Naviny ź Biełarusi za subotu j niadzielu
«Vw» pierajechaŭ kalosy
U subotu la Bačejkava pad Biešankovičami «Falksvahien-Transporter» nalacieŭ na padvodu, jakoj jechali 7 čałaviek, a kiravaŭ dyrektar lesahaspadarčaha abjadnańnia Michaił Amieljanovič, piša BiełaPAN. Raźbiŭ uščent, piaciora zahinuli: pensijanerka Hanna Pankievič, jaje syn, niaviestka i dźvie dački, a dvoch mužčyn źniaviečyŭ. Kiroŭcam, pa ciapierašnich ślizkich darohach, treba vielmi hladzieć! Bo za adnu subotu ŭ Biełarusi pa darohach 15 čałaviek zahinuli.
Aryštavali čynoŭnikaŭ
U piatnicu aryštavali Mikałaja Žabina, načalnika ŭpraŭleńnia investycyjaŭ Minsielhascharču, i Ŭładzimiera Jaceviča, staršyniu Pramatamnahladu Ministerstva pa nadzvyčajnych sytuacyjach. Byccam by jany ŭziali chabar 5000 dalaraŭ, paabiacaŭšy dapamahčy vyvieźci ŭ Rasieju 80 t śvininy, piša BiełaPAN.
Dynamizm novaha Frontu
Sojm BNF adbyŭsia ŭčora. Vyrašyli pytańni arhanizacyi pracy. Na pasadzie adkaznaha sakratara Ŭpravy maładyja z MF chacieli pakinuć Siŭčyka, adnak Sojm prahałasavaŭ za Alesia Kavalca. Pres-sakratarom BNF abrali Alaksieja Šeina. Kamisiju jurydyčnuju ŭznačaliła Siamdzianava, mižnarodnych suviaziaŭ — Sadoŭski, kaardynacyi z rabočym rucham i prafsajuzami — Ivaškievič. Prafesar Hryckievič ačoliŭ kamisiju kultury. Sakratarami Ŭpravy zaćvierdzili Siarhieja Michnova, Jurasia Palčeŭskaha dy Alaksieja Janukieviča. Dynamizm i kanstruktyŭnaść dyskusijaŭ dajuć nadzieju, što BNF i Viačorka ŭ chutkim časie zdabuduć nia tolki maralnuju pieramohu.
Mirasłaŭ Čantarycki
Pomnik na Kalvaryi
Na Kalvaryi adkryli pomnik dzieciam, što zahinuli ŭ traŭni na Niamizie — tut ich pachavana šaściora — kamień z šyldaju i kryžom Eŭfrasińni. Ułady nie dali adkryć pomnik na Dziady, bajalisia demanstracyi. Rabiŭ jaho skulptar Michał Ińkoŭ, čyja dačka tady na toj śviet pajšła.
B.T.
Usienarodnaje maŭčańnie
«Novaja hazeta», orhan navapołackaha harvykankamu, naprykancy kastryčnika pravodziła pramuju liniju z čytačami dla ŭsienarodnaha abmierkavańnia sajuznaj damovy. Za ceły dzień nichto nie patelefanavaŭ. Navat pensijanery, jakija zaŭsiahdy adhukajucca.
Kaho nie padmanieš — dyk to ekanomiku. Połackija ŭłady źviarnulisia da sialčanaŭ, kab tyja razabrali z kałhasaŭ maładniak na zimoŭku. Haspadarki nie narychtavali karmoŭ. Častku maładniaka pieraviazuć u Chojnicki rajon. Tam jość čym karmić. Vidavočna, z čarnobylskimi prypravami.
Z Navapołacku — Aleś Arkuš
Miny ŭvosieni ličać
U aŭtorak ranicaj u dziažurnuju častku milicyi patelefanavaŭ nieznajomy i paviedamiŭ ab zakładzienaj minie ŭ Astravieckim rajvykankamie. Niekalki hadzinaŭ budynak ahladali sapiory z sabakam, ale tak ničoha i nie znajšli. Tak ciapier va ŭsioj Biełarusi viesialacca.
Z Astraŭca — Marjan Vianhroŭski
Bankamaty ŭ Horadni
Na haradzienskim «Azocie» pačali vypłočvać zarobak na mahnitnyja kartki, za jakija možna kuplać što choč u 11 haradzkich kramach, a možna atrymlivać hatoŭku ŭ specyjalnych bankamatach. Za hrošy, što lažać na kartcy, aŭtamatyčna naličvajuć pracenty. Kali ž zhubiš, dyk treba adrazu pazvanić na numar, jaki budzie dzień i noč pracavać, i skazać: tady kartku adrazu zablakujuć. Zručna, bo nia treba ciahać za saboj torbu z łukašenkaŭskimi rublami. Jak u Eŭropie: tam usie na kartkach žyvuć.
Rečyca rabićmie karabli dla Niderlandaŭ
Namieśnik ministru transpartu Ŭłasienia pajechaŭ u Horynhiem, u Niderlandy, kab damovicca ab pabudovie karabloŭ dla Niderlandaŭ na Rečyckaj i Homielskaj vierfiach. 60% abarotnych srodkaŭ daje na pabudovu ŭrad, a 40% — roznyja ajčynnyja investary. Karabli ŭdajucca na 30% dziešaviejšyja, jak na suśvietnym rynku. Z 1992 hodu tut užo zrabili 5 karpusoŭ dla halandcaŭ.
B.T.
Ci ŭviaduć kartki?
Deputaty VS źbiralisia ŭ sieradu ŭ litoŭskim Sejmie na pasiedžańnie prezydyjumu. Kazali miž inšym, što «u Biełarusi ciapier paŭsiudna režuć karovaŭ, a tamu stała brakavać małočnaha. U śniežni, pavodle parlamentaroŭ, u krainie budzie ŭviedzienaja systema praduktovych kartak», — paviedamiła litoŭskaja hazeta «Respublika».
