U Polščy rasśledujuć vialikuju spravu ab adpraŭcy narkotykaŭ praz pačkamaty. Siarod abvinavačanych — biełarus
U Polščy rasśledujuć spravu ab pierasyłcy narkotykaŭ praz pačkamaty. Udzielniki złačynnaj hrupy sartavali i fasavali zabaronienyja rečyvy, a zatym rassyłali ich pakupnikam jak pasyłki.
Abvinavačvańni vystaŭlenyja vaśmi fihurantam — heta šeść ukraincaŭ, palak i biełarus. Ab spravie raspaviali ŭ Akruhovaj prakuratury Hdańska, piša Most.
Hrupa zajmałasia rečyvam α‑PVP. U adnoj pasyłcy mahło być ad 2 da 20 hram rečyva, rasfasavanych pa dozach. Atrymalniki byli nie spažyŭcy, a zakładčyki. Jany pavinny byli pakinuć narkotyk u miescy, jakoje vyznačali kaardynatary, i zrabić fatahrafii. Pa ich dozy zatym znachodzili spažyŭcy.
Na siońnia viadoma pra 700 adpraŭlenych pasyłak. I 7 kiłahramaŭ preparataŭ koštam kala 1 młn złotych (250 tysiač jeŭra) było kanfiskavana ŭ chodzie vobšukaŭ u siami haradach, u tym liku ŭ Varšavie, Hdańsku, Poznani.
Tam ža zatrymali vosiem mužčyn. Šaściora ź ich — hramadzianie Ukrainy, adzin — palak i adzin — biełarus. Heta 36-hadovy Andrej P.
Usim mužčynam vystaŭlenyja abvinavačvańni ŭ prodažy značnaj kolkaści psichatropnych rečyvaŭ i ŭdziele ŭ arhanizavanaj złačynnaj hrupie, a dvum hramadzianam Ukrainy — Ramanu S. i Jarasłavu Z. — jašče i ŭ kiraŭnictvie złačynnaj hrupaj. Mahčymych kiraŭnikoŭ časova aryštavali na try miesiacy. Suprać astatnich uviedzieny palicejski nahlad, im zabaronieny vyjezd z krainy.
Za prodaž narkotykaŭ moža pahražać da 12 hadoŭ pazbaŭleńnia voli, za ŭdzieł u złačynnaj hrupie — ad 3 miesiacaŭ da 5 hadoŭ, a za kiraŭnictva — ad 2 da 15 hadoŭ.
Śledstva praciahvajecca, prakuratura papiaredziła, što mahčymyja dalejšyja zatrymańni.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak6
Kamientary