Suproć razbureńnia

Suproć razbureńnia

1 vieraśnia a 8-j hadzinie ranicy hrupa mienčukoŭ, zaniepakojenaja losam budynkaŭ № 5, 7, 9 pa vuł. Kamsamolskaj -- pomnikaŭ architektury XIX st. — niesankcyjanavana vyjšła na skryžavańnie vulic Niamihi j Kamsamolskaj ź plakatami j zaklikami spynić razbureńnie. Siabry Zhurtavańnia biełaruskaj moładzi «Eŭrapiejski Šlach», udzielniki choru biełaruskaj pieśni «Adradžeńnie» pieraškodzili razbureńniu doma № 7 pa vuł. Kamsamolskaj, ustaŭšy pierad buldozerami i ekskavatarami. U prysutnaści supracoŭnikaŭ milicyi kiraŭnictva «budoŭli» paabiacała prypynieńnie złomu. Hetaja mini-pieramoha nie kaštavała ŭdzielnikam navat zvykłych u naš čas zatrymańniaŭ. Kamentuje lider «Eŭrapiejskaha Šlachu» Alaksiej Frałoŭ:

«Za apošnija hady byli źniščanyja ŭnikalnyja reštki Dabravieščanskaj carkvy CHII st. u Viciebsku, abkładzienyja cehłaj aryhinalnyja ŭzory draŭlanaj architektury — cerkvy ŭ v.Zabałaćcie i v.Dračkova Smalavickaha rajonu, zrujnavanaja staraviečnaja vieža ŭ Navahradku. U viežy byłoha Kalvinskaha zboru ŭ Zasłaŭi pravasłaŭnaja carkva abstalavała «śviačny zavodzik», što praz peŭny čas padpaliŭ pomnik. Novym vielizarnym korpusam byŭ skalečany ahulny vyhlad kompleksu Mikałajeŭskaj carkvy ŭ Mahilovie — vydatnaha ŭzoru biełaruskaj baročnaj pravasłaŭnaj architektury.

U stalicy ŭ pracesie pracaŭ na Vierchnim horadzie akcyjanernaje tavarystva «Stary Miensk» źniščyła ceły šerah cikavych, redkich i ŭnikalnych pomnikaŭ. Heta damy № 2, 2a, 4, 6, 6a pa vuł. Hiercena, pa Muzyčnym zavułku 1, pa vuł. Internacyjanalnaj 25, 21/3 (dom, dzie žyŭ Stanisłaŭ Maniuška) i inšyja. Adbyvajecca razbureńnie staradaŭnich aŭtentyčnych budynkaŭ i pabudova na ich miescy tannych mulažoŭ-katedžaŭ. Dazvoły na padobnuju «rekanstrukcyju» vydaje sp.Bubnoŭski — staršynia Kamitetu pa achovie histaryčna-kulturnaj spadčyny Ministerstva kultury RB, jaki abaviazany nazirać za stanam pomnikaŭ. Ale ž nie! Voś užo źniščany dom № 7 na byłoj Felicyjanaŭskaj (Kamsamolskaja), za im pojdzie i ŭvieś kvartał — padpišuć śmiarotny prysud cikavamu i niepaŭtornamu rajonu staroha Miensku. U kuluarach dziaržaŭnych ustanovaŭ užo miesiac abmiarkoŭvajecca čarhovaja «aryhinalnaja» ideja — pastavić «novyj bolšoj sobor» na Niamizie.

Mienavita tamu ŭ Mienharvykankam byli padadzienyja zajaŭki na 7 pikietaŭ la razburvanych budynkaŭ na vuł.Kamsamolskaj, kala Haścinaha dvaru, kala Kamitetu pa achovie histaryčna-kulturnaj spadčyny, adkaznaha za jaje rujnavańnie, i la Ministerstva kultury. Dazvołu nam nie dali. My naładzili pieršyja pikiety biez dazvołu.