«Paśla Łukašenki»
Kiravać jon budzie nami 30 hadoŭ. Mnie budzie 65, kali nastanie hetaje «paśla». Choć ja nia baču sensu stolki žyć u takaj krainie, jak i nie znachodžu žadańnia jaje pakidać. Možna ličyć majo pryznańnie prykmietaj prynaležnaści da «ludziej na bałocie». Naš praklon — kaŭtun. Heta naš kryž. U kožnaha naroda jon svoj. Pierakłaści na inšyja plečy niemahčyma.
Nakont tryccaci hadoŭ paviedamiŭ Hłoba. Ja nia vieru pradkazalnikam. Ale nie mahu nie davać viery pavažnaści namieraŭ zakulisnych arhanizacyjaŭ, jakija ahučvaje padobnaja publika. Uzhadajcie, što było ŭkładziena ŭ vušy elektaratu: vami budzie kiravać 40-hadovy i h.d. Jon sam paŭtaraŭ, što pryjšoŭ «usurjoz i nadoŭha», pakul nia byŭ upeŭnieny. Ale ciapier bolš nie paŭtaraje.
Jon, vierahodna, nia stanie prezydentam starejšaha brata, bo starejšy brat razvalvajecca na kavałki. Ale zatoje jamu pastaviać pomnik. Pavodle Hłoby. Tolki nia viedaju pakul, dzie. Kala akademii navuk, akademii milicyi, sielhasakademii, ministerstva kałhasnaha ładu abo pobač akademii mechanizacyi sielskaj haspadarki? Nia vyklučana, što dla pomnika budzie nasypany kurhan, ad kožnaha kałhasu — pa mašynie ziamli.
Vydatny šaniec atrymaje sajuz piśmieńnikaŭ — paŭtaryć łacinaamerykanski litaraturny fenomen. Biez dyktatarskaha režymu takoje najrad ci mahčymaje.
Budzie stvorana i daviedzienaja da vybitnaha ŭzroŭniu halereja jahonych partretaŭ. U majoj šufladzie źjavicca albom paštovych marak z prezydenckimi siužetami, cełyja seryi: «pryjom u akciabraty», «kamsamolski važak», «na achovie zachodnich rubiažoŭ savieckaj ajčyny», «šlub», «u saŭhasnaj kantory», «barec z mafijaj», «streł u Loźnie», «klatva na kanstytucyi», «selektarnaja narada», «arnament», «źniščeńnie šlahbaŭmaŭ» i h.d. Dapuskaju, što partret źjavicca taksama ŭ cerkvach.
Nadrukujecca vialiki zbor tvoraŭ. Adnych tolki praklonaŭ suprać NATO — ceły tom. Častotny słoŭnik movy: «žuljo», «bić pa mordzie» i ŭsio takoje. Skarynaŭski medal atrymajuć usie haradanačalniki ŭ krainie starejšaha brata — da rajcentru ŭłučna.
Usio heta stanie našym «pasilnym układam» u sučasnuju eŭrapiejskuju cyvilizacyju. Praŭda, kab paśla vyjści z rabstva, nam usio adno nia chopić dziesiaci hadoŭ...
Siarhiej Astraŭcoŭ, Horadnia
Ciapier čytajuć
Pamiatajecie Taćcianu Zareckuju, jakaja sa skandałam zvalniałasia z Kabinieta Cichanoŭskaj? U Estonii jaje padazrajuć u machlarstvie41
Kamientary