Pamiaci Viačasłava Čarnaviła
...Jahonaja śmierć była imhniennaj i biazhłuzdaj: na šlachu mašyny, što mčała načnoju Baryspalskaj šašoj, raptam apynuŭsia hruzavik. Tak 26 sakavika a čaćviertaj ranicy Viačasłaŭ Čarnavił nazaŭždy staŭ historyjaj.
Choć, ułasna, jon byŭ hetaj historyjaj užo pry žyćci. Try aryšty, šmathadovaje źniavoleńnie, staršynavańnie ŭ pieršaj niesavieckaj Lvoŭskaj abłradzie, kali jon jašče za Sajuzu pieršym uźniaŭ nad budynkam błakitna-žoŭty štandar. Tady, u krasaviku 1990-ha, heta była nia prosta źmiena ściahu, a znak źmienaŭ, što nieśli nadzieju.
Z 1992 hodu Viačasłaŭ Čarnavił uznačalvaŭ Narodny Ruch Ukrainy. Hety peryjad jahonaj dziejnaści vyklikaŭ, mabyć, najbolš sprečak. Adny abahaŭlali jaho jak charyzmatyčnaha lidera, inšyja krytykavali za byccam by aŭtarytarny styl kiraŭnictva. A dla ŭkrainskich kamunistaŭ jon uvasablaŭ saboj «suśvietnaje zło». Jaho nazyvali «banderaŭcam» i «zachodnikam», choć naradziŭsia jon na Čarkaščynie, la Šaŭčenkavych Maryncoŭ i Kiryłaŭki.
Apošnija miesiacy byli dla Viačasłava Čarnaviła ciažkimi. Unutryruchaŭskaja apazycyja ŭźniałasia suprać svajho lidera, i z sakavika dziejničali ŭžo dva Narodnyja Ruchi. Ciažkim maralnym udaram stała dla Viačasłava Čarnaviła praciahnutaje praź Viarchoŭnuju Radu rašeńnie ab ustupleńni Ŭkrainy ŭ Mižparlamenckuju asambleju SNH, suprać jakoha jon tak zmahaŭsia. Jaho mocna krytykavali za toje, što jon dapuściŭ heta. Ciapier hetyja krytyčnyja hałasy, viadoma, ścichnuć — bo jahonyja apanenty z pravicy i centru nie mahli nie šanavać u im mahutnaj asabistaści, Hramadzianina i Zmahara.
Jon pajšoŭ u viečnaść, dzie zojmie svoj pasad u kole pabracimaŭ-šaśćdziasiatnikaŭ: Vasila Simanienki, Vasila Stusa, Ały Horskaj, Ivana Śviatličnaha — jakija stalisia symbalem prahi ŭkraincaŭ da voli. Zastaniecca vobraz «zekaŭskaha hienerała» (tak pisaŭ pra jaho syjanist Mychajła Chiejfec, jaki pad upłyvam Čarnaviła dałučyŭsia da ŭkrainskaha ruchu). Zastaniecca zdymak ščasnaha i stomlenaha Viačasłava Čarnaviła ŭ dzień abviaščeńnia Niezaležnaści — tonkaja ŭśmieška čałavieka, jaki pieražyŭ dva infarkty.
Maksim Strycha, Kijeŭ
Ciapier čytajuć
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 20262
Kamientary