Ukaz prezidenta: miakkaja reforma piensijnaj sistemy

Adpaviedny ŭkaz № 136 «Ab mierach pa ŭdaskanaleńni piensijnaha zabieśpiačeńnia hramadzian» Alaksandr Łukašenka padpisaŭ u niadzielu 18 sakavika, paviedamlaje ahienctva BIEŁTA.

Dakumientam praduhledžana, što pry praciahu pracy biez atrymańnia dziaržaŭnaj piensii pa ŭzroście paśla nabyćcia prava na jaje pamier piensii prahresiŭna pavialičvajecca:

za pieršy hod — na 6% zarobku, prymanaha dla vyličeńnia piensii;

za dva hady pamier pavyšeńnia składzie 14% (pavyšeńnie na 8% za druhi hod pracy sumujecca z pavyšeńniem na 6% za pieršy hod);

za try hady — 24% (14% za pieršyja dva hoda plus 10% za treci hod);

za čatyry hady — 36% (24% za try hady plus 12% za čaćviorty);

za piaty i kožny nastupny hod praduhledžvajecca pavyšeńnie pamieru piensii na 14% zarobku, jakija taksama sumujucca z pracentami pavyšeńnia, ustalavanymi za papiaredni pieryjad (za 5 hadoŭ — 50%, za 6 hadoŭ — 64%).

Raniej zakanadaŭstva taksama praduhledžvała pavyšeńnie pamieru piensii za paźniejšy vychad na jaje, ale ŭ mienšym pamiery.

U adpaviednaści z novymi normami piensija žančyny za adkładzieny sychod na 5 hadoŭ vyraście ŭ siarednim na Br1031 tys., abo na 73,6%, i budzie raŭniacca Br2433 tys.

Ukazam taksama praduhledžvajecca pry vyličeńni zarobku dla pracoŭnaj piensii ŭličvać zaličany ŭ staž pracy pieryjady dziejnaści, na praciahu jakich nie ažyćciaŭlałasia vypłata abaviazkovych strachavych uznosaŭ u fond.

U adpaviednaści z zakanadaŭstvam pry vyličeńni piensii ŭ staž naroŭni z pracaj, kali pravodzicca vypłata uznosaŭ, uklučajucca pieryjady inšaj dziejnaści, na praciahu jakich ŭznosy nie vypłačvajucca (vajskovaja słužba, vučoba ŭ dzionnaj formie atrymańnia adukacyi, dohlad dziaciej, invalidaŭ I hrupy i sastarełych, jakich dasiahnuli 80-hadovaha ŭzrostu). Pry vyznačeńni zarobku takija pieryjady prapuskajucca.

Z ulikam taho, što pry vyličeńni piensij kožny hod stažu aceńvajecca ŭ pracentach ad zarobku, a zarobki va ŭsich roznyja, to adnolkavyja pa svaim źmieście pieryjady majuć u piensii roznuju vartaść.

Ukazam ustanoŭleny adziny košt usich pieryjadaŭ biez vypłaty uznosaŭ pry naznačeńni piensii i ŭklučeńnie takich pieryjadaŭ pry raźliku zarobku.

Jak rastłumačyli ŭ pres-słužbie Alaksandra Łukašenki, ustanaŭleńnie bolš važkaj dapłaty za adkładzieny vychad na piensiju, unifikacyja koštu pieryjadaŭ biez vypłaty uznosaŭ i ŭklučeńnie ich pry raźliku zarobku ŭ kompleksie buduć sadziejničać źnižeńniu kolkaści piensijanieraŭ i pavyšeńniu efiektyŭnaści dziaržaŭnych vydatkaŭ.

Dadzienyja normy buduć raspaŭsiudžvacca na siońniašnich rabotnikaŭ, jakija jašče farmujuć svaje pravy na piensijnaje zabieśpiačeńnie.

Varta adznačyć, što

siaredniaja praciahłaść žyćcia ŭ Biełarusi na siońnia składaje trochi mienš za 65 hadoŭ dla mužčyn i 76 hadoŭ dla žančyn. Hetyja ličby zastajucca adnosna niaźmiennymi (plus-minus 3 hady) voś užo 50 hadoŭ.

* * *

Siaredniaja praciahłaść žyćcia, hadoŭ

Japonija 82,1
Francyja 81
Hiermanija 79
ZŠA 78,1
Polšča 76,7
Čechija 76,5
Litva 74,6
Kitaj 73
Łatvija 71,8
Biełaruś 70,2
Ukraina 68,1
Kazachstan 67,4
Rasieja 66
Anhoła 37,6

• 0
• 0
• 0
• 0
• 0
• 0