Pravierka na šałudzivaść :-)

U niamieckim Rostaku padčas vuličnych sutyknieńniaŭ paciarpieła bolej za 400 palicyjantaŭ. Jak i čakałasia, dali dychtu antyhlabalisty. Na samity "vialikaj vosiemki" jany źlatajucca by muchi na miod.

Pavialičyć

Dla Biełarusi antyhlabalizm jość źjavaj davoli ekzatyčnaj — u niemałoj stupieni praz našu sytuacyju napaŭizalacyi. Davodzicca tłumačyć šyrokaj publicy sutnaść źjavy. Voś, darečy, hruntoŭny artykuł Vitala Silickaha z razhladam usich niuansaŭ. Napisany ŭ 2003-m, ale dobra čytajecca i siońnia.

Razam z tym cikava nazirać, jak matlaje ŭ aśviatleńni antyhlabalizmu ajčynnuju prapahandu. U štatnych ideolahaŭ zdarajecca kalizija kryteraŭ. Adna reč — kamentavać masavyja akcyi ajčynnaj apazycyi. Tut usio zrazumieła: "Šałudzivyja ludzi!". A voś antyhlabalisty — nibyta idejna blizkija. Usłaŭlajuć Čavesa (a to i Łukašenku!), haniać nachabnych janki ź ichnym ahresiŭnym liberalizmam. Tak što vystupy antyhlabalistaŭ biełaruskaja prapahanda raz-poraz skarystoŭvała dziela antyimperyjalistyčnaj rytoryki, krytyki hiehiemanizmu dy niespraviadlivaści adnapalarnaha śvietu.

Akramia ŭsiaho inšaha, kali tamtejšaja palicyja musić razhaniać antyhlabalistaŭ dručkami dy ślezaciečnym hazam, dyk i dziejańni ajčynnaha AMONu vyhladajuć nie takimi ŭžo brutalnymi. Niama čaho, maŭlaŭ, zakidać nam zdušeńnie palityčnych pratestaŭ! U svaim voku bierviana nia bačycie!

Ironija ž histaryčnaha losu palahaje ŭ tym, što čym dalej, tym bolej biełaruskaja ŭłada musić ličycca mienavita z tendencyjaj hlabalizacyi. Strata rasiejskich datacyjaŭ choćki-niachoćki šturchaje da pošuku parazumieńnia z krainami "załatoha miljardu". Jak ni krucisia, a mienavita tam kredyty i sučasnyja technalohii. Mianiajecca rytoryka ŭ dačynieńni da MVF. Nikudy nie padziecca i ad Usiaśvietnaj handlovaj arhanizacyi. Dyj lozunham sacyjalnaj dziaržavy ŭ piku ichniamu biazdušnamu liberalizmu ŭžo nadta nie pamachaješ, paśla taho jak musili adabrać ilhoty ŭ studentaŭ dy invalidaŭ.

Dyj uvohule, chalera ich raźbiare, henych antyhlabalistaŭ! Mohuć vyjści i ź lozunham "Svabodu palitviaźniam!". Heta vam nie pikiet BRSM. Nienadziejnaja publika!

Karaciej, ciažka stała žyć aficyjoznamu prapahandystu. Treba čuchać patylicu i hadać, jaki z padvojnych standartaŭ užyć dla čarhovaha kamentaru. Jašče chvalić tych antyhlabalistaŭ ci ŭžo beścić, jak pačali beścić Kreml pa skančeńni ery tannych enerhanośbitaŭ? :-)

• 0
• 0
• 0
• 0
• 0
• 0
• 0
• 0