U Biełarusi ŭpieršyniu prachodzić architekturny tydzień

U Biełarusi z 1 pa 7 kastryčnika prachodzić Biełaruski architekturny tydzień. Takaja akcyja pravodzicca ŭ krainie ŭpieršyniu, paviedamiła pres-słužba Ministerstva architektury i budaŭnictva.

Biełaruski architekturny tydzień prymierkavany da Suśvietnaha dnia architektury i zaklikany pavysić cikavaść hramadstva, u tym liku dziaciej i moładzi, da dasiahnieńniaŭ, prablem i vytokaŭ sučasnaj architektury.

Pavodle słoŭ namieśnika ministra architektury i budaŭnictva Dźmitryja Siemiankieviča, padobnyja akcyi pravodziacca ŭ mnohich krainach.

Płanujecca, što Biełaruski architekturny tydzień stanie ŭ krainie tradycyjnym. Naprykład, buduć arhanizavanyja śpiecyjalnyja ekskursii ŭ zvyčajna zakrytyja dla naviedvalnikaŭ administracyjnyja i inšyja budynki, značnyja z architekturnaha punktu hledžańnia.

Sioleta prahrama «Biełaruskaha architekturnaha tydnia» praduhledžvaje praviadzieńnie ŭ Minsku i ŭ rehijonach mierapryjemstvaŭ, jakija «dazvolać u značnaj miery raskazać nasielnictvu ab padychodach da horadabudaŭničaj palityki, pierśpiektyŭnaha raźvićcia pasialeńniaŭ», paviedamili ŭ pres-słužbie Minbudarchitektury.

6 kastryčnika ŭ žycharoŭ abłasnych haradoŭ i Minska źjavicca mahčymaść «Zazirnuć u budučyniu» — pad takoj nazvaj płanujecca razharnuć u hetych haradach architekturnyja plenery. Heta buduć prajekty (makiety, malunki, 3D-makiety i h.d.), nad jakimi pracujuć miascovyja architektary.

Taksama z 1 kastryčnika sumiesna z Nacyjanalnym centram mastackaj tvorčaści dziaciej i moładzi budzie pravodzicca konkurs malunka «Architektura Biełarusi vačami dziaciej».

U dni akcyi projduć taksama i prafiesijnyja mierapryjemstvy: respublikanski architekturna-horadabudaŭničy saviet na temu «Vobraz biełaruskaj sučasnaj architektury» i arhanizavany Biełarusim sajuzam architektaraŭ sumiesna ź Biełarusim sajuzam mastakoj kruhły stoł pa temie «Prablemy manumientalnaha mastactva i skulptury haradskoha asiarodździa».

Pavodle słoŭ Siemiankieviča, «u Biełarusi nie stracili hałoŭnaje — kulturu architektury i horadabudaŭnictva, prajektavańnia i kiravańnia raźvićciom haradoŭ».

Siemiankievič upeŭnieny, što biełaruskim architektaram treba zakładvać u prajekty jak maha bolš ajčynnych budmateryjałaŭ. «Moža padacca, što heta nie maje nijakaha dačynieńni da architektury, ale jość takoje paniaćcie, jak popyt, jaki farmirujuć mienavita architektary. Tamu śpiecyjalisty, jakija pracujuć u hetaj śfiery, pavinny bolš uvahi nadavać ajčynnym budaŭničym materyjałam i pry prajektavańni zakładvać ich u svaje abjekty, a nie zamiežnyja anałahi», — ličyć namieśnik ministra.

Suśvietny dzień architektury (World Architecture Day) byŭ zasnavany Mižnarodnym sajuzam architektaraŭ (MSA). U 1985 hodzie na schodzie MSA było vyrašana štohod śviatkavać Suśvietny dzień architektury ŭ pieršy paniadziełak lipienia. U 1996 hodzie Mižnarodny sajuz architektaraŭ na svajoj 20-j hienieralnaj asamblei ŭ Barsiełonie pryniaŭ rezalucyju ab pieranosie śviatkavańnia Suśvietnaha dnia architektury na pieršy paniadziełak kastryčnika. U hety dzień pad patranažam AAN adznačajecca Suśvietny dzień žylla (Suśvietny dzień Chabitat).

• 0
• 0
• 0
• 0
• 0
• 0
• 0
• 0