Miemarandum nakont kredytu «Biełaruśkaliju» pakul nie padpisany

Śbierbank Rasii i ŭrad Biełarusi nie padpisali miemarandum ab namierach pa refinansavańni kredytu «Biełaruśkaliju». Pra heta paviedamiŭ 25 vieraśnia žurnalistam u Minsku kiraŭnik Śbierbanka Hierman Href.

Raniej Śbierbank RF płanavaŭ padpisać 25 vieraśnia pahadnieńnie ab refinansavańni kredytu biełaruskaj kampanii ŭ 1 młrd. dołaraŭ. «Nie, nie padpisali. Vyrašyli, što paskorym praces padrychtoŭki kredytnaha pahadnieńnia».

Pry hetym jon udakładniŭ, što ŭ bakoŭ niama pryncypovych roznahałośsiaŭ nakont budučaha pahadnieńnia. «Roznahałośsiaŭ niama. Michaił Uładzimiravič (Miaśnikovič) paprasiŭ paskoryć padpisańnie kredytnaha pahadnieńnia», — skazaŭ kiraŭnik Śbierbanka RF.

Jon paabiacaŭ dla padrychtoŭki dakumienta dasłać u Biełaruś hrupu svaich supracoŭnikaŭ.

Pavodle słoŭ Hrefa, pahadnieńnie moža być zaklučana ŭ siaredzinie listapada ci raniej. «Pakul siaredzina listapada, ale kali my ŭsie razam dobra papracujem…» — skazaŭ kiraŭnik Śbierbanka.

AAT «Biełaruśkalij» u śniežni 2011 hoda atrymaŭ hadavy sindykavany kredyt Śbierbanka Rasii i JEABR na 1 młrd. dołaraŭ. Srodki Śbierbanka Rasii ŭ kredycie składajuć 900 młn. dołaraŭ, JEABR — 100 młn. dołaraŭ. Kredyt atrymany pad dvajnoje zabieśpiačeńnie — harantyi ŭrada Biełarusi, jakija, u svaju čarhu, zabiaśpiečanyja załoham 51% akcyj AAT «Naftan». Staŭka pa kredycie na pieršyja šeść miesiacaŭ składaje LIBOR (1,1%) + 7,6% hadavych. Z pačatku druhoha paŭhodździa staŭka pa kredycie pavialičvajecca na 0,3%. Srodki kredytu byli ŭklučanyja ŭ skład zołatavalutnych reziervaŭ Biełarusi šlacham vypusku doŭhaterminovych dziaržaŭnych papier na 800 młn. dołaraŭ, jakija vykupiŭ «Biełaruśkalij». Astatniuju častku kredytu kampanija pradała na biržy pa inicyjatyvie Nacbanka.

Raniej kiraŭnictva «Biełaruśkalija» zajaŭlała pra namier u vieraśni 2012 hoda daterminova adnačasova pahasić sindykavany kredyt u 1 młrd. dołaraŭ, pra što byŭ infarmavany Śbierbank Rasii, jaki źjaŭlajecca ahientam ździełki. Bolšuju častku kredytu (800 młn. dołaraŭ) płanavałasia vypłacić za košt daterminovaha pahašeńnia naminavanych u valucie ablihacyj Ministerstva finansaŭ Biełarusi, nabytych «Biełaruśkalijem». Astatniuju častku pradpryjemstva płanavała pahasić za košt ułasnych krynic. Adnačasova pradpryjemstva zajaviła pra mahčymaje refinansavańnie kredytu.

31 lipienia staršynia praŭleńnia «BPS-Śbierbanka» Vasil Maciušeŭski paviedamiŭ žurnalistam, što Hrupa Śbierbanka Rasii padrychtavała novuju prapanovu dla biełaruskich uład ab refinansavańni kredytu ŭ 1 młrd. dołaraŭ. «Naša hrupa zrabiła jašče adnu prapanovu ab refinansavańni hetaha brydž-kredytu. Z našaha punkta hledžańnia, jana pa cenavych i jakasnych paramietrach vielmi cikavaja. Ciapier sprava za biełaruskim bokam. Kali takoje rašeńnie budzie pryniata, my hatovyja refinansavać hety kredyt», — zajaviŭ Maciušeŭski.

• 0
• 0
• 0
• 0
• 0
• 0
• 0
• 0