З пачатку года ў ДТЗ па віне п'яных кіроўцаў загінуў 21 чалавек

З пачатку 2012 года па віне нецвярозых кіроўцаў на тэрыторыі Беларусі адбылося 78 дарожна-транспартных здарэнняў, якія забралі жыцці 21 і пакалечылі 95 чалавек. Каля 20% ДТЗ, у якіх вінаваты вадзіцелі, звязаны з ўжываннем алкаголю перад паездкай.

«Заклапочанасць і абурэнне» Дзяржаўтаінспекцыі выклікае той факт, што, «нягледзячы на пастаяннае ўзмацненне адказнасці за кіраванне аўтамабілем у стане ап’янення, усё яшчэ застаецца немалой колькасць вадзіцеляў, якія дазваляюць сабе сесці за руль, прыняўшы перад гэтым пэўную дозу спіртнога». За суткі супрацоўнікі ДАІ затрымліваюць каля 100 такіх вадзіцеляў. У пятніцу і суботу гэтая лічба часта павялічваецца ўдвая.

Шматлікімі даследаваннямі даказана, што ваджэнне транспартнага сродку несумяшчальнае нават з самай лёгкай ступенню ап’янення.

У вадзіцеля губляецца адчуванне часу, пагаршаецца зрокава-прасторавае ўспрыяцце, памяншаецца мышачная сіла.

У адпаведнасці з заканадаўствам за першы выпадак язды ў стане ап’янення без наступстваў або перадачу права кіравання нецвярозаму, а таксама адмову ад праходжання агляду прымяняецца пазбаўленне права на кіраванне ўсімі транспартнымі сродкамі на тры гады і накладаецца штраф ад 15 да 35 базавых велічынь, што на сёння складае ад 1 млн. 500 тыс. да 3 млн. 500 тыс. рублёў. За паўторную «п’яную язду» на працягу года правапарушальнік прыцягваецца да адказнасці ўжо судом у адпаведнасці з Крымінальным кодэксам. У якасці пакарання прадугледжана пазбаўленне права займаць пэўныя пасады або займацца такім відам дзейнасці, як кіраванне транспартнымі сродкамі, на тэрмін да пяці гадоў са штрафам да 1.000 базавых велічынь, або папраўчымі работамі на тэрмін да двух гадоў, або арыштам на тэрмін да шасці месяцаў, а ў некаторых выпадках абмежаваннем або пазбаўленнем волі да двух гадоў.

Але нават гэта, адзначаюць ва УДАІ МУС, не спыняе многіх аматараў выпіць. Так, з амаль 9 тыс. нецвярозых вадзіцеляў, затрыманых у краіне з пачатку 2012 года, каля 900 селі за руль транспартнага сродку нецвярозымі паўторна на працягу года пасля прыцягнення да адміністрацыйнай адказнасці за кіраванне аўтамабілем у стане ап’янення. Значыць, практычна кожны 10-ы аматар выпіць і сесці за руль быў прыцягнуты да крымінальнай адказнасці. Але знаходзяцца тыя, хто і пасля прыгавору суда зноў затрымліваецца ў стане алкагольнага ап’янення за рулём аўтамабіля.

У сувязі з чым чарговы раз паўстала пытанне аб узмацненні адказнасці і аб увядзенні больш строгага пакарання для такіх непапраўных. У грамадскім асяроддзі ўжо склалася ўстойлівае меркаванне аб неабходнасці ўвядзення канфіскацыі транспартнага сродку ў правапарушальнікаў, якія затрымліваюцца за ваджэнне ў стане ап’янення паўторна. Гэтую меру цяпер актыўна абмяркоўваюць зацікаўленыя ведамствы.

• 0
• 0
• 0
• 0
• 0
• 0
• 0
• 0