Jak palityčnyja kambinatary stvarajuć psieŭdaapazicyju: Centrysckaja partyja Laŭkoviča
U siaredzinie žniŭnia na infarmacyjnych stužkach prajšła navina, što ŭ krainie ŭźnikaje Centrysckaja partyja.Navat źjezd pryznačyli na 23 śniežnia. Na čale partyi maje stać były lidar sacyjałdemakrataŭ Anatol Laŭkovič.
«Vybary ŭ pałatu pradstaŭnikoŭ nie źmieniać situacyju ŭ krainie. Sapraŭdnych palityčnych straściej i palityčnaj baraćby niama, — havaryłasia ŭ zajavie arhanizataraŭ novaj partyi. — Pa adzin bok barykad «zabranzavieŭšy» režym, pa inšy błaźnierstva i paziorstva. Palityčnaje žyćcio ŭ krainie źviedziena da plaskańnia na płoščach i napisańnia nikomu nie patrebnych łozunhaŭ». Naprykancy zvarotu adznačałasia, što čas psieŭdaapazicyi (nie ŭłady) minuŭ.
«Sovietskaja Biełoruśsija» nadrukavała kamplimientarny artykuł pra Centrysckuju partyju pad zahałoŭkam «U čakańni straści».«Ludzi Laŭkoviča (a chutčej za ŭsio — jon sam aŭtar hetaha bajavoha manifiesta) absalutna pravilna acharaktaryzavali palityčnuju apazicyju, ich błazienstva i paziorstva, a taksama dakładna prymiecili nakont razbazaranaha limitu davieru, jaki, moža być, kaliści i byŭ u apazicyi, ale daŭnymdaŭno syšoŭ u topańnie i chłopańnie», — adznačaje aŭtar materyjału.
U Redakcyju źviarnuŭsia daŭni čytač «NN» Hienadź Samusievič (na forumie nn.by jon maje nik Dzimyč), jaki mieŭ niepasrednaje dačynieńnie da «stvareńnia» Centrycskaj partyi. «Heta čystaja avantura», — adrazu kaža Hienadź.
Napačatku jon raskazvaje pieradhistoryju.
«Dzieści dva hady tamu na mianie praź internet vyjšaŭ adzin chłopiec. Były aktyvist apazicyi, žyvie ŭ Pinsku. Skazaŭ, što raniej zajmaŭsia hramadskaj dziejnaściu, ustalavańniem adnosin «Biełaruś — NATA», prapanavaŭ razam papracavać. Chłopca zavuć Vadzim Makiejeŭ».
Samusievič kaža, što ničoha z hetaj zadumy nie vyjšła, ale Makiejeŭ paznajomiŭ jaho sa svaimi siabrami. Siarod jakich byŭ žurnalist Źmicier Kisiel.
«Adnojčy jany mnie skazali: «U pryncypie, u nas apazicyja hniłaja. A ci možna znajści niejkuju nišu, kab stvaryć svaju partyju?» Kažu, što mahčyma. Nu dyk my pasprabujem, kažuć jany mnie.
Makiejeŭ i Kisiel naradžali-naradžali idei i ničoha nie radzili. Źviarnulisia znoŭ da mianie.Ja prapanavaŭ kancepcyju Centrysckaj partyi. Ale heta tolki kancepcyja! Jašče čakaŭ vialiki kavałak pracy, patrebnyja srodki i ludzi».
U žniŭni Samusievič pračytaŭ z paviedamleńniaŭ u internecie, što stvarajecca Centrysckaja partyja.«Makiejeŭ skazaŭ, što jany ŭžo ab usim damovilisia. Pieršym ichnim krokam pavinna było stać dasyłańnie Jarmošynaj pa pošcie 10 słoikaŭ baršču. Potym jany damovilisia ź Laŭkovičam, što atakujuć Kalakina. Ja kažu: a Kalakina za što? Adkazvajuć, što ŭ Laŭkoviča zastałasia kryŭda na Kalakina».
«Samaje cikavaje, što jany mnie skazali: «Na nastupnych prezidenckich vybarach my vyłučajem Laŭkoviča». Paśla hetaha ja staŭ kapać, chto hetyja chłopcy.Apynułasia, što tut, jak u «Załatym cialaci»: «Da 16:00 vy za savieckuju ŭładu, a paśla 16:00 — suprać». Ja hladžu, što Makiejeŭ i Kisiel hnabiać u internecie hetuju apazicyju, a sami stvarajuć apazicyjnuju partyju», — kaža Hienadź Samusievič.
«Heta sami ludzi vystupili z takoj inicyjatyvaj, kab vyłučyć mianie ŭ prezidenty, — kaža Anatol Laŭkovič. — Ja čałaviek adkryty, hatovy da roznych prapanovaŭ. Sapraŭdy, mieŭ niejkuju padobnuju razmovu sa Źmitrom Kisialom. Ci viedaju ja Makiejeva? Ja mnohich viedaju».
Laŭkovič prasłaviŭsia najbolš svaimi daŭžeznymi artykułami ŭ prezidenckaj «Sovietskoj Biełoruśsii» pra nieabchodnaść «kanstruktyŭnaj apazicyi» z zaviareńniami ŭ pryznańni zasłuh Alaksandra Łukašenki.U druhi raz Laŭkovič trapiŭsia na liście da lidara «Spraviadlivaj Rasii» Siarhieja Mironava, dzie vystupaŭ bolšym intehrataram za Łukašenku i prapanoŭvaŭ stvaryć hramadskuju pałatu sajuznaj dziaržavy.
Sam Vadzim Makiejeŭ admaŭlaje svoj udzieł u stvareńni Centrysckaj partyi. «Ja nie maju nijakaha dačynieńnia», — kaža jon, pałochajučy, što padaść u sud za lubuju zhadku jaho imia.
Cikava, što asoby Makiejeva i Kisiala dobra viadomyja ŭ asiarodździ bresckich demakratyčnych aktyvistaŭ. Naprykład, siabar Ruchu «Za Svabodu» Dzianis Turčaniak užo nie pieršy hod sprabuje pryciahnuć da adkaznaści Źmitra Kisiala za abrazy ŭ internecie. Prakuratura padtrymała Turčaniaka, ale milicyja admoviłasia navat apytać Kisiala. Tak užo paŭtarałasia čatyry razy.
13 vieraśnia na sajcie «Virtualny Brest» źjaŭlajecca infarmacyja, što hramadskaja arhanizacyja «Ukrainski dom» źviartajecca da ŁDP i asabista da sp.Hajdukieviča z prapanovaj ab supracoŭnictvie.Cikava, što siarod zasnavalnikaŭ «Ukrainskaha doma»... taksama Makiejeŭ i Kisiel. «Partyi niama, a jany ŭžo šukajuć partnioraŭ», — kaža Samusievič.
Jašče adnoj partniorskaj arhanizacyjaj Centrysckaj partyi stanovicca niejki «Levy front», što nibyta byŭ stvorany ŭ Pinsku.Na čale arhanizacyi staŭ rabočy «Pinskdreva» Kudranok. U intervju jon skazaŭ, što arhanizacyja za sacyjalizm i bačyć u sajuźnikach Centrysckuju partyju. Intervju ŭ Kudranka braŭ Źmicier Kisiel.
«U Biełarusi i tak da čarta psieŭdaapazicyjnych arhanizacyj. Ja b nie chacieŭ, kab źjaviłasia jašče adna, jakaja b biła siabie ŭ hrudzi, a potym pajšła na prezidenckija vybary. Ja nie chaču ŭdzielničać u takich sumnieŭnych prajektach», — skančvaje Hienadź Samusievič.
Ciapier čytajuć
«Razahnać darmajedaŭ! Addać ludziam ziamlu!» Traktaryst z Chojnikaŭ, jaki ciapier žyvie ŭ Łatvii, paraŭnaŭ sielskuju haspadarku tam i ŭ nas11
Kamientary