Lider demakratyčnych sił Biełarusi Alaksandr Milinkievič u Prazie sumiesna z prezidentami šerahu krain, viadomymi palitykami i hramadskimi dziejačami prymie ŭdzieł u mižnarodnaj kanfierencyi «Demakratyja i biaśpieka».
Akramia ŭdziełu ŭ ahulnym forumie ŭ lidera demakratyčnych sił Biełarusi na praciahu dvuch dzion zapłanavanyja dvuchbakovyja sustrečy z prezidentam ZŠA Dž.Bušam, prezidentam Estonii Toomasam Chienrykam Iłviesam, eks‑prezidentam Čechii Vacłavam Havełam, ministram zamiežnych spravaŭ Čechii Karełam Švarcenbierham, savieckim dysidentam i kiraŭnikom Instytuta palityčnych daśledavańniaŭ pry Šałom Centry — Natanam Ščaranskim, prezidentam radyjo Svaboda Džefry Hiedminam i inšymi.
Mižnarodnaja kanfierencyja «Demakratyja i biaśpieka» pravodzicca napiaredadni samitu krain «Vialikaj vosiemki» i pryśviečana dziejnaści ŭ padtrymku pracesaŭ demakratyzacyi ŭ krainach z aŭtarytarnym i tatalitarnym režymami. Pa vynikach ŭpłyvovaj kanfierencyi budzie pryniaty admysłovy «Pražski dakumient».
‑ Siońnia, jak nikoli, vostra paŭstaje prablema abarony pravoŭ čałavieka va ŭsim śviecie. Tolki pavaha da pravoŭ čałavieka, da pravoŭ hramadzianina, zabiaśpiečvaje biaśpieku i stabilnaść na našym kantyniencie. My pavinny pamiatać, što tyja krainy, jakija nie pavažajuć pravy svaich hramadzian, nie buduć pavažać pravy inšych narodaŭ. Dziaržaŭnaja palityka takich aŭtarytarnych i tatalitarnych režymaŭ stvaraje atmaśfieru napružanaści i destabilizacyii ŭ našym rehijonie, — zajaviŭ Alaksandr Milinkievič napiaredadni svajho vizita ŭ Prahu.
Vizit Alaksandra Milinkieviča ŭ Čechiju adbyvajecca pa zaprašeńni eks‑prezidenta Čechii Vacłava Haŭła.
