhladajuć kryminalnyja spravy ŭ dačynieńni da arhanizataraŭ i ŭdzielnikaŭ mižnarodnaj złačynnaj hrupy, jakija zajmalisia narkatrafikam. Abvinavačanym pahražaje pazbaŭleńnie voli na termin ad 10 da 15 hadoŭ.
Pra padrabiaznaści spravy na sajcie Ministerstva ŭnutranych spraŭ Biełarusi raskazaŭ staršy opierupaŭnavažany pa asabliva važnych spravach upraŭleńnia pa narkakantroli MUS. Proźvišča hetaha čałavieka nie nazyvajecca, bo jon niepasredna braŭ udzieł u zatrymańniach i raskryćci złačynstva.
Pavodle słoŭ apieratyŭnaha supracoŭnika, upraŭleńniem pa narkakantroli MUS Biełarusi sumiesna ź Fiederalnaj słužbaj RF pa kantroli nad abarotam narkotykaŭ i Biuro kryminalnaj palicyi Litvy spyniena dziejnaść arhanizavanaj złačynnaj hrupy, udzielniki jakoj zajmalisia kantrabandaj narkatyčnych srodkaŭ i psichatropnych rečyvaŭ z krain Jeŭrasajuza ŭ Rasiju. Tranzit ažyćciaŭlaŭsia cieraź Litvu i Biełaruś. Dla dastaŭki narkotykaŭ złačyncy vykarystoŭvali hruzavy aŭtatranspart, jaki ruchaŭsia cieraz krainy ŭ režymie mižnarodnych pieravozak (TIF). Raspracoŭka hrupy zaniała prykładna paŭhoda, pry hetym rehularna ažyćciaŭlaŭsia abmien apieratyŭnaj infarmacyjaj z rasijskimi i litoŭskimi kalehami.
Usiaho zatrymana šeść udzielnikaŭ arhanizavanaj złačynnaj hrupy: dva — u Biełarusi, čatyry — u Rasii. Siarod ich i dva arhanizatary złačynnaha biźniesu. Try zatrymanyja — hramadzianie Litvy, try — Rasii.
U vyniku pieršaha etapu apieracyi na terytoryi Biełarusi było kanfiskavana prykładna 90 kh narkatyčnych srodkaŭ. Padčas realizacyi druhoha etapu ŭ Biełarusi i Rasii było vyjaŭlena bolš za 50 kh narkotykaŭ i zatrymany arhanizatary. Heta adna z samych značnych kanfiskacyj u historyi biełaruskich pravaachoŭnych orhanaŭ. Dla Rasii takaja kolkaść narkotykaŭ taksama źjaŭlajecca bujnoj.
