Jak paviedamiła 23 lipienia ŭ Minsku na prezientacyi dla žurnalistaŭ i pradstaŭnikoŭ turystyčnych kampanij namieśnik kiraŭnika Piekinskaha kamiteta pa raźvićci turyzmu Vanh Ju, heta pytańnie budzie ŭźniata na sustrečy z kiraŭnictvam Ministerstva sportu i turyzmu 24 lipienia.
Vanh Ju ličyć, što nieabchodna ŭvieści biaźvizavy režym «dla stymulavańnia turystyčnaha abmienu». Jana paviedamiła, što prostaja viza ŭ Kitaj dla turystaŭ kaštuje 30 dołaraŭ, terminovaja — 60. Dla jaje atrymańnia nieabchodna mieć zaprašeńnie kitajskaha boku. Pry hetym braniravańnie haścinicy nie źjaŭlajecca ŭmovaj atrymańnia vizy.
Pavodle mierkavańnia Vanh Ju, stymułam dla turystyčnaha abmienu stała b adkryćcio pramych avijaznosin pamiž Piekinam i Minskam.Jana adznačyła, što za pieršaje paŭhodździe hetaha hoda Piekin naviedała 2 młn. zamiežnych turystaŭ, u tym liku 90 tys. — z Rasii. «Na žal, statystyki pa biełaruskich turystach my nie majem», — skazała jana. Pavodle słoŭ Vanh Ju, turystyčnaja halina Kitaja chutka raźvivajecca. Dachody, atrymanyja ad vyjaznoha turyzmu, letaś skłali 300 młrd. juaniaŭ (47 młrd. dołaraŭ), ad ujaznoha — 5 młrd. dołaraŭ. Na kožnaha žychara Kitaja prypadaje prykładna piać turystyčnych pajezdak u samoj krainie i za miažu.
U Piekinie raźmieščana prykładna 200 słavutych miaścin, bolš jak 7 tys. pomnikaŭ. Dla turystaŭ pracujuć 598 haścinic, u tym liku 63 piacizorkavyja i 127 čatyrochzorkavyja.
Vanh Ju vykazała hatoŭnaść supracoŭničać ź biełaruskimi turapieratarami dla arhanizacyi turystyčnych pajezdak biełarusaŭ u Kitaj i kitajskich turystaŭ — u Biełaruś.
Padčas vizitu kitajskaj delehacyi zapłanavana naviedvańnie turystyčnych abjektaŭ, u tym liku Dudutak i «Linii Stalina».
«Mama, davaj napišam zajavu ŭ milicyju, jon mianie ŭžo dastaŭ». Maci školnika z Bresta, jaki skončyŭ žyćcio samahubstvam, raskazała pra ckavańnie syna2
Kamientary