Budaŭnictva pa-biełarusku: Vieniesueła ŭ šoku 36

Miascovyja žurnalisty padazrajuć jaje ŭ suviaziach z mafijaj, abvinavačvajuć u kiepskim staŭleńni da pracoŭnych i niesumlennym vykanańni rabot. «Biełaruskaja mafija» — tak nazyvajecca adzin z artykułaŭ, jakija pryśviaciła hetaj kampanii vieniesuelskaja hazieta «El Univiersał».

Adna z zdadzienych biełarusami ŭ Marakai kvater - biez vady i elektryčnaści.

Aŭtar hetaj i jašče adnoj publikacyj ab «Biełzamiežbudzie» Jozef Pališuk vykazvaje mierkavańnie, što dziejnaść BZB u łacinaamierykanskaj krainie stała adnoj z pryčyn aryštu biełaruskaha biznesmiena Viktara Šaŭcova, jaki ŭznačalvaŭ jaje praŭleńnie.

Kala čatyroch hadoŭ tamu Biełaruś abiacała pabudavać u Marakai i Karakasie 17 500 kvater, ale hetyja abiacańni nie byli vykananyja,

piša Pališuk na staronkach «El Univiersał». Razam z tym, adznačaje aŭtar, anałahičnyja prajekty z rasijanami i irancami išli paśpiachova.

Varta adznačyć, što ŭ Vieniesuele biełarusy budujuć nie sami, a najmajuć vieniesuelskich padradčykaŭ, jakimi kirujuć praz vajennych pierakładčykaŭ.

Vieniesuelcy pracujuć u ciažkich umovach, sutykajučysia ź niebiaśpiečnaj pracaj, zatrymkaj zarobkaŭ i zvalnieńniami. Nibyta 29 krasavika 2011 h. vieniesuelskija rabočyja navat zładzili strajk suprać niespraviadlivaha staŭleńnia da ich z boku BZB.

Budaŭnictva supravadžałasia dziejnaściu hetak zvanaj «armaturnaj mafii», jakaja zajmałasia kantrabandaj žaleza.

Mieŭ miesca kradziež budmateryjałaŭ, što, jak miarkujuć u Vieniesuele, rabiŭsia nie bieź viedama kiraŭnictva kampanii.

Hazieta pacikaviłasia ŭ pradstaŭnika BZB Andreja Atraškieviča, ci źviazany aryšt Viktara Šaŭcova ź situacyjaj u Vieniesuele. Atraškievič z hetym mierkavańniem nie zhodny, jon miarkuje, što biznesmiena aryštavali ŭ suviazi ź jaho dziejnaściu ŭ Iraku.

Vieniesuelski žurnalist adpraviŭsia ŭ Marakaj, kab na miescy vyśvietlić, jak iduć spravy ź biełaruskim budaŭnictvam.

Akazałasia, što 29 śniežnia minułaha hoda ŭ horadzie byli zdadzienyja pad kluč 720 kvater (usiaho kala 4% ad prajektnych 17 500), ale z taho dnia i da 3 studzienia 2012 hoda navat u ich nie było elektryčnaści i kanalizacyi!

Pracy na zdadzienych abjektach praciahvalisia i paśla taho, jak u ich zasialilisia pieršyja žychary.

Na fatahrafijach, apublikavanych «El Univiersał», pakazanyja niespryjalnyja žyllovyja ŭmovy ŭ kvaterach Marakaja, užo zdadzienych biełarusami.

* * *

Viktar Šaŭcoŭ byŭ znajomy nie tolki z prezidentam Uha Čaviesam, ale i ź niabožčykami Sadamam Chusejnam i Muamaram Kadafi. Siarod inšaha, jon uznačalvaŭ Tavarystva biełaruska-irakskaj družby, uvachodziŭ u biełaruska-livijskuju kamisiju pa ekanamičnym, handlovym i navukova-techničnym supracoŭnictvie. «Biełzamiežbud» uznačaliŭ u 2007 hodzie. Hetaja kampanija «stała trymalnikam asnoŭnych kantraktaŭ pa pastaŭkach biełaruskaj techniki i abstalavańnia i zakazčykam i padradčykam pa ŭsich budaŭničym prajektach u Vieniesuele — na miljardy dalaraŭ», piša «Štodziońnik».

Viktar Šaŭcoŭ padazrajecca ŭ asabliva bujnym kradziažy. Jak paviedamlałasia raniej, u dačynieńni da top-mieniedžaraŭ ZAT «Biełzamiežbud» u kastryčniku 2011 hoda była zaviedziena kryminalnaja sprava. Śledstvam praviarałasia infarmacyja ab dačynieńni Šaŭcova da ździajśnieńnia supraćpraŭnych dziejańniaŭ pry padrychtoŭcy i realizacyi ekanamičnych prajektaŭ u Vieniesuele.

«Padstavaj dla zaviadzieńnia kryminalnaj spravy pasłužyła infarmacyja ab jaho dačynieńni da kradziažu hrašovych srodkaŭ, jakija znachodzilisia na rachunkach adnaho z bankaŭ.

Pavodle papiaredniaj acenki śledstva, suma skradzienych hrašovych srodkaŭ pieravyšaje 10 młn dalaraŭ. U dačynieńni da Šaŭcova abranaja miera strymańnia ŭ vyhladzie zaklučeńnia pad vartu i ciapier jon znachodzicca ŭ SIZA KDB", — raspaviadaŭ u efiry kanała "Biełaruś 1" «namieśnik načalnika pres-słužby KDB Artur Strech.

Na pres-kanfierencyi ŭ Minsku 23 śniežnia 2011 hoda Alaksandr Łukašenka zajaviŭ, što ŭ vypadku pakryćcia dziaržavie naniesienaj škody Viktar Šaŭcoŭ budzie vyzvaleny. «Škoda nanios dziaržavie — hrošy na stoł u dvuchrazovym-trochrazovym pamiery, i pajšoŭ. Nie zapłacić hrošy — budzie siadzieć u turmie», — skazaŭ Łukašenka.

Łukašenka padkreśliŭ, što heta šarahovaje ekanamičnaje złačynstva, źviazanaje z vyvadam hrošaj i pravaparušeńniem ŭ suviazi z budaŭnictvam abjekta ŭ Vieniesuele. «Heta zvyčajnaja kryminalnaja sprava, u nas takich chapaje. Navat jość kryminalnyja spravy bolš surjoznyja», — adznačyŭ jon. Ale dadaŭ: «Hety spadar nie ŭ pieršy raz traplaje ŭ pole zroku pravaachoŭnych orhanaŭ».

Vieniesueła — adzin z najvažniejšych sajuźnikaŭ Biełarusi na suśvietnaj arenie, tamu skandał z «Biełzamiežbudam» lažyć nie tolki ŭ ekanamičnaj, ale i ŭ palityčnaj płoskaści.

naviny.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH