Łazavik u Aŭstryju nie jedzie.
Sakratar Centrvybarkama Biełarusi Mikałaj Łazavik paćvierdziŭ, što jon i staršynia CVK Lidzija Jarmošyna atrymali zaprašeńni na kanfierencyju Arhanizacyi pa biaśpiecy i supracoŭnictvie ŭ Jeŭropie (ABSIE) «Demakratyčnyja vybary i nazirańnie za imi», jakaja projdzie 12–13 lipienia ŭ Vienie.
Infarmacyju pra toje, što Jarmošyna i Łazavik, uniesienyja ŭ śpisy nieŭjaznych u krainy ES «za falsifikacyi padčas vybaraŭ», zaprošany na kanfierencyju ABSIE ŭ stalicu Aŭstryi, raspaŭsiudziŭ u kancy minułaha tydnia sa spasyłkaj na ananimnuju krynicu
«Jak praviła, na takija kanfierencyi źbirajucca kiraŭniki centrvybarkamaŭ krain — udzielnic ABSIE, kiraŭniki mižnarodnych arhanizacyj, jakija zajmajucca manitorynham vybaraŭ, a taksama kiraŭniki ABSIE i Biuro pa demakratyčnych instytutach i pravach čałavieka ABSIE», — adznačyŭ Łazavik.
Pavodle jaho słoŭ, kiraŭnictva CVK Biełarusi ŭdzielničała ŭ takich kanfierencyjach i ŭ minułyja hady. Znachodžańnie ŭ śpisach nieŭjaznych pieraškadžaje Centrvybarkamu «vybudoŭvać paŭnacennyja kantakty sa svaimi kalehami z krain Jeŭropy», zajaviŭ sakratar kamisii. «Tak, letaś ja nie zmoh udzielničać u sustrečy kiraŭnikoŭ centrvybarkamaŭ u Małdovie», — raskazaŭ Łazavik.
«Adnak hetym razam, vierahodna, kiraŭnictva ABSIE choča atrymać zaprašeńnie dla nazirańnia za vybarami ŭ Biełarusi, tamu my i byli zaprošany na kanfierencyju», — vykazaŭ mierkavańnie jon.
Sakratar CVK paviedamiŭ, što vizy ŭ Aŭstryju byli adkryty jak na jaho imia, tak i na imia Lidzii Jarmošynaj. Adnak palacić u Vienu tolki Jarmošyna: Łazavik zastaniecca kiravać kamisijaj, u jakoj šmat pracy napiaredadni vieraśniovych vybaraŭ u parłamient.
Varta adznačyć, što 7 lipienia Parłamienckaja asambleja ABSIE na siesii ŭ Manaka pryniała rezkuju rezalucyju pa Biełarusi. U dakumiencie ŭtrymlivajecca zaklik nieadkładna vyzvalić i apraŭdać usich palitźniavolenych, pavažać svabodu pieramiaščeńnia svaich hramadzian, uklučajučy palityčnych aktyvistaŭ, u Biełarusi i za miažu, spynić nacisk i pieraśled u dačynieńni da hramadzianskaj supolnaści, prafsajuzaŭ, niezaležnych ŚMI i pravaabaroncaŭ, a taksama inšyja patrabavańni.
Kamientary