Były namieśnik staršyni Smalavickaha rajvykankama atrymaŭ 4 hady turmy

Minski abłasny sud pryhavaryŭ byłoha namieśnika staršyni Smalavickaha rajvykankama da čatyroch z pałovaj hadoŭ pazbaŭleńnia voli. Jamu taksama zabaroniena zajmać pasady, źviazanyja z vykanańniem arhanizacyjna-rasparadčych, administracyjna-haspadarčych funkcyj, funkcyj pradstaŭnika ŭłady terminam na 5 hadoŭ. Pra heta BiełaPAN paviedamiŭ prakuror adździeła pa baraćbie z karupcyjaj i arhanizavanaj złačynnaściu prakuratury Minskaj vobłaści Uładzimir Niepakupny. Abvinavačańnie ŭ sudzie padtrymana abłasnoj prakuraturaj.

Pavodle słoŭ Uładzimira Niepakupnaha, čynoŭnik pryznany vinavatym va ŭčynieńni złačynstvaŭ, praduhledžanych častkaj 3 artykuła 424 i artykułam 428 Kryminalnaha kodeksa. Heta — złoŭžyvańnie ŭładaj ci słužbovymi paŭnamoctvami i słužbovaja chałatnaść.

Pavodle pradjaŭlenaha abvinavačańnia čynoŭnik, źjaŭlajučysia namieśnikam staršyni Smalavickaha vykankama i staršynioj kamisii pa žyllovych pytańniach, niezakonna napisaŭ 12 sakavika 2010 hoda zajavu ad imia svajho syna z prośbaj vydzielić ziamielny ŭčastak i ŭzhadniŭ prajekt rašeńnia ad 23 krasavika 2010 hoda ab vydzialeńni synu ŭčastka jak asobie, jakaja maje patrebu ŭ palapšeńni žyllovych umoŭ. Pry hetym nie zrabiŭ zachadaŭ kab źniać syna z uliku hramadzian, jakija majuć patrebu ŭ palapšeńni žyllovych umoŭ, niahledziačy na toje, što pavodle dahavora ad 5 žniŭnia 2009 hoda toj nabyŭ kvateru, i z pryčyny hetaha straciŭ status asoby, jakaja maje patrebu ŭ palapšeńni žyllovych umoŭ, i adpaviedna prava na atrymańnie ziamielnaha ŭčastka dla budaŭnictva žyłoha doma.

Rašeńniem Smalavickaha rajvykankama ad 23 krasavika 2010 hoda, jakoje ŭzhodniena abvinavačvanym jak słužbovaj asobaj Smalavickaha rajvykankama, jaho synu biaspłatna, jak asobie, jakaja maje patrebu ŭ palapšeńni žyllovych umoŭ, byŭ vydzieleny ŭ pažyćciovaje spadčynnaje vałodańnie ziamielny ŭčastak dla budaŭnictva i absłuhoŭvańnia žyłoha doma ŭ Smalavičach płoščaj 0,1500 ha i kadastravym koštam bolš jak 31 miljon rubloŭ. Razam z tym u adpaviednaści ź dziejnym zakanadaŭstvam syn abvinavačvanaha faktyčna nie źjaŭlaŭsia asobaj, jakaja maje patrebu ŭ palapšeńni žyllovych umoŭ, i mieŭ prava tolki na vypłatnaje vydzialeńnie ŭčastka, u suviazi z čym dziaržavie byŭ naniesieny ŭron u bujnym pamiery.

Prysud Minskaha abłasnoha suda byŭ abvieščany 17 studzienia 2012 hoda i niadaŭna nabyŭ zakonnuju moc.

• 0
• 0
• 0
• 0
• 0
• 0
• 0
• 0