Ssunuŭšy kampaniju na zimu, ułada, adnak, nie zamaroziła, jak mierkavała, aktyŭnaść tych, kaho kliča «admarozkami».
Apazycyjnyja kandydaty ŭdała vykarystali kvoty na televystupy dy pakazali zdolnaść da rezkich, niestandartnych, asymetryčnych dziejańniaŭ. I haradzienski fizyk, i marski piachotnik sparadzili rozhałas, na tle jakoha «narodnaje vieča» vyhladała blakłaj kserakopijaj źjezdaŭ KPSS.
Kali što j prymahniciła publiku da ekranaŭ, dyk heta impravizacyi hałoŭnaj dziejnaj asoby.
Na dumku mienskaha eksperta Valerja Karbaleviča, prezydent, zavočna raspačaŭšy niedyplamatyčnuju palemiku z kankurentami, parušyŭ sama mała dva kanony vybarčych technalohijaŭ. Pa-pieršaje, palityk pakazvaje słabaść dy niahnutkaść, kali pačynaje naŭprost, sa ślazoju ŭ hołasie, apraŭdvacca. Heta śviedčyć, što inicyjatyva — na inšym baku. Pa-druhoje, ułaziačy ŭ sprečku ź mieniej rejtynhavymi fihurami, favaryt mižvoli dadaje im ačkoŭ.
Skieptyki zaŭvažajuć: a chto ich budzie ličyć, hetyja ački?
Pa-pieršaje, kamu treba, padličać.
Miž inšym, «naviersie» taksama buduć viedać realny raskład, i jon moža ŭrazić.
Pa-druhoje, i sami vybarcy zazvyčaj empiryčna adčuvajuć, nakolki chto mocny. Spačatku Milinkievič, a ciapier užo j Kazulin peŭna pierasiahnuli tuju miažu papularnaści, kali dla ŭłady stanovicca ryzykoŭna «malavać» im hałasy ŭ miežach statystyčnaj pahrešnaści. Nadta ž mnohija nie pavierać. Ź inšaha boku, adnosna vialiki adsotak — heta stały propusk na lehalnaje palityčnaje pole.
Kiroŭnyja viarchi apynajucca miž dvuch ahnioŭ.
Naturalna, možna čakać i ździeklivych ličbaŭ, i zdušeńnia vuličnych pratestaŭ. Adnak pierachod na całkam hvałtoŭny scenar utrymańnia ŭłady (siarod Paŭličenkavych arłoŭ takoje nazyvajecca «pakavać pa poŭnaj») hranična abvostryć adnosiny z Zachadam. I tady moža vyśvietlicca, što dasiul u jaho prosta ruki nie dachodzili da biełaruskaha pytańnia.
Ź inšaha boku, i pra pazycyju Maskvy nia varta mierkavać pa vykazvańniach pasłužlivych vizyteraŭ kštałtu Hryzłova. U rasiejskaj elicie jość dastatkova razumnyja hałovy, kab nie składać usie jajki ŭ adzin košyk. Jość versija, što mienavita Maskva (za jakoj stajaŭ dziadźka Sem) pracisnuła rehistracyju Milinkieviča.
Perspektyva staršynioŭstva ŭ «vialikaj vosiemcy» taksama zmušaje Kreml trochi ŭščuvać chaŭruśnika, chacia b kuluarna, za zusim užo brutalny antydemakratyzm. Ale bolej rasiejcy buduć pierajmacca ź inšaje nahody. Nieŭzabavie, imavierna, pačniecca čarhovaje vyśviatleńnie stasunkaŭ vakoł «Biełtranshazu», jaki dla «Hazpromu» ŭžo kolki času by morkaŭka pierad pysaj voślika.
U vyniku i na zamiežnaj arenie biełaruskaje kiraŭnictva ryzykuje trapić miž mołatam dy kavadłam. Kali i Zachad, i Rasieja navažacca, chaj sabie z roznych pryčynaŭ, «pakavać pa poŭnaj», to mała nie padasca.
Rasiejski palitolah Siarhiej Karahanaŭ pradrakaje, što 19-ha Łukašenka atrymaje Piravu pieramohu. U interviju «BiełHazietie» Karahanaŭ zaŭvažyŭ, što «doŭha takoha kštałtu lidery ŭ sučasnaj Eŭropie nie zatrymlivajucca».
Karahanaŭ časta kaža toje, čaho nia moža ŭsłych skazać Pucin.
