Ministr ekanomiki Biełarusi Mikałaj Snapkoŭ zajaviŭ, što ŭ 2012 hodzie nie varta čakać pasłableńnia dziaržrehulavańnia cen.
«Sioleta — nie», — skazaŭ M. Snapkoŭ, kamientujučy mahčymaść libieralizacyi cenaŭtvareńnia, kantrol z boku dziaržavy nad jakim byŭ istotna ŭzmocnieny ŭ kancy kryzisnaha 2011 hoda paśla pieryjadu libieralizacyi ŭ pačatku minułaha hoda ŭ ramkach dyrektyvy prezidenta № 4.
U chodzie «pramoj linii» ŭ haziecie «Respublika» M.Snapkoŭ kanstatavaŭ, što «ŭ 2011 hodzie pa rehulavańni tavarnych hrup my faktyčna viarnulisia na ŭzrovień 2010 hoda, naturalna, my troški źmianili ekanamičnyja miechanizmy rehulavańnia na bolš prahresiŭnyja».
«U 2012 hodzie heta (žorstkaje dziaržrehulavańnie cen) zachavajecca», — padkreśliŭ ministr.
Pavodle jaho słoŭ, adčuvalnuju libieralizacyju cenaŭtvareńnia płanujecca pravieści ŭ 2013 hodzie. «Ale 2013 i 2014 hady, chutčej za ŭsio 2013 hod, biezumoŭna, budzie spałučany z tym, što my vierniemsia da hetaj temy, jak z punktu hledžańnia ekanamičnaj nieabchodnaści, tak i z punktu hledžańnia tych abaviazacielstvaŭ, jakija ŭ nas jość u ramkach padpisanych abaviazacielstvaŭ pa farmiravańni Adzinaj ekanamičnaj prastory», — skazaŭ M. Snapkoŭ.
Kamientujučy metazhodnaść zachavańnia maštabnaha dziaržrehulavańnia cen u hetym hodzie, jon adznačyŭ, što «ŭsio zaležyć ad biahučaj ekanamičnaj situacyi». «Inflacyja — heta samaje strašnaje zło, ź jakim najbolš składana zmahacca. Ministerstva ekanomiki ličyć, dy i ŭvieś śviet, ułasna, što tut usie srodki dobryja, u tym liku i administracyjnyja. U suśvietnaj praktycy, darečy, jany taksama prymianiajucca», — miarkuje ministr.
Jak paviedamlałasia, urad i Nacbank Biełarusi majuć namier u 2012 hodzie damahčysia źnižeńnia inflacyi da 19–22% z 108,7% u 2011 hodzie. U pieršym kvartale 2012 hoda spažyvieckija ceny vyraśli na 5%.
