Hałoŭnyja ŭdzielniki palityčnaha supraćstajańnia ŭva Ŭkrainie — prezydent Viktar Juščanka i premjer‑ministar Viktar Janukovič — pryjšli da zhody nakont praviadzieńnia daterminovych vybaraŭ u parlament — Viarchoŭnuju Radu. Z analizam padziei — naš ahladalnik.
Mahčyma, što kančatkovuju acenku davać jašče i rana, u rašeńnia, abvieščanaha siońnia, mohuć uźniknuć jašče niejkija padvodnyja kamiani i roznačytańni. Ale tak vyhladaje, što kryzys, jaki pačaŭsia 2 krasavika vydańniem ukazu prezydenta ab rospusku parlamentu i daterminovych vybarach, zbolšaha vyrašyŭsia.
I toje, jak mienavita jon vyrašyŭsia, maje nadzvyčajna vialikaje značeńnie — u sensie ruchu Ŭkrainy pa šlachu demakratyi hetaja padzieja nia mienš važnaja, čym sama «aranžavaja revalucyja».
Čamu? Dy tamu što demakratyja — heta nia tolki spraviadlivy padlik hałasoŭ i ŭžo tym bolej nie pieramoha pravilnaj, lepšaj z čyjhości punktu hledžańnia siły. Heta — pracedura, pracedura kampramisu.
U hetym, darečy, było zaŭvažnaje adroźnieńnie chady ŭkrainskaha kryzisu ad raźvićcia padziejaŭ, skažam, u Kirhizstanie, dzie ŭsie palityčnyja siły, uziaŭšy na ŭzbrajeńnie cudadziejny srodak zmahańnia — vulicu, masu, bili joj adzin adnaho, spadziejučysia atrymać usio.
Va Ŭkrainie taksama «bieła‑błakitnyja» vielmi ŭdała zasvoili «pamarančavyja technalohii». Ale było adno pryncypovaje adroźnieńnie — dyjaloh pamiž palityčnymi supiernikami nie pierapyniaŭsia ni na chvilinu, Juščanka i Janukovič asabista sustrakalisia ledź nia kožny dzień.
Mahčyma, prychilnikaŭ adnaho i druhoha boku, jakija stajali na šmatlikich majdanach pa ŭsioj Ukrainie apošni miesiac, heta navat razdražniała, maŭlaŭ, pra što z tymi, z parušalnikami zakonu, razmaŭlać, daješ pieramohu. Zrazumieć takija pačućci možna, ale pa «daješ pieramohu» i pa «čaho ź imi razmaŭlać» — heta da Łukašenki ci da Pucina. A va Ŭkrainie — demakratyja, heta značyć, tak mienavita voś z hetymi i razmaŭlać, vočy b na jakich nie hladzieli.
U inšych krainach vostryja palityčnyja kryzysy vyrašajucca pry dapamozie mocnych, stałych instytutaŭ, hetak u ZŠA ŭ 2000 hodzie verdykt pa vynikach vybaraŭ vynies pavažany ŭsimi Viarchoŭny sud, ź jakim usie pahadzilisia. Va Ŭkrainie instytuty słabyja, davieru da ich, prynamsi da Kanstytucyjnaha sudu, niama. I tamu ŭsia adkaznaść za toje, kab kryzys nie abrynuŭ krainu ŭ biezdań, była na plačach pravadyroŭ palityčnych lahieraŭ.
Tut varta adznačyć taksama rolu mižnarodnaj supolnaści i ŭ pryvatnaści Eŭraźviazu. Nie ŭstajučy ni na vodzin z bakoŭ, jany štodzień paŭtarali kijeŭskim zmaharam — damaŭlajciesia.
Adnak, jak pakazvaje dośvied, takija parady dapamahajuć daloka nie zaŭsiody, tak što hałoŭnaja zasłuha tut — usio ž samich ukraincaŭ.
Kali analizavać kankretnyja ramki damoŭlenaści, to pakul bolš bačnyja sastupki ŭradavaha boku, boku bolšaści parlamentu — daterminovyja vybary ŭsio ž adbuducca, jak taho i chacieŭ prezydent. Ale nasamreč heta zusim nie aznačaje poŭnaj parazy kaalicyi. Da taho ž, mahčyma, my pakul viedajem nia ŭsie detali, i chutčej za ŭsio na peŭnyja sastupki pajšoŭ i prezydent.
Ale, paŭtarusia, — hałoŭnaje, heta nia źmiest kampramisu, a toje, što jon byŭ dasiahnuty, toje, što Ŭkraina zdała čarhovy ispyt u škole demakratyi.
