Palitolahi lubiać razvažać pra punkty bifurkacyi — momanty, kali historyja mahła pajści pa-inšamu. Ci byli takija šancy ŭ postsavieckaj Biełarusi?
Viadoma, historyja nie ciarpić umoŭnaha ładu. I ŭsio ž... Pračytajcie voś hety tekst.
PREZIDENT BIEŁARUSI VIARNUŬSIA Z FRANCYI Z NAMIERAM PRAVIESCI REFIERENDUM DLA ZAPAZYČAŃNIA "U FRANCUZSKAJ DEMAKRATYI MNOHAHA"
13 lipienia zaviaršyŭsia vizit u Francyju prezidenta Biełarusi Alaksandra Łukašenki.
Paśla pryziamleńnia samalota z aficyjnaj biełaruskaj delehacyjaj u aeraporcie "Minsk-2" A.Łukašenka ŭ hutarcy z žurnalistami zajaviŭ, što zastaŭsia zadavoleny vizitam. Pa jaho słovach, u Francyi byli padpisanyja piać pahadnieńniaŭ, na padstavie jakich miljony dołaraŭ buduć inviestavanyja ŭ biełaruskuju ekanomiku, u tym liku ŭ vytvorčaje abjadnańnie "BiełVAR". Aprača taho, paviedamiŭ kiraŭnik dziaržavy, na stadyi prapracoŭki — adkryćcio francuzskaj kredytnaj linii na sumu 200-300 miljonaŭ dołaraŭ ZŠA pad realizacyju prajektaŭ francuzskich kampanij u Biełarusi. (...) Kali zhadany prajekt ažyćciavicca, adznačyŭ A.Łukašenka, "heta budzie praryŭ na vosi Maskva — Minsk — Paryž".
Prezident znoŭ zajaviŭ ab mahčymasci praviadzieńnia ŭsiebiełaruskaha refierendumu pa źmianienni Kanstytucyi respubliki. "Dumaju, — padkresliŭ jon z hetaj nahody, — my šmat što zapazyčym u francuzskaj demakratyi".
Heta nie fantastyka, a natatka BiełaPAN. Zastajecca paviedamić hod: 1996-y.
Ale z nabytkaŭ francuskaj demakratyi ŭ nas tady stali pijaryć adno što siamihadovy prezydencki termin. Praŭda, zakładać takuju kadencyju ŭ biełaruskuju kanstytucyju u vyniku ŭsio ž nie navažylisia. Nieŭzabavie, darečy, i francuzy ŭ siabie skaracili heny termin da piaci hadoŭ.
Zrešty, hałoŭnaje ž nie ŭ kadencyjach, a ŭ mechanizmach zabieśpiačeńnia ŭłady. Praź niejki čas u Biełarusi budzie zapuščana žaleznaja mašyna "elehantnych pieramoh".
Mienavita referendum-96, kančatkova złamaŭšy balans miž halinami ŭłady, stanie šokam dla Zachadu i pakładzie pačatak chałodnaj vajnie. Pahadnieńnie z Eŭraźviazam (darečy, padpisanaje ŭ Bruseli Łukašenkam!) pieratvorycca ŭ nikčemnuju papierku. Zaprašeńni źmieniacca vizavymi tabu.
A tady, na pačatku prezydenckaj ery, Stary Śviet pa inercyi jašče razhladaŭ Biełaruś jak junuju perspektyŭnuju demakratyju, vitaŭ aficyjnaha lidera ŭ svaich stalicach dy hatovy byŭ raźlicca tut investycyjnym daždžom. I natchniony małady prezydent, bačycie, ambicyjna kazaŭ pra voś Maskva — Miensk — Paryž.
Praź niejki čas myślaram z dyplamatyčnaha viedamstva choćki-niachoćki daviadziecca zamiest vosi prydumlać "vialikuju duhu vonkavaj palityki", jakaja kryva abychodzić eŭrapiejskija stalicy. A prapahanda stanie davodzić, što hniły Zachad źnienavidzieŭ Biełaruś za samastojny kurs dy intehracyju z Rasiejaj.
Fakt toje, što brama ŭ supolnaść Staroha Śvietu začyniłasia nadoŭha.
A šarahovaja natatka BiełaPAN praź dziesiacihodździe stała histaryčnym dakumentam. Niekalkich radkoŭ staroj chroniki dastatkova, kab praniźliva adčuć, jakija perspektyvy zmarnavanyja.
