Apošnija vyniki ekśpierymientaŭ nabliziać ich da stvareńnia univiersalnaj teoryi Suśvietu, abo «teoryi ŭsiaho».
Jeŭrapiejskaja arhanizacyja jadziernych daśledavańniaŭ CERN abviaściła siońnia pra adkryćcio novaj elemientarnaj čaścinki, padobnaj da lehiendarnaha bazona Hihsa — fundamientalnaj čaścinki, isnavańnie jakoj było tearetyčna pradkazanaje ŭ 1960-ch hadach.
«Palavańnie» na bazon Hihsa — adzinym adsutnym elemientam tak zvanaj Standartnaj madeli — viadziecca z 1980-ch hadoŭ i ciapier jak nikoli blizkaje da pośpiechu, dziakujučy ekśpierymientam na Vialikim adronnym kałajdary (VAK).
Ab adkryćci novaj čaścinki było abvieščana na navukovym sieminary CERN u Ženievie, jaki tranślavaŭsia na ŭvieś śviet.Na hetaje mierapryjemstva byli zaprošanyja aŭtary tak zvanaha «Hihsaŭskaha miechanizma», u tym liku i sam Piter Hihs, čyjo imia nosić niaŭłoŭnaja «čaścinka Boha». Piter Hihs pryznaŭsia, što nie čakaŭ, što adkryćcio zdarycca pry jaho žyćci.
Histaryčnyja vyniki ekśpierymientaŭ na Vialikim adronnym kałajdary byli abvieščanyja pradstaŭnikami dźviuch kamandaŭ navukoŭcaŭ — CMS i ATLAS. «U abodvuch ekśpierymientach była vyjaŭlena novaja čaścinka z vahoj u rajonie 125-126 hihahaelektronvolt (HeV)», — paviedamlajecca ŭ pres-relizie CERN.
Adnak aŭtary adkryćcia padkreślili, što znachodziacca tolki ŭ pačatku šlachu, pakolki im jašče treba budzie vyznačyć, ci źjaŭlajecca adkrytaja čaścinka tym samym bazonam Hihsa.
Nastupnym krokam navukoŭcaŭ stanie vyznačeńnie dakładnych charaktarystyk novaj čaścinki i vyśviatleńnie jaje roli ŭ pabudovie Suśvietu. Fiziki spadziajucca, što apošnija vyniki ekśpierymientaŭ nabliziać ich da stvareńnia univiersalnaj teoryi Suśvietu, abo «teoryi ŭsiaho».
Standartnaja madel, jakaja źjaŭlajecca adnoj z asnoŭ sučasnaj fiziki, biezdakorna apisvaje ŭłaścivaści i ŭzajemadziejańni ŭsich viadomych elemientarnych čaścinak, adnak nie daje adkazu na fundamientalnaje pytańnie: čamu bolšaść z hetych čaścinak majuć vahu? Miechanizm, prapanavany Hihsam, daje adkaz na hetaje pytańnie, pradkazvajučy isnavańnie fundamientalnaj čaścinki — bazona Hihsa.
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny30
Kamientary