Samy stary dakumient u dziaržarchivach Biełarusi datavany 1391 hodam 8

Pra heta paviedamiŭ dyrektar departamienta pa archivach i spravavodstvie Ministerstva justycyi Uładzimir Adamuška 22 maja ŭ Minsku na pres-kanfierencyi, pryśviečanaj 90-hodździu stvareńnia orhanaŭ archiŭnaj spravy i sistemy dziaržaŭnych archiŭnych ustanoŭ i 85-hodździu stvareńnia nacyjanalnaha archivu.

«Usiaho ŭ našych archivach znachodziacca 58 unikalnych dakumientaŭ. Usie jany zachoŭvajucca ŭ śpiecyjalnych schoviščach, pry śpiecyjalnych umovach, u śpiecyjalnych siejfach. Samy stary z dakumientaŭ datavany 1391 hodam. Taksama ŭ nas jość pierhamientnyja hramaty XIV–XVII stahodździaŭ, aktavyja knihi sudovych ustanoŭ Biełarusi XV–XVIII stahodździaŭ», — padkreśliŭ Adamuška.

Dostup da takich rarytetnych dakumientaŭ abmiežavany.

Jak rastłumačyŭ Adamuška, niama sensu ryzykavać i davać dostup da takich relikvij navat za vialikija hrošy: «Kali niešta zdarycca, heta budzie kaštavać nam u razy daražej. Plus takija dakumienty pavinny zachoŭvacca tolki ŭ śpiecyjalnych umovach».

Pavodle słoŭ kiraŭnika departamienta, u dziaržaŭnych archivach Biełarusi zaraz znachodziacca bolš jak 12 miljonaŭ spraŭ, 300 tysiač ź ich — dakumienty asablivaj kaštoŭnaści. Jašče 6 miljonaŭ dakumientaŭ čakajuć svajho pryjomu ŭ archiŭ. «Kali pastavić spravu da spravy, to atrymajecca darožka daŭžynioj amal 200 kiłamietraŭ», — skazaŭ Adamuška.

Archivy Biełarusi — adny z samych adkrytych na prastory byłoha SSSR, padkreśliŭ śpiecyjalist. «Naprykład, u nas rassakrečany 93% partyjnych archivaŭ. My adny ź pieršych pakazali hramadskaści dakumienty, što tyčacca čarnobylskaj trahiedyi, pryčym my apublikavali samyja cikavyja dakumienty, 1986–1991 hadoŭ», — zaznačyŭ Adamuška.

U sistemu archiŭnych orhanaŭ i ŭstanoŭ Biełarusi ŭvachodziać šeść respublikanskich, dzieviać abłasnych, 16 zanalnych archivaŭ, dźvie navukova-daśledčyja ŭstanovy i dźvie łabaratoryi.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH