Rasijskija fanaty prajšli maršam pa Varšavie

Polskija «kiboły» nie stolki bilisia z rasiejcami, kolki vyśviatlali adnosiny miž saboj.

Akryvaŭleny rasijski fanat.

Umiašańnie palicyi.

Polskija fanaty atakujuć.

Marš rasiejskich fanataŭ.

Na Marš vyjšli 5 tysiač rasiejskich fanataŭ.

Niekatoryja z rasiejcaŭ prynieśli zabaronienuju ŭ Polščy savieckuju simvoliku. Palicyja hladzieła na toje skroź palcy.

Rasiejskija fanaty.

Kala 5000 rasiejskich fanataŭ, zajmajučy prastoru ad Nacyjanalnaha muzieja da ronda de Hola, razroźnienymi hrupami kiravalisia da stadyjona. Atmaśfiera była pazityŭnaj, adznačajuć polskija reparciory.

Siarod rasiejcaŭ byli ahresiŭna nastrojenyja asoby, ale bolšaść prosta cicha išła na matč.

Marš rasijanaŭ sprabavała spynić hrupa polskich fanataŭ — kala sotni čałaviek.

Jany skandavali «Ruskija k…vy», «Ruskija — dachaty», «Raz siarpom, raz mołatam čyrvonuju hałotu». Ahresiŭnych fanataŭ akružyła palicyja. Palicyja taksama zabłakavała kłub Wieżyca, vakoł jakoha sabralisia polskija zaŭziatary.

Adnak za natoŭpam rasiejcaŭ źbirałasia ŭsio bolš i bolš polskich fanataŭ, jakich strymlivaŭ kardon palicyi. Dajšło da pary surjoznych sutyčak miž palakami i rasiejcami, jakija adstali ad svaich. Kali rasijskija fanaty sychodzili z mosta Paniatoŭskaha, palaki ich atakavali.

Chulihany byli apranutyja ŭ čornaje, było ich niekalki dziasiatkaŭ. U spravu pajšli vyrvanyja z parenčaŭ pruty, pietardy i kamieńnie.

Taksama polskija fanaty-kiboły atakavali niekalkich rasiejcaŭ, jakija nieśli vialikija ściahi kala ronda Vašynhtona: pajšli na ich z kamieńniami, pačali bić nahami, valić na ziamlu. Situacyja była vielmi tryvožnaja.

Palicyja ŭžyła vadamioty i haz, źjaviŭsia dym. Reparciory taksama paviedamlali, što čuli streły.

Nastupnaja hrupa kala sotni zamaskavanych kibołaŭ kinułasia na palicyjantaŭ z… darožnymi znakami. Raŭli, siarod inšaha, «Ruska k…rva» (na svaju palicyju!). U adkaz udaryli vadamioty. Hrupa raściarušyłasia ŭ vakolicach Nacyjanalnaha stadyjona.

Rasiejcy nie marudzili z adpłataj. Reparciory bačyli, jak

hrupa rasiejskich fanataŭ u kapiušonach vyskačyła naŭpierad palicyi i raspraviłasia z palakami, jakija vykrykvali abrazy.

«Atrymaŭ butelkaj piva, na ščaście ŭ łokać», «Bačyŭ fanata, jaki daŭsia hałavoj ab asfalt. Jon byŭ nieprytomny», — pisaŭ u Tvitary spartovy ahladalnik GW.«Hrupy fanataŭ ruchajucca da stadyjona. Siarod ich jość rasiejcy. Adzin ź ich pavaliŭsia, ale nie tamu, što byŭ paranieny: jon pjany», — piša ź miesca padziej karespandent Gazety Wyborczej.

Navat kali rasiejcy ŭžo dajšli da stadyjonu, nad Alejami Jerazalimskimi stajaŭ dym.

Palicyja, užyvajučy vadamioty i šumavyja hranaty, razhaniała polskich fanataŭ, jakija sprabavali «ščamić» rasiejcaŭ, što kiravalisia na matč.

Palicyja zatrymała bolš za 100 chulihanaŭ. Na videa zaŭvažna, što palicyjanty bačyli svaju hałoŭnuju zadaču ŭ tym, kab «błakavać i raśsiakać» hrupy ahresiŭnych fanataŭ, nie dazvalajučy im sutykacca.

Polskija fanaty masava napadali na rasijskich haściej i ŭłasnych palicyjantaŭ, bilisia miž saboj. Rasiejcy špurlalisia fajerami.

Miascovyja žychary pachavalisia. «Soram, prosta soram! Palicyi treba bić hetaje bydła!» — voś typovy vodhuk u polskim internecie na padziei ŭ Varšavie.

Biasčynstvy polskich fanataŭ daŭno stali hramadskaj prablemaj u Polščy. Joj zajmaŭsia navat premjer Tusk. Pavodziny rasijskich turystaŭ za miažoj taksama časta vychodziać za ramki kanviencyj.

Hulnia Rasija — Polšča pačałasia, a 21:45.