U Minsk prybyvaje techničnaja misija Suśvietnaha banka

13 žniŭnia ŭ druhoj pałovie dnia ŭ Biełaruś prybyvaje misija Suśvietnaha banka na čale z dyrektaram adździeła Ukrainy, Biełarusi i Małdovy SB Čymiaa Fanam.

Jak paviedamili ŭ biełaruskim pradstaŭnictvie SB, heta techničny vizit, padčas jakoha budzie abmiarkoŭvacca chod realizacyi prajektaŭ, što finansujucca bankam, u śfiery enierhaefiektyŭnaści i vodazabieśpiačeńnia.

Misija budzie pracavać u Biełarusi da 16 žniŭnia ŭklučna. Zapłanavanyja sustrečy ekśpiertaŭ SB u Saviecie ministraŭ, u tym liku ź pieršym vice-premjeram Uładzimiram Siamaškam,

***

Jak paviedamlałasia raniej, u lipieni prem'jer-ministr Biełarusi Michaił Miaśnikovič prapanavaŭ SB paskoryć padrychtoŭku novaj krainavaj stratehii banka pa Biełarusi. Papiaredniaja čatyrochhadovaja stratehija zaviaršyłasia ŭ siaredzinie 2011 hoda, abjom finansavańnia pa joj skłaŭ 400 miljonaŭ dołaraŭ.

U kancy lipienia SB paćvierdziŭ namier akazvać padtrymku Biełarusi ŭ praviadzieńni strukturnych reform.

«Suśvietny bank hatovy praciahvać akazańnie dapamohi ŭradu ŭ raspracoŭcy i realizacyi kompleksnych i hłybokich strukturnych reform, dla taho kab spryjać umacavańniu kankurentazdolnaści i ŭstojlivamu rostu ŭ Respublicy Biełaruś», — havaryłasia ŭ liście Čymiaa Fana prem'jer-ministru Biełarusi Michaiłu Miaśnikoviču.

U praciah pracy, raspačataj u miežach Krainavaha ekanamičnaha miemarandumu, SB zapłanavaŭ prahramnuju techničnuju dapamohu pa pytańniach strukturnych reform, paviedamlałasia ŭ liście.

SB taksama paćvierdziŭ hatoŭnaść akazvać dapamohu Nacyjanalnamu ahienctvu pa inviestycyjach i pryvatyzacyi «ŭ realizacyi prahramy pryvatyzacyi vaśmi kankretnych siarednich pradpryjemstvaŭ, kab prademanstravać pieravahi kankurentnych i adkrytych pracedur pryvatyzacyi».

U biudžetna-padatkovaj śfiery SB prapanoŭvajuć techničnuju dapamohu ŭ pytańniach refarmavańnia piensijnaj sistemy i sistemy sacyjalnaj dapamohi, pavyšeńnia efiektyŭnaści dziaržaŭnych raschodaŭ na achovu zdaroŭja i adukacyju, udaskanaleńnia mižbiudžetnych adnosinaŭ i kiravańnia doŭham.

Asablivaja ŭvaha ŭ liście nadavałasia dałučeńniu Biełarusi da Suśvietnaj handlovaj arhanizacyi. Na dumku Čymiaa Fana, dałučeńnie da SHA «ŭjaŭlaje saboj unikalnuju mahčymaść źviazać reformy sa źniešnimi faktarami». SB paćvierdziŭ hatoŭnaść akazać biełaruskamu ŭradu «padtrymku ŭ hetym važnym pracesie».

• 0
• 0
• 0
• 0
• 0
• 0
• 0
• 0