Biełaruskaja asacyjacyja žurnalistaŭ krytykuje zakonaprajekt ab infarmacyi

Nahadajem, da takoj ekspertyzy asacyjacyju zaprasiła admysłovaja kamisija Pałaty pradstaŭnikoŭ. Na pres-kanferencyi ŭ čaćvier eksperty Biełaruskaj asacyjacyi žurnalistaŭ raspaviali pra vyniki svajoj pracy i pra chiby zakonaprajektu, jakija vyjaŭlenyja padčas ekspertyzy, praviedzienaj jurydyčnaj kamisijaj asacyjacyi.

Pavodle admysłoŭcaŭ, prajekt zakonu miescami nie adpaviadaje Kanstytucyi, a asobnyja pałažeńni dakumentu vyklikajuć šyrokija roznačytańni. Jak zaŭvažyŭ namieśnik staršyni BAŽ Andrej Bastuniec, samym admietnym u zakonaprajekcie źjaŭlajecca toje, što ŭ 58-mi jahonych artykułach utrymlivajecca 109 adsyłačnych normaŭ.

Bastuniec: «Siarod hetych spasyłak jość spasyłki na akty zakanadaŭstva Respubliki Biełaruś, a heta mohuć być i narmatyŭnyja akty ministerstvaŭ, vykankamaŭ i hetak dalej».

Heta paznačaje, što budučy zakon pra infarmacyju faktyčna budzie nie zakonam, a zbornikam instrukcyjaŭ pa pytańniach abarony infarmacyi. Andrej Bastuniec upeŭnieny, što zakonaprajekt jahonyja raspracoŭščyki chočuć zrabić dadatkovaj pieraškodaj na šlachu raspaŭsiudu infarmacyi.

Bastuniec: «Navat tyja normy zakonaprajektu, jakija mohuć dziejničać, niepasredna nakiravanyja na abmiežavańnie svabody infarmacyi».

Svaje mierkavańni adnosna zakonaprajektu vykazaŭ i staršynia jurydyčnaj kamisii asacyjacyi Michaił Pastuchoŭ. Jon źviarnuŭ uvahu žurnalistaŭ na toje, što raspracoŭkaj hetaha dakumentu zajmajecca kamisija Pałaty pradstaŭnikoŭ pa pramysłovaści, paliŭna?enerhietyčnym kompleksie, transparcie, suviazi j pradprymalnictvie.

Pastuchoŭ: «Ujavicie sabie, jakija tam mohuć być admysłoŭcy. My razmaŭlali z pradstaŭnikami hetaj kamisii. Jany sami kažuć, što hety zakonaprajekt dla ich ciažki. I jany nia suprać supracoŭničać z BAŽ, kab choć niejak dać dakumentu abjektyŭnuju acenku».

Dalej Michaił Pastuchoŭ źviarnuŭ uvahu na tyja zadačy, jakija pavinien vyrašać budučy zakon. Na mierkavańnie eksperta, u prajekcie pastaŭlenyja mety, jakich treba dasiahać nia hetym zakonam, a pracaj adpaviednych dziaržaŭnych strukturaŭ. Voś cytaty z dakumenta.

Pastuchoŭ: «Stvareńnie efektyŭnaj systemy infarmacyjnaj padtrymki, rašeńnie aperatyŭnych i stratehičnych zadačaŭ sacyjalna-ekanamičnaha, navukova-techničnaha raźvićcia, zabieśpiačeńnie niezaležnaha j raŭnapraŭnaha isnavańnia Respubliki Biełaruś u miežach suśvietnaha hramadztva».

Dalej viadziecca pra toje, što z dapamohaj zakonu pra infarmacyju musić stvaracca i palapšacca systema pryciahnieńnia investycyjaŭ, mechanizmu stymulavańnia j realizacyi prajektaŭ u sfery infarmacy, infarmatyzacyi j abaronie infarmacyi. Pastuchoŭ ździŭleny, što hety zakon musić vyrašać takija hlabalnyja zadačy.

Pastuchoŭ: «To bok praca ź infarmacyjaj stavić takuju hlabalnuju metu. Heta prosta niemahčyma ŭjavić».

Cikava taksama j toje, što z dapamohaj zakonu pra infarmacyju planujecca pačać davoli žorstki kantrol nad niezaležnymi internet-sajtami. U zakonaprajekcie havorycca, što Akademija navuk Biełarusi pavinna ździajśniać rehistracyju sajtaŭ. Što praŭda, abaviazkovaj jana budzie pakul tolki dla dziaržaŭnych resursaŭ. Sajty, jakija stvoranyja pryvatnymi ci jurydyčnymi asobami, mohuć rehistravacca dabraachvotna. Andrej Bastuniec ličyć, što ŭłada ŭsurjoz uziałasia za toje, kab ustalavać poŭny kantrol za Internetam u Biełarusi.

Bastuniec: «U hetym zakonaprajekcie jość niekalki normaŭ, jakija nakiravanyja na toje, kab uziać internet-prastoru pad kantrol. U 37-m artykule, dzie idzie havorka pra rehistracyju infarmacyjnych systemaŭ, napisana, što rehistracyja niedziaržaŭnych infarmacyjnych systemaŭ ažyćciaŭlajecca na dabraachvotnaj asnovie. Ale vyšej u hetym samym punkcie napisana, što abaviazkovaj dziaržaŭnaj rehistracyi naležać dziaržaŭnyja i ahulnadastupnyja infarmacyjnyja systemy. I ŭžo nieadpaviednaść, bo niedziaržaŭnyja infarmacyjnyja systemy taksama mohuć być ahulnadastupnyja. Ci naležać jany rehistracyi?»

Juryst BAŽ Michaił Pastuchoŭ ličyć, što ŭ pieršuju čarhu ŭłada imkniecca ŭziać pad kantrol niezaležnyja infarmacyjnyja sajty. Naprykład, resursy «Chartyja 97», «Biełaruski partyzan» i šerah inšych. Sa źjaŭleńniem zakonu pra infarmacyju ŭładalniki hetych sajtaŭ pavinny buduć sačyć za raspaŭsiudam infarmacyi, a taksama nieści adkaznaść za abaronu hetaj infarmacyi. Što heta značyć, eksperty skazać nia mohuć.

Bolš za toje, u zakonie ŭtrymlivajecca norma, pavodle jakoj nieabchodna budzie pravodzić identyfikacyju asobaŭ, jakija ŭdzielničajuć u abmienie infarmacyjaj. To bok, vierahodna, uźniknie nieabchodnaść pajmienna viedać usich karystalnikaŭ sieciva Internet. U niezaležnaści ad taho, pišuć jany analityčnyja artykuły na sajt Abjadnanaj hramadzianskaj partyi ci abmieńvajucca paviedamleńniami na forumach.

Pastuchoŭ: «Dziaržaŭnyja vorhany atrymajuć lehalnuju mahčymaść dla taho, kab ździajśniać kantrol nad usimi internet-resursami».

Biełaruskaja asacyjacyja žurnalistaŭ dasłała prajekt zakonu pra infarmacyju svaim zamiežnym kaleham. Pavodle Bastunca, usie jany ździŭlenyja tym, što ŭ Biełarusi ŭvohule viadziecca havorka pra isnavańnie zakonu, jakim nastolki možna budzie abmiažoŭvać infarmacyju.

Eksperty asacyjacyi ŭpeŭnienyja, što hety zakon nakiravany na toje, kab raźviazać dziaržavie ruki ŭ sfery abarony toj infarmacyi, jakaja zaraz źjaŭlajecca adkrytaj dla ŚMI j hramadztva. Kali zakon prymuć u isnujučaj redakcyi, to praca žurnalistaŭ, hazetaŭ, radyjostancyjaŭ i internet-sajtaŭ u značnaj stupieni ŭskładnicca.

• 0
• 0
• 0
• 0
• 0
• 0
• 0
• 0