Na hety raz abvieščany zbor srodkaŭ na vykup asobnika «Vialikaje mastactva artyleryi» 1651 hoda.
Muziej historyi Mahilova abjaviŭ ab pačatku zboru srodkaŭ dla vykupu falijanta — knihi «Vialikaje majsterstva artyleryi» 1651 hoda vydańnia aŭtarstva Kazimira Siemianoviča — i źviarnuŭsia pa finansavuju dapamohu da pradpryjemstvaŭ i arhanizacyj.
«My źviartajemsia da pradpryjemstvaŭ i arhanizacyj, jakija mohuć akazać nam takuju dapamohu», — skazaŭ BiełaPAN dyrektar muzieja Alaksiej Baciukoŭ.Jon zaznačyŭ, što zbor srodkaŭ śpiecyjalna nie abviaščajecca siarod hramadzian, kab nie pieratvaryć takija akcyi ŭ «niejki sieryjał». U mai, dziakujučy zboru srodkaŭ i dapamozie sponsaraŭ, u Maskvie za 45 tysiač dołaraŭ byŭ vykupleny Statut Vialikaha kniastva Litoŭskaha 1588 hoda vydańnia.
Kaštoŭnaść knihi «Vialikaje majsterstva artyleryi» abumoŭlena tym, što ŭ joj aŭtar — biełaruski šlachcic, jaki, pavodle adnoj ź viersij, moh naradzicca na Mahiloŭščynie, vykazaŭ ideju šmatstupieńčataj rakiety, tłumačyć Baciukoŭ. Takim čynam, Siemianovič staŭ adnym ź pieršych raspracoŭščykaŭ teoryi rakietabudavańnia i artyleryi.
«Kniha stała adnoj z fundamientalnych rabot pa majsterstvie artyleryi, zakłała tearetyčnuju asnovu rakietabudavańnia.U pryvatnaści, miarkujecca, što idei, zakładzienyja ŭ joj, papiaredničali słavutym „Kaciušam“ i šmatstupieńčatym rakietam, jakija palacieli ŭ kosmas. Naš ziamlak za 300 hadoŭ da kaśmičnaj ery abhruntavaŭ teoryju šmatstupieńčataj rakiety», — kaža dyrektar muzieja.
Upieršyniu Kazimir Siemianovič apublikavaŭ hetuju pracu ŭ 1650 hodzie ŭ Amsterdamie. Kniha była napisana na łacinie. Na nastupny hod, znoŭ ža ŭ Amsterdamie, aŭtar pieravydaje jaje, ale ŭžo pierakładzienuju na francuzskuju movu. Heta vydańnie i maje namier vykupić u minskaha ŭładalnika falijanta za 15 tysiač jeŭra mahiloŭski muziej.Ciapierašni ŭładalnik rarytetu hatovy pačakać, pakul nie budzie sabrana nieabchodnaja suma, da kanca leta.
U svaju čarhu pra aŭtara staražytnaj knihi viadoma mała. «Kazimir Siemianovič — zahadkavaja, tajamničaja asoba. Dakładna viadoma, dzie jon naradziŭsia, dzie žyŭ, — kaža Alaksiej Baciukoŭ. — Jon byŭ, chutčej za ŭsio, katolik słavianskaha pachodžańnia. U samoj knizie Siemianovič nazyvaje siabie lićvinam, z čaho robicca vysnova, što jon rodam ź Biełarusi».
Kamientary