Kožny šosty biełarus — samahonščyk 10

Pavodle acenki ekśpiertaŭ Instytuta sacyjałohii Nacyjanalnaj akademii navuk, prykładna 15% darosłaha nasielnictva Biełarusi zajmajecca samahonavareńniem.

Jak paviedamlajecca na aficyjnym sajcie Ministerstva achovy zdaroŭja, zychodziačy z hetaha možna zrabić vysnovu, što ŭzrovień realnaha spažyvańnia śpirtnych napojaŭ u Biełarusi składaje bolš jak 15 litraŭ na dušu nasielnictva.

Dla paraŭnańnia možna adznačyć, što ŭ Rasii faktyčny ŭzrovień spažyvańnia śpirtnych napojaŭ na adnaho čałavieka składaje 18–20 litraŭ. Pavodle standartaŭ Suśvietnaj arhanizacyi achovy zdaroŭja, najbolšym krytyčnym pakazčykam źjaŭlajecca 8 litraŭ absalutnaha ałkaholu na adnaho čałavieka. U vypadku pieravyšeńnia hetaj normy adbyvajecca pastupovaja dehradacyja nacyi ŭ sacyjalna-demahrafičnych, ekanamičnych, sacyjalnych, kulturnych i inšych adnosinach.

Orhanami ŭnutranych spraŭ va ŭzajemadziejańni z zacikaŭlenymi arhanizacyjami pastajanna arhanizoŭvajucca rejdy pa vyjaŭleńni aparataŭ i mini-zavodaŭ pa vyrabie samahonu i samahonnaj brahi, spynieńni faktaŭ samahonavareńnia ŭ lasnych uhodździach. Tak, u 2011 hodzie źniščana bolš jak 1 młn. 114 tys. litraŭ samahonu i samahonnaj brahi, prykładna 413,5 tys. litraŭ falsifikavanych śpirtnych napojaŭ, u tym liku vyrablenyja na likioraharełačnych pradpryjemstvach ź niajakasnaj syraviny i z parušeńniem patrabavańniaŭ techničnaha rehłamientu. Praduchilena 11 tys. 275 faktaŭ niezakonnaj realizacyi i zachoŭvańnia ałkaholnaj pradukcyi.

Da administracyjnaj adkaznaści za vyrab ci nabyćcio samahonu i brahi, zachoŭvańnie samahonnych aparataŭ pryciahnuta 7.132 čałavieki, za parušeńnie patrabavańniaŭ dekreta prezidenta ad 9 vieraśnia 2005 hoda № 11 «Ab udaskanaleńni dziaržaŭnaha rehulavańnia vytvorčaści i abarotu ałkaholnaj, niecharčovaj pradukcyi z utrymańniem niecharčovaha etyłavaha śpirtu» — 2 tys. 289 asob.

Jak adznačajuć u Ministerstvie achovy zdaroŭja, kolkaść asob z zaležnaściu ad ałkaholu, chto staić na dyspansiernym uliku ŭ narkałahičnych dyspansierach, na 1 červienia składaje 178 tys. 33 čałavieki. Upieršyniu pastaŭlenyja na dyspansierny ŭlik za piać miesiacaŭ 2012 hoda 10.003 čałavieki.

Instytutam sacyjałohii NAN Biełarusi praviedziena daśledavańnie kultury spažyvańnia śpirtnych napojaŭ i sacyjalnaj efiektyŭnaści antyałkaholnaj palityki.

Vyśvietliłasia, što na raspaŭsiudžanaść pjanstva i ałkahalizmu asnoŭny ŭpłyŭ akazvajuć nastupnyja faktary: nizki ŭzrovień žyćcia nasielnictva (43,5%), adsutnaść cikavych zaniatkaŭ u volny čas (38,3%), niapravilnaje vychavańnie ŭ siamji (37,5%), niahody paŭsiadzionnaha žyćcia (36,4%), «piciejnyja» tradycyi i zvyčai (34,8%), dastupnaść nabyćcia śpirtnych napojaŭ (34,3%).

Vialikaje značeńnie taksama maje vialiki abjom vytvorčaści i prodažy śpirtnych napojaŭ (25,7%), siamiejnyja svarki i kanflikty (26,3%), šyrokaja rekłama śpirtnych napojaŭ na telebačańni i inšych ŚMI (22,2%), niedastatkovaja antyałkaholnaja aśvieta i vychavańnie (19,9%), nizkija ceny na śpirtnyja napoi (19,1%) i inšyja faktary.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH