Z pačatku hoda ŭ DTZ pa vinie pjanych kiroŭcaŭ zahinuŭ 21 čałaviek 2

Z pačatku 2012 hoda pa vinie niećviarozych kiroŭcaŭ na terytoryi Biełarusi adbyłosia 78 darožna-transpartnych zdareńniaŭ, jakija zabrali žyćci 21 i pakalečyli 95 čałaviek. Kala 20% DTZ, u jakich vinavaty vadzicieli, źviazany z ŭžyvańniem ałkaholu pierad pajezdkaj.

Takija źviestki abnarodavała ŭpraŭleńnie DAI MUS.

«Zakłapočanaść i abureńnie» Dziaržaŭtainśpiekcyi vyklikaje toj fakt, što, «niahledziačy na pastajannaje ŭzmacnieńnie adkaznaści za kiravańnie aŭtamabilem u stanie apjanieńnia, usio jašče zastajecca niemałoj kolkaść vadzicielaŭ, jakija dazvalajuć sabie sieści za rul, pryniaŭšy pierad hetym peŭnuju dozu śpirtnoha». Za sutki supracoŭniki DAI zatrymlivajuć kala 100 takich vadzicielaŭ. U piatnicu i subotu hetaja ličba časta pavialičvajecca ŭdvaja.

Šmatlikimi daśledavańniami dakazana, što vadžeńnie transpartnaha srodku niesumiaščalnaje navat z samaj lohkaj stupieńniu apjanieńnia.

U vadziciela hublajecca adčuvańnie času, paharšajecca zrokava-prastoravaje ŭspryjaćcie, pamianšajecca myšačnaja siła.

Źniavažlivaje staŭleńnie da niebiaśpieki, praźmiernaja samaŭpeŭnienaść, nieadekvatnaja acenka darožnaj abstanoŭki pryvodziać da taho, što niećviarozyja vadzicieli časta pieravyšajuć ustanoŭlenuju chutkaść ruchu, nie vytrymlivajuć biaśpiečnuju dystancyju ŭ transpartnym patoku, niapravilna raźličvajuć čas, nieabchodny na vykanieńnie manieŭru. Jazda supravadžajecca nieapraŭdana rezkimi viražami, paskareńniem abo tarmažeńniem, jakija i pryvodziać da darožnych zdareńniaŭ.

U adpaviednaści z zakanadaŭstvam za pieršy vypadak jazdy ŭ stanie apjanieńnia biez nastupstvaŭ abo pieradaču prava kiravańnia niećviarozamu, a taksama admovu ad prachodžańnia ahladu prymianiajecca pazbaŭleńnie prava na kiravańnie ŭsimi transpartnymi srodkami na try hady i nakładajecca štraf ad 15 da 35 bazavych vieličyń, što na siońnia składaje ad 1 młn. 500 tys. da 3 młn. 500 tys. rubloŭ. Za paŭtornuju «pjanuju jazdu» na praciahu hoda pravaparušalnik pryciahvajecca da adkaznaści ŭžo sudom u adpaviednaści z Kryminalnym kodeksam. U jakaści pakarańnia praduhledžana pazbaŭleńnie prava zajmać peŭnyja pasady abo zajmacca takim vidam dziejnaści, jak kiravańnie transpartnymi srodkami, na termin da piaci hadoŭ sa štrafam da 1.000 bazavych vieličyń, abo papraŭčymi rabotami na termin da dvuch hadoŭ, abo aryštam na termin da šaści miesiacaŭ, a ŭ niekatorych vypadkach abmiežavańniem abo pazbaŭleńniem voli da dvuch hadoŭ.

Ale navat heta, adznačajuć va UDAI MUS, nie spyniaje mnohich amataraŭ vypić. Tak, z amal 9 tys. niećviarozych vadzicielaŭ, zatrymanych u krainie z pačatku 2012 hoda, kala 900 sieli za rul transpartnaha srodku niećviarozymi paŭtorna na praciahu hoda paśla pryciahnieńnia da administracyjnaj adkaznaści za kiravańnie aŭtamabilem u stanie apjanieńnia. Značyć, praktyčna kožny 10-y amatar vypić i sieści za rul byŭ pryciahnuty da kryminalnaj adkaznaści. Ale znachodziacca tyja, chto i paśla pryhavoru suda znoŭ zatrymlivajecca ŭ stanie ałkaholnaha apjanieńnia za rulom aŭtamabila.

U suviazi z čym čarhovy raz paŭstała pytańnie ab uzmacnieńni adkaznaści i ab uviadzieńni bolš strohaha pakarańnia dla takich niepapraŭnych. U hramadskim asiarodździ ŭžo skłałasia ŭstojlivaje mierkavańnie ab nieabchodnaści ŭviadzieńnia kanfiskacyi transpartnaha srodku ŭ pravaparušalnikaŭ, jakija zatrymlivajucca za vadžeńnie ŭ stanie apjanieńnia paŭtorna. Hetuju mieru ciapier aktyŭna abmiarkoŭvajuć zacikaŭlenyja viedamstvy.

Viačasłaŭ Budkievič, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH