«Hranit»: niezaležny prafsajuz patrabuje rehistracyi

Aktyvisty niezaležnaha prafsajuzu na pradpryjemstvie «Hranit» u Mikaševičach padali zajavu na imia vykanaŭcy abaviazkaŭ hiendyrektara z patrabavańniem vydzielić pamiaškańnie dla jurydyčnaha adrasu.

Pra heta paviedamiŭ kiraŭnik supołki niezaležnaha prafsajuzu na «Hranicie» Aleh Stachajevič: «Na schodzie aficyjnaha prafsajuzu siarod kiroŭcaŭ samazvałaŭ vykanaŭca abaviazkaŭ hiendyrektara Eduard Haŭryłkovič sprabavaŭ niejak julić, uschvalić aficyjny prafsajuz, niejak aściarožna prynizić niezaležny prafsajuz. A potym kaža, što, maŭlaŭ, kali b jany chacieli zarehistravacca, to ŭžo b daŭno zarehistravalisia. Skazaŭ, što tut, maŭlaŭ, nichto nia čynić nijakich pieraškodaŭ».

Paśla hetych słovaŭ kiraŭnika «Hranitu» aktyvisty niezaležnaha prafsajuzu napisali kalektyŭny list Haŭryłkoviču z patrabavańniem vydzielić pamiaškańnie dla jurydyčnaha adrasu niezaležnaha prafsajuzu:

Stachajevič: «My, siabry piarvičnaj arhanizacyi Biełaruskaha niezaležnaha prafsajuzu na pradpryjemstvie „Hranit“, zajavili, što asabista Haŭryłkovičam i šeraham asobaŭ z administracyi ažyćciaŭlajecca palityka, skiravanaja na toje, kab pieraškadžać lehalnaj dziejnaści našaj arhanizacyi. Niepravamierna zaciahvajecca pytańnie ab vydzialeńni nam jurydyčnaha adrasu, što źjaŭlajecca dyskryminacyjaj i abmiežavańniem našych pravoŭ. Na hetaj padstavie my patrabujem vydzielić pamiaškańnie dla našaj arhanizacyi. Kali spadar Haŭryłkovič kaža, što nam tut nichto nie pieraškadžaje, to niachaj paćvierdzić svaje słovy».

Rabočy Mikałaj, siabra niezaležnaha prafsajuzu, taksama aburany tym, što pytańnie pra jurydyčny adras zaciahvajecca: «U subotu ŭ hranitaŭskim prafilaktoryi zhareła łaźnia. Usie tut abmiarkoŭvajuć, što jana zaharełasia padčas śviatkavańnia dnia narodzinaŭ adnaho z načalnikaŭ. To ciapier ža jaje buduć adnaŭlać za hranitaŭskija hrošy. A niezaležnamu prafsajuzu dyk i niama mahčymaści vydzielić pamiaškańnie».

Raniej zajavu z prośbaj ab pamiaškańni nakiroŭvaŭ kiraŭnictvu «Hranitu» staršynia Biełaruskaha niezaležnaha prafsajuzu Mikałaj Zimin. Adnak jahonuju prośbu nie zadavolili. Kiraŭnictva «Hranitu» paviedamiła, što hetaje pytańnie — u kampetencyi Ministerstva budaŭnictva i architektury.

Naprykancy 2011 hodu niekalki socień rabočych pradpryjemstva pa zdabyčy budaŭničaha kamieniu «Hranit» u Mikaševičach vyjšli z aficyjnaha prafsajuzu i arhanizavali supołku Biełaruskaha niezaležnaha prafsajuzu. Adnak pytańnie z rehistracyjaj zastajecca dahetul niavyrašanym, bo niama jurydyčnaha adrasu.

• 0
• 0
• 0
• 0
• 0
• 0
• 0
• 0