23-hadovy Faryd navučaŭsia na histaryčnym fakultecie BDU. Jak paviedamiŭ kiraŭnik pres-słužby Upraŭleńnia Śledčaha kamiteta pa Minsku Alaksandr Hierasimaŭ, chłopiec skončyŭ žyćcio samahubstvam unačy na 11 maja.
Pa słovach Hierasimava, małady čałaviek rychtavaŭsia da samahubstva. Jon zamknuŭ dźviery ŭ pakoj, zaviesiŭ firanki. Usie rečy i adzieńnie raskłaŭ pa stosach.
Na adnym ź ich była zapiska, u jakoj Faryd padrabiazna raśpisaŭ, kamu što pieradać paśla jaho śmierci. Astatnija ž rečy jon nakazaŭ addać u dziciačy dom i biednym.Jašče ŭ adnoj zapiscy było adznačana, što pryčynu svajho ŭčynku małady čałaviek zapisaŭ na telefon. Ale pakul mabilnik znachodzicca na ekśpiertyzie i śledčyja nie viedajuć, što heta za zapis i na jakoj movie.
Susiedzi Faryda pa pakoi paviedamili śledčym, što małady čałaviek časta naviedvaŭ hulniavyja kłuby i niaredka prajhravaŭ u ich hrošy. I apošnim časam jon byŭ čymści zasmučany — chadziŭ panury.
Ustanoŭlena, što kala dvuch hadoŭ tamu student sprabavaŭ parezać sabie vieny. Pryčyna — nieparazumieńnie ź dziaŭčynaj.
Praź niejki čas paśla taho, jak stała viadoma pra samahubstva, da internata źjechalisia pradstaŭniki azierbajdžanskaj dyjaspary. Heta nie adziny prykład takoj salidarnaści pradstaŭnikoŭ hetaha naroda. Paśla taho, jak niadaŭna na minskaj kalcavoj darozie ŭ avaryi zahinuŭ azierbajdžaniec, na miesca trahiedyi źjechalisia dziasiatki jaho suajčyńnikaŭ.
Pavodle dadzienych Suśvietnaj arhanizacyi achovy zdaroŭja, u Biełarusi adzin z vysokich u śviecie pakazčykaŭ pa kolkaści samahubstvaŭ na 100 tysiač nasielnictva. U 2007 heta ličba skłała 57,5 vypadkaŭ. Pobač ź Biełaruśsiu pa hetym pakazčyku znachodziacca tolki Rasija, Kazachstan, Šry-Łanka, Vienhryja.
***
Telefony słužby ekstranaj psichałahičnaj dapamohi
Kruhłasutkavaja słužba ekstranaj psichałahičnaj dapamohi «Telefon davieru»: 8 (017) 202-04-01
Respublikanskaja telefonnaja «haračaja linija» pa akazańni psichałahičnaj dapamohi niepaŭnahadovym, što trapili ŭ kryzisnuju situacyju: 8-801-100-16-11.
