Rasijaninu daravali arhanizacyju zabojstva troch zubroŭ u Nalibockaj puščy

Śledčym kamitetam Biełarusi zavieršana rasśledavańnie kryminalnaj spravy, raspačataj pa fakcie vyjaŭleńnia blizu vioski Hałuby Vałožynskaha rajona Minskaj vobłaści astankaŭ troch zubroŭ.

Jak było ŭstanoŭlena padčas śledstva na terytoryi dziaržaŭnaj lesahaspadarčaj ustanovy «Vałožynski lashas», 27 studzienia 2012 hoda pravodziŭsia palaŭničy tur z udziełam hramadzianina Rasii. Kiraŭnikom palavańnia źjaŭlaŭsia jehier lashasa. U palavańni taksama braŭ udzieł jaho načalnik — inžynier pa palaŭničaj haspadarcy ŭstanovy. Dziejničajučy z parušeńniem praviłaŭ palavańnia, try palaŭničyja z vykarystańniem ahniastrelnaj zbroi naŭmysna zdabyli troch darosłych samcoŭ zubra, uniesienaha ŭ Čyrvonuju knihu, nasielnikaŭ respublikanskaha łandšaftnaha zakaźnika «Nalibockaja pušča».

Dziejańni abvinavačanych byli kvalifikavany na padstavie č. 4 art. 282 KK

[Heta karajecca pazbaŭleńniem voli terminam da šaści hadoŭ — NN]

Na pieršapačatkovym etapie śledstva słužbovyja asoby lesahaspadarčaj ustanovy kateharyčna admaŭlali svaju vinu ŭ naŭmysnym učynieńni złačynstva.

U vyniku spłanavanych i praviedzienych pa spravie śledčych dziejańniaŭ było atrymana pryznańnie zamoŭcy palaŭničaha tura, jaki čystasardečna raskajaŭsia ŭ złačynstvie, sadziejničaŭ śledstvu ŭ vykryćci astatnich udzielnikaŭ złačynstva.

Aprača taho, jon u pavyšanym pamiery kampiensavaŭ naniesieny złačynstvam uron i zajaŭlenyja iskavyja patrabavańni pa spravie. Sukupnaść hetych akaličnaściaŭ pasłužyła padstavaj dla vyzvaleńnia abvinavačanaha ad kryminalnaj adkaznaści ŭ suviazi ź dziejnym raskajańniem z pryznańniem u jaho dziejańniach składu złačynstva.

Z pryčyny taho, što jehier lashasa źjaŭlajecca asobaj, paciarpiełaj ad nastupstvaŭ katastrofy na Čarnobylskaj AES, u dačynieńni da jaho prymienieny akt amnistyi.

Materyjały kryminalnaj spravy ŭ dačynieńni da inžyniera pa palaŭničaj haspadarcy pieradadzieny ŭ Hienieralnuju prakuraturu dla pryniaćcia rašeńnia ab nakiroŭvańni ŭ sud.

Padčas rasśledavańnia kryminalnaj spravy SK nakiravaŭ u Ministerstva lasnoj haspadarki dakładnuju zapisku ab likvidacyi pryčyn i ŭmoŭ, što sadziejničali ŭčynieńniu hetaha złačynstva. Pavodle vynikaŭ razhladu zapiski ministerstvam byli praviedzieny šerah arhanizacyjna-štatnych mierapryjemstvaŭ.

U SK zaznačajuć, što da hramadzianina RF byŭ prymienieny art. 88 KK (vyzvaleńnie ad kryminalnaj adkaznaści ŭ suviazi ź dziejnym raskajańniem).

• 0
• 0
• 0
• 0
• 0
• 0
• 0
• 0