Mahiloŭskija donary atrymali adkaz z Pałaty pradstaŭnikoŭ na svoj zvarot nakont skaračeńnia lhotaŭ. Pra heta BiełaPAN paviedamiŭ hanarovy donar Biełarusi Ihar Kavalenka.
«Paviedamlajem, što prajekt zakona Respubliki Biełaruś «Ab dziaržaŭnych sacyjalnych ilhotach, pravach i harantyjach dla asobnych katehoryj hramadzian», skiravany na ŭparadkavańnie dziejnaj sistemy sacyjalnych ilhotaŭ i ŭdaskanaleńnie sistemy pradastaŭleńnia ich na asnovie pryncypaŭ sacyjalna‑ekanamičnaj efiektyŭnaści, adrasnaści i harantavanaści, pryniaty Pałataj pradstaŭnikoŭ 23 maja. Padčas padrychtoŭki dadzienaha zakonaprajekta realizavać prapanovy pa zachavańni lhotaŭ asobnym katehoryjam hramadzian kamisii nie ŭdałosia», — havorycca ŭ adkazie, jaki padpisaŭ staršynia kamisii pa pracy, sacyjalnaj zaściarozie, spravach vieteranaŭ i invalidaŭ Siarhiej Kamianiecki.
«Heta nie adkaz na našy prapanovy zachavać ilhoty donaram, a farmalnaja adpiska našych čynoŭnikaŭ. Nibyta jany chacieli abmierkavać, pakidać nam ilhoty ci nie, ale nie paśpieli. Ja naohuł nie razumieju hetuju farmuloŭku — «realizavać prapanovy pa zachavańni lhotaŭ nie ŭdałosia». Heta što — chtości ŭ parłamiencie nios našy prapanovy ŭ zału pasiadžeńniaŭ i paśliznuŭsia na bananavaj skurcy?» — skazaŭ I.Kavalenka.
Pavodle jaho słoŭ, atrymany adkaz nijak nie paŭpłyvaje na praviadzieńnie zabastoŭki, jakuju płanujuć mahiloŭskija donary. «Z 20 pa 27 červienia płanujecca papieradžalnaja zabastoŭka: na praciahu hetaha tydnia donary pierastanuć naviedvać abłasnuju stancyju pieralivańnia kryvi. Kali heta nie daść vynikaŭ, donary hatovy abjavić biesterminovuju zabastoŭku», — zajaviŭ I.Kavalenka.
