Tak, dla atrymańnia adnarazovaj vizy biez zaprašeńnia biełarusam, jakija vyjazdžajuć u Litvu na termin da 30 dzion, aprača polisa miedycynskaha strachavańnia nieabchodna pradstavić padćviardžeńnie najaŭnaści finansavych srodkaŭ na termin znachodžańnia ŭ Litvie z raźliku 40 jeŭra ŭ dzień. Paćvierdzić płaciežazdolnaść suiskalniki vizy mohuć pry dapamozie ŭłasna padpisanych darožnych čekaŭ i ich kopij, aktualnaj daviedkaj z banka ab najaŭnaści srodkaŭ abo vypiskaj z rachunku kredytnaj kartki. Pryčym tym, chto vyjazdžaje na padstavie zaprašeńniaŭ, paćvierdžanych Departamientam mihracyi pry Ministerstvie ŭnutranych spraŭ Litvy, nie treba padćviardžać najaŭnaść hrašovych srodkaŭ.
Dla atrymańnia šmatrazovaj vizy hramadzianie Biełarusi, a taksama hramadzianie išnych dziaržaŭ, jakija majuć dazvoł na pražyvańnie ŭ Biełarusi, ciapier zmohuć źviartacca tolki ŭ konsulskuju słužbu Litoŭskaj Respubliki ŭ miežach konsulskaj akruhi, dzie jany žyvuć. Naprykład, pasolstva Litvy ŭ Minsku nie budzie absłuhoŭvać žycharoŭ Bresckaj i Hrodzienskaj abłaściej.
U dypmisii zaznačyli, što zaprašeńnie dla afarmleńnia vizy nie spatrebicca dla členaŭ siamiej asob litoŭskaha pachodžańnia, jakija vyjazdžajuć razam; členaŭ siamiej asob, jakija zachavali prava na hramadzianstva Litoŭskaj Respubliki; asob, jakija majuć prava na časovaje i pastajannaje pražyvańnie ŭ dziaržavach Jeŭrasajuza. Zaprašeńnie taksama nie patrebna dla asob, čyje hramadzianskija pravy adnoŭleny zhodna z zakonam Litoŭskaj Respubliki «Ab adnaŭleńni pravoŭ asob, represavanych za spraciŭleńnie akupacyjnym režymam», i členam siamiej, jakija vyjazdžajuć ź imi. U hetym vypadku nieabchodna pradstavić daviedku ab terminie asudžeńnia, źniavoleńnia, ssyłki abo inšaha abmiežavańnia voli. Zaprašeńnie taksama nie patrebna dla tych, kamu na pravie ŭłasnaści naležyć zarehistravanaje ŭ Litvie pamiaškańnie pamieram nie mienš za 14 kvadratnych mietraŭ žyłoj płoščy: adnapakajovy žyły dom, jaho častka, kvatera abo inšaje pamiaškańnie, pryznačanaje dla pražyvańnia asoby abo siamji. Na takich ža ŭmovach mohuć vyjazdžać členy siamji, kali na kožnaha ź ich prypadaje 14 kvadratnych mietraŭ žyłoj płoščy. Zhodna z novymi praviłami, u zaprašeńni nie majuć patreby asoby va ŭzroście 65 hadoŭ i starej i tyja, chto naviedvaje miescy pachavańniaŭ blizkich svajakoŭ na terytoryi Litvy na termin da 10 dzion (dva razy na praciahu hoda pry najaŭnaści dakumienta, što paćviardžaje zachavanaść mahiły).
U pasolstvie taksama padkreślili, što 1 krasavika spyniajecca vydača hrupavych viz.
Padavać dakumienty na atrymańnie litoŭskaj vizy treba nie raniej čym za try miesiacy da pajezdki ŭ Litvu.
Jak patłumačyli BiełaPAN u pasolstvie, zhadanyja źmianieńni źviazany z budučym ustupleńniem Litvy ŭ šenhienskuju zonu.
