Jak ja ratavaŭ kacianio praz Facebook

U vas tysiača frendoŭ na Facebook dy jašče 300 — na LiveJournal? Vy žyviacie ŭ Siecivie, uklučajecie noŭtbuk za ranišniaj kavaj i vyklučajecie ŭ łožku, pravieryŭšy poštu dy abnaviŭšy statusy?

Nadyšoŭ čas pračnucca! Ja vam raskažu historyju pra toje, jak na minułym tydni nasupierak žadańniu pieratvaryŭsia ŭ ekalahičnaha aktyvista.

Było pozna, pałova na pieršuju. Z-za apošniaha žnivieńskaha skvaru son nie prychodziŭ, ja badziaŭsia. Raptam pačuŭ žałaślivaje ciŭkańnie, jakoje raznosiłasia ad trasy. Ja paviarnuŭsia, uhladzieŭsia, jenk zacich. Pajšoŭ dalej i znoŭ pačało tonieńka kaŭkać. Zdryhanuŭšysia, ja ŭjaviŭ sabie razdušanaha kata, jaki pamiraje la prajeznaj častki. A moža, jašče možna dapamahčy? Pamiž voli zrabiŭ krok, druhi — hladzieć na takoje nie było nijakaha žadańnia, adnak jano klikała tak žałasna, što niemahčyma było supraćstajać. Padyšoŭ. Nijakaha skalečanaha kata. Kupki rudoj, spalenaj letnim soncam travy. I tut adna z hetych kupak zdryhanułasia dy vydała: «miaŭ».

Nachiliŭsia — žyvoje, ale vielmi schudniełaje kaciania. Skura dy kostki. Uziaŭ na ruki — zašypieła z apošnich sił, ale ŭkusić nie zmahło. Kaciania amal što ničoha nia važyła. Na manišcy pad hałavoj — karali z błoch. Vočy ŭ hnoju.

Karaciej, dreń sprava.

Patelefanavaŭ u «Ehidu». Adkazała zaspanaja žančyna. Vysłuchała majo znervavanaje blekatańnie dy patłumačyła: «Ehida» — niedziaržaŭnaja arhanizacyja, takija ž zvyčajnyja ludzi, jak ja. I što jany mnie ničym nie dapamohuć.

«Biarycie jaho da siabie. Sprabujcie ŭładkavać pa znajomych. Dziaržava jamu moža dapamahčy adno chutkaj śmierciu», — skazała žančyna.

Pakul nios dadomu (cielca biaśsilna visieła na rukach), pakul čyściŭ ad błoch dy myŭ ciopłaj vadoj — było adčuvańnie, što źvier zaraz padochnie. Voś prosta daść duba ad źniasileńnia. Z troch tydniaŭ svajho harotnaha žyćcia niebaraka nia bačyŭ nijakaj ježy prynamsi tydzień. Ź jaho ciakła rudaja vada, usio cieła było ŭ ziamli. Dzie tvaja mamka, dzivak? Dzie braty i siastryčki? Dzie ty naradziŭsia i jak nia zdoch?

Potym — ciopłaje małako ź pipietki. Pieršyja dva kaŭtki — zvanitavała. Adnak dalej pajšło praściej. Hałavu kacianio samo nie trymała, nia było sił.

Maja koška, pabačyŭšy hetaje dziva, navat nia stała jaho dušyć, nia hledziačy na svoj nieludzimy charaktar (sproba pahładzić zaŭsiody kančajecca śviežymi drapinami).

Noč paciarpi, zaŭtra ja najdu jamu haspadara, — paabiacaŭ joj.

I palez u Facebook. U mianie 2770 frendoŭ na «Fejsie» i blizu da 600 čytačoŭ na Livejournal.

Dalej pačałosia samaje cikavaje.

Viedajecie, što rabili maje šmatlikija virtualnyja siabry?

Jany ŁAJKALI!

Za pieršyja niekalki hadzin nastupnaj ranicy kocik nabraŭ dva tuziny łajkaŭ dy dziesiać republikacyjaŭ u roznych siabroŭ. Adna cikavaja akaličnaść: ja zaklikaŭ frendoŭ, jakija mohuć pryniać žyviołu, pisać mnie ŭ «pryvat» — kab navat kali niechta adhukniecca, astatnija nia viedali ab tym.

Viedajecie, ź jakim vynikam my sustreli viečar nastupnaha dnia? 30 łajkaŭ, 20 republikacyjaŭ (kožnaja mieła svaje łajki). Fotki rudoha džyhitu pabačyła blizu 3000 čałaviek.

Viedajecie, kolki prapanoŭ uziać žyviolinu ja atrymaŭ?

NUL!

Ja zrazumieŭ, što pierabolšyŭ mabilizacyjnuju vartaść Sieciva. Mnie ž kazałasia, što takoje «mimimi-kacianio», rudy, chłopčyk, try tydni, abaviazkova znojdzie siabie prychilnicu-haspadyniu. Ale — nie.

Tym časam kacianio ačuniała. Jano pačało chadzić pa pakojach, chaj sabie niaŭpeŭniena, hojdajučysia, ale — chadzić samo. Koška zrazumieła, što jano nia zdochnie, jak jana dumała ŭčora, jano źbirajecca žyć. Pryčym — tut! Na jaje terytoryi! I pačałasia vajna. Jon biažyć da «mamki», «mamka» na jaho šypić, viščyć dy źbivaje z noh łapaj. Pryčym z kožnym razam udary robiacca ŭsio bolej mocnyja. Treba było evakuavać niebaraku: 12 hod sužyćcia z hetaj miehieraj navučyli mianie tamu, što jana nikoli nie sastupaje. Kali jana vyrašyła, što kacianio tut nie zastaniecca — zabje, zadušyć.

Jana pakazalna nakłała na dyvan.

Kacianio tym časam chrumścieła jaje kormam, pastaviŭšy ŭsie svaje łapy ŭ jaje talerku.

«Što ja zrabiŭ nia tak? — Pakutavaŭ ja. — Moža nia treba było adrazu ŭsiamu Siecivu raspaviadać pra jahony harotny los? Prosta prapanavać uziać, dy ŭsio?»

Tema pavolna sychodziła z «topaŭ», jaje ŭvieś čas treba było trymać naviersie, adnaŭlajučy kamenty, bo tyja ludzi, u jakich frendoŭ hetaksama šmat, jak i ŭ mianie, mahli prosta nie adšukać navinu pra kocika ŭnizie svajoj stužki. «Nia bity, nie farbavany! — chvaliŭ ja jaho. — Poł mužčynski, morda nahłaja!» Maje frendy adhukalisia. «Fajnieńka!» — pisali jany.

Jany łajkali kamenty.

Jany republikavali status.

Było bačna, što ŭsie hetyja ludzi staviacca da mianie vielmi pryjazna, hatovyja padtrymlivać maju aperacyju pa vyratavańniu kaciania ad koški-zabojcy. Adnak jany prosta nia mohuć zrabić toje, što patrebna mnie — vyjści z «virtuała» ŭ «reał». Da viečara druhoha dnia ŭ mianie stvaryłasia ŭražańnie, što ŭvieś hety čas ja vychodziŭ u Astrał i kamunikavaŭ tam ź bieścialesnymi duchami. Pryjemnymi, klasnymi, ale — nierealnymi. Usio, što jany mohuć — kamunikavać. Łajkać. Pamnažać kamenty. Raić, jaki korm davać niebaraku. I ŭsio.

U hetym — sutnaść Sieciva.

«A što kali… — padumałasia mnie. — Ja napišu, što mnie daviadziecca jaho ŭtapić? Moža šok prymusić ludziej vyjści z utulnaha hieta virtualnaha žyćcia?»

Try dni hetaja tema abmiarkoŭvałasia. Kocik nabraŭ 37 łajkaŭ, byŭ republikavany 27 razoŭ (halereja — 30 łajkaŭ).

Ja nie atrymaŭ NIVODNAJ uciamnaj prapanovy ŭ Facebook

1 prapanova była vykazana ŭ Livejournal juzeram ź nikam — sovka_spljushka — vialiki čałaviečy dziakuj joj za heta!

Zatoje: patelefanavali try sapraŭdnyja siabry, jakich ja dobra viedaŭ u «reale». U vyniku kocik pajšoŭ da takoha «nie virtualnaha» čałavieka. Jaki b dapamoh biez usialakaha Facebook.

Voś maje vysnovy z taho, što pieražyŭ za try dni, pakul sprabavaŭ pracavać dobrym sieciŭnym betmenam:

1. Kali vy pačynajecie hramadzianskuju kampaniju, što praduhledžvaje sieciŭnuju mabilizacyju, pamiatajcie pra toje, što Facebook — nadźmuvańnie pustaty. Heta burbałka, jakaja raspuchaje ad kamentaŭ, łajkaŭ, adnak za joj — ničoha.

2. Adziny plon Fejsbuku dy Livejournal u vymiareńni mabilizacyi — suviaź z tymi ludźmi, jakich ty viedaješ. U realnym žyćci. Kali patrebna zrabić tak, kab 100 tvaich kalehaŭ ci tavaryšaŭ terminova daviedalisia ab tvajoj prablemie/idei dy dapamahli — možna vykarystać Sieciva. Inakš — zabudźciesia pra jaho!

3. Samaje hałoŭnaje. Pa vynikach historyi z kocikam, ja vynajšaŭ novuju prykazku, jakuju raju ŭsim: «Nia maj sto frendoŭ, lepš maj troch siabroŭ».

• 0
• 0
• 0
• 0
• 0
• 0
• 0
• 0